icon_gotop
18+
autorisation
Войти | Регистрация
Время в Татышле
11:01
Sunday, 17 Октября
Рекламный баннер 990x90px top

Зарни сӥзьыллэн зарни пиез

2015-09-10

- Юрий Уракович, вераськонмес кутскыса тодэме потэ, улонады самой чебер малпанды (мечтады) ма сярысь луэ?

- Малпанъёсы котькуд адямилэн сямен ик пӧртэмесь. Но самой чебер малпанэ арганэн шудыны дышетскон сярысь вал. Арганэн шудыны быгатӥсьёслы сыӵе вожъяськыса улӥ. Можгаысь педучилищее дышетскыны пырыса, малпанэ быдэсмиз: мон арганэн шудыны дышетски. Отысен ик хорлэн солистэз луыса нырысьсэ сцена вылэ потӥ. Студент аръёсам крезьгуро дуннеен эшъяськеме али ке но улонме шулдыр каре.

- Уж стажды ньыльдон арлэсь ятыр. Улондэс тодон-валан дуннеен герӟан капчиен ӧз сётскы, дыр? Дышетӥсь луэм сяна, Тӥ школаен но кивалтӥды. Со аръёсты сярысь ма верасалды?

- Азьвыл школаос бадӟымесь вал, пиналъёс трос луизы. Шуом, Барабановка школа. Отын 500-600 пиналъёс дышетскем дыръёс но вал. Классъёс А-лы, Б-лы, В-лы люкиськылӥзы, коллективамы 20-25 дышетӥсьёс ужазы. Туж шулдыр улӥмы, школаямы дышетӥсьёслэн фольклор коллективзы, пиналъёслэн ансамбльзы ужазы. Ӵем гинэ республикаын ортчоно ужрадъёсы пыриськылӥмы. Со сяна, Удмуртиын ортчоно ужрадъёсы но вуылӥмы. Милемыз телевидение пыр но возьматъязы. Бен, ужан аръёсам котькыӵе дыръёс луизы. Нуналаз кык пол Уфае мыныса бертэме но вань. Со Сандугаче выль школа ӝутон сярысь документъёс дасяны кутскем бере вал.

- Туала пиналъёс сярысь ма верасалды? Азьвыл пиналъёсын ӵошатыса, кыӵе пӧртэмлыксы син шорады тужгес йотэ?

- Туала пиналъёс трос тодо, быгатонлыкъёссы но пӧртэмесь. Одӥгез гинэ сюлэмез шуг каре: интернет пыр информация люкаса, книгаен ужаны, книга лыдӟыны вунэто.

- Юрий Уракович, Тӥ пӧртэм предметъёсъя дышетӥды. История валтӥсь предметды луэ. Историклэн синмыныз учкыса, туала улонмы кыӵе?

- История, мон малпасько, одӥгез тунсыко предмет. Со кӧс предметъёс полы уг пыры, шуом. Математика цифраосын, лыдъяськонэн герӟаське. Нош история – улонлэз котыр ласянь югдытэ, история –со ачиз улон. Соин ик историен дышетӥсьлы пиналъёссэ предметаз кыскыны быгатоно. Дышетскисьёсы пӧлын улонзэс история предметэн герӟамъёс вань. Со монэ туж шумпоттэ. Аслам Вадим пие но история предметэн дышетӥсь. Нош туала улон сярысь ке, али калык пӧлын пӧртэм вераськонъёс мыно. Асьме вакытэз ушъясьёсыз но, тышкаськисьёс но сюрозы. Историлэсь пӧртэм дыръёссэ учкид ке, Россиын патриотизм «вир вылын» возиське. Калыклэн ас шаераз улэмез но ужамез мед потоз шуыса, шаермылы но калыклэн куронъёсызлы тупано. Соку адями ас шаерзэ яратоз, тушмонъёслэсь утемез но потоз.

- Тӥ сямен дышетӥсь кыӵе луыны кулэ?

- Школае ужаны лыктӥд бере, пиналъёстэ яратон мылкыдыд бадӟым луыны кулэ. Предметдэ тодоно, ас ужад профессионал луоно.

- Туннэ нуналэ улонды пачыл но тыро пӧрмемын. Озьыен, писпу мерттӥды, выль юртъёс жутӥды, пиды, нылъёсты, гажано кузпалды вань. Шаермылэн пӧртэм сэрегъёсаз ужало но уло дышетэм пиналъёсты. Улон девизды нош кыӵе луэ?

- Нимысьтыз нокыӵе девизъёсы ӧвӧл кадь. Улӥ, кызьы быгатӥ, ужай, кызьы сюлмы куриз. Ӟечезлы осконме уг быдтӥськы. Али дыре огзэ вераны быгатӥсько: туж шулдыр ужамы. Пӧртэм аръёсы ужамме тодам вайыса паймисько но, кызьы меда ваньмаз вутскиськеммы? Урокъёс но сётъямы, сцена вылын но ӵем луиськомы вал, мӧзмыса чик ӧм улэ. Семьяелы тау, анаелы, кузпалэлы, нылпиосылы. Соос монэ валась луизы, котьку юрттӥзы. Туннэ Вадим пие но Вера нылы асьсэ понназы уло ини. Ксюша нылы УдГу-эз йылпумъяз. Одӥг внуке, кык внучкаосы вань. Семьяямы арган куара ӵем чузъяське, нылпиосы но крезьгуро дуннее пичиысен ик кыстӥськизы. Семъямылэн ансамбльез ёросамы но тодмо луиз. Регионъёс куспын ортчись смотръёсы но пыриськылћмы. Шутэтскон дырме Дима внукеным визнан кутыса шур дурын  ортчытыны яратӥсько. Удмурт кырӟанъёс кельшо, Генрих Перевощиковлэсь творчествозэ гажасько. Дышетэм пиналъёсылэн вормонъёссы сярысь кылыку тужгес но шумпотисько.

- Юрий Уракович, бадӟым тау вераськемдылы. Ӟечкыласьком Тӥледыз юбилееныды, азьланяз но малпанъёсты зарни сӥзьыл кадь чебересь мед луозы на.

- Бадӟым тау .

Ирина САМИГУЛОВА.

Янаул ёрос.

2155

Оставить сообщение:

НАШИ ПАРТНЕРЫ