Ужрад кык люкетъёслэсь сылӥз. Семьяослы нырысь «Визитка» конкурс пыр потоно луиз. Татын котькинлэсь кужмогес адӟиськизы Прогресс библиотекалэн лыдӟисьёсыз – Каюмовъёслэн трос нылпиё семьязы. Соос асьсэды выжыкылын выллем возьматӥзы. Каюмовъёс царьлы Иван Грозныйлы нырысетӥ «Апостол» книгаез сётэмзэс адӟытӥзы.
Учкисьёс понна тужгес тунсыко но пуштросо луиз «Семьялэн яратоно книгаез» конкурс. Татын семьяос Литературалэсь арзэ, ёрослы 80 ар тырмонэз яке Быдӟым Атыкай ожын вормонлы 70 ар тырмонэз югдытыны тыршизы. Азьпалтыса верало, тросэз сцена вылын Быдӟым Вормонэз возьматӥзы. Нош Вуж Варяшысь модельной библиотекаысь лыдӟисьёсмы – Минигалиевъёслэн семьязы – Литературалэсь арзэ бырйизы. Минигалиевъёс тужгес ярато А. Гринлэсь «Алые паруса» книгазэ лыдӟыны. Солэсь пуштроссэ возьматыны ми сценка дасямы. Рольёсын но соослы туж удалтӥз. Пичи нылэз но мӧйы воргоронэз шудӥзы Настя но Рудик нылпиоссы, зарезь дурын принцез возьмась нылэз – Аграфена анайзы. Нош Рафис атайзы принцез возьматӥз. Егит ныл доры со зарезетӥ лемлет тусо парусэн вуиз. Озьы кылдӥз одӥгез шудо семья. Жюри Минигалиевъёслэсь сценказэс тужгес устоен лыдъяз. Нош кинлы соос Гран-при сётозы?
Номинициосын вормисьёсты ӟечкыланы кыл сётӥськиз жюрилэн ёзчиезлы, поселениос куспысь культурая но шутэтсконъя центрлэн директорезлэн воштӥсезлы Гульнара Валеевалы. Нош вормисьёсты дипломъёсын данъяз ёросысь Нылкышноослэн кенешенызы кивалтӥсь Ильсияр Проскурякова. Вуж Варяшысь Минигалиевъёслэн семьязылы со нырысетӥ степенё диплом сётӥз. Нош Гран-прилы кузё луиз Каюмовъёслэн семьязы.
Марина ХИСАМУТДИНОВА
Оставить сообщение: