Ӵошен ортчем кузь сюрес

- Мон вордӥськи 1943-тӥ арын 25-тӥ толсуре. 7-тӥ классэз йылпумъям бере, Бурай ёросэ пудо возьмась луыса мынӥ. Бигер кылэз уг тодӥськы вал, туж секыт йӧтӥз. Бӧрдэм дыръёс но луизы. Озьы ке но гужембыт ужай, бигер кыллы но дыши. Ужам понна ю сётӥзы. Шумпотонэлэн пумыз ик ӧй вал, - вера Минсабир Тимирханович.

Арлыдо воргорон ассэ пӧртэм ӧръёсын эскерем: фермаын но ужам, плотниклэсь, стекольщиклэсь, строительлэсь, столярлэсь ужъёссэ но быдэсъям, тракторист но луэм. Огдыре Минсабир агай висьыны усем, пельызлы операция лэсьтӥллям. Кема курадӟем со бурмытскытозяз.

- Гуртмы вӧзын бадӟым сад вань вал. 1974-тӥ арын отчы охранэ ужаны интыяськи. Берлось кызь ар ӵоже, пенсие потытозям, Росгосстрахын страховщик луыса ужай. Ветеран труда ним но сётӥзы, - вера М. Тимирханов.

Гыльнифа апайлэн уж сюресэз колхозын ортчем: со курег фермаын ужам. Арлыдо кузпалъёс ужтэк пукыны дышемын ӧвӧл. Соос трос чипы-курег вордо, муш но утё.

Тимирхановъёслэн данъяськонзы – вить нылъёссы. Кузпалъёс соослы ӟеч визьнод сётӥллям, улонын данъяськымон, оскымон адями луыны, бадӟымъёсты гажаны дышетӥллям.

- Ми туж шумпотӥськом нылъёсмы понна. Соослэн котькудзылэн семьяоссы, нылпиоссы вань, - шуо юбиляръёс.

Гуртын котькыӵе вакытэ уж трос луэ. Уката ик – гужем, турын дасян дыре. Гыльнифа апаен Минсабир агайлэн нылъёссы, эмеспиоссы таӵе ӟырдыт вакытэ гуртэ бертыны тыршо, анай-атайзылы юрттӥсько. Тимирханов кузпалъёсты тямыс внукъёссы но кык внучкаоссы шумпотто.

Миляуша

НИГАМАТУЛЛИНА.

Калтасы ёрос.