icon_gotop
18+
autorisation
Войти | Регистрация
Время в Татышле
10:48
Sunday, 17 Октября
Рекламный баннер 990x90px top

Лагерен люкиськизы мӧзмыт гурен

2015-08-13

«Усточикаре» лыктэм нылпиослэн тросэзлэн таиз гужемзы лагерь нуналъёсты возьмаса ортчиз, дыр. Нош соос тӧл сямен ӝог лобӟизы. Озьы ке но пиналъёс «Усточикарын» шапыкен-шапыкен трос визьнод люказы, быгатонлыксэс волятӥзы. Лагерьлэн берпуметӥ нуналаз со яркыт шӧдӥськиз. Тани киосам куролэсь лэсьтэм сяськаосты бергатӥсько. Шӧдӥське, нылъёс таӵе ужъёс бордын нырысьсэ гинэ ужамын ӧвӧл. Соос оло кылем арын но татын шутэтскем нылъёсын лэсьтэмын? Нош таиз киуж али дышетскыса пӧрмытэмын. «Кызьпу туй» ӧрысь пиналъёслэн но ужъёссы синмаськымонэсь. Нылпиослэн усто киоссы олома пӧрмытыны йӧндыриллям. Нош туспуктӥсьёслэн ужъёсазы котькуд арбери, инкуазь шоры лэчыт синмын учкыны быгатэмзы шӧдӥське. Соослэн туспуктэмъёсазы (кӧня ке люкетэз ньылетӥ бамын возьматэмын) лагерьлэн улонэз быдэсак адњиське.

Нош «Фольклор», «Эстрада», «Азьветлӥсь», «Театр» ӧръёс огъя кужымен быдэс концерт дасяллям. Та нуналэ соослэсь быгатонлыксэс дунъяны, пиналъёслэн шумпотонэнызы люкиськыны, анай-атайёссы сяна, Татышлы ёрос Кенешлэн секретарез  Р. Г. Рахимов, БР-ысь удмуртъёслэн историяя но культурая центренызы кивалтӥсь Л. З. Рахимьянова вуылӥзы. Соос «Усточикарысь» ӧнерчиослэн, вожатойёслэн ужзы пумысен трос шуныт кылъёс веразы. Лагерьлэн вуоно арын но трос удмурт нылпиосты пумитанэз сярысь осконзэс шараязы.

Усточикаръёслэсь концертсэс Валерия Гайниярова усьтӥз. Татын со нырысетӥ арзэ гинэ уг шутэтскы. Соин, вылды, кужымез но шӧдскымон ни. Та нуналэ Валерия эшъёсызлы но учкисьёслы «Мар со сыӵе яратон» кырӟанзэ кузьмаз. Таиз арысь «Усточикар» сцена вылысь трос «ӝужась кизилиосты» шараяз. Отын яркытэсь адӟиськизы Инесса Зидымакова, Екатерина Салахутдинова, Алёна Садыкова, Карина Шаймарданова, Луиза Миниахметова, Яна Фазлыева но Снежана Зиянгирова. «Эстрада» ӧре ветлӥсьёсты сцена вылын воштӥзы фольклорез утисьёс. Соос кивалтӥсенызы Лилиана Нуриахметоваен ӵош «Вӧй келян» композициез возьматӥзы.

«Театр» ӧре ветлӥсьёс но зол ужаллям. Соослэн йылпумъясь ужзы «Маскара вӧтъёс» но «Бизнес» серемес сценкаос луизы. Пиналъёс сцена вылын зэмос артистъёс выллем адскизы. Соин, вылды, серемес учыръёссы но оскымон пӧрмизы.

Серемес сценка бере залын чус-чус луиз. Сцена вылэ потӥзы вожатойёс, Воткинскысь крезьгуръя колледжын дышетскисьёс Лия Стрелкова, Алина Вахрушева но Радис Гайниятов. Соос крезен, арганэн шудэмзы улсын удмурт кырӟанъёсты быдэстӥзы.

Таиз арысь «Усточикар» «Шулдыр гур» кырӟанэн йылпумъяськиз. Но пиналъёслэн сюлмазы та вакытэ малы ке шудӥз мӧзмыт гур. «Ӟеч лу, «Усточикар», - шуизы кадь соос ас понназы. – Вуоно арын выльысь тон доры вуомы на».

Ольга НИГАМАТУЛЛИНА.

Редакцилэсь: «Усточикарысь» пӧртэм ӧръёсысь устоосыз пиналъёс Нелли Зайдулина («Художественной туспуктэм»), Виктория Зарипова («Куро»), Руслан Камалитдинов («Театр»), Снежана Зиянгирова («Фольклор»), Диана Гильмаутдинова («Азьветлӥсь»), Юлиан Гильманшин («Кызьпу туй»), Инесса Зидымакова («Эстрада») «Ошмес» газетлы 2016-тӥ арысь нырысетӥ паларлы гожтӥськыны сертификатъёсын данъямын.

2367

Оставить сообщение:

НАШИ ПАРТНЕРЫ