Матысь адямидэ ыштон – бадӟым куректон, нош солэн шайгу азяз султыса йыбырттыны ке уг луы, эшшо но секытгес. Ож аръёсы но со бере улэмъёс кӧня синвузэс кисьтӥзы, луоз, ышем, бырем матысьёссэс малпаса. Кышкыт ож дугдэм дырысен 70 ар ке но ортчемын, тросэз, ӟечезлы оскыса, матысьёссэс утчало на: аръёс ӵоже архивъёсын «бугыръясько», пӧртэм-пӧртэм сайтъёсын пукыло.
«Якорная Щель». Тросэз понна та кыл номыр кадь ӧвӧл, дыр. Нош Быдӟым Атыкай ожын бырем Алексей Егорович Сарапульцевлэн матысьёсыз понна со пароль выллем луэ.
Кылем арын Татышлы ёрос редакцие Сочиысь гожтэт вуиз. Сое Арут Григорьевич Варваштян ыстэм. Гожтэтаз со Татышлы ёросысь солдат сярысь вера. Краснодар шаерысь солдатъёсты ватэм интыын поисковой ужъёс нуыкуз, одӥгаз стелаысь со Алексей Егорович Сарапульцевлэсь нимзэ синйылтэм. Кема аръёс ӵоже ивортэк ышем солдатъёсты утчан ужен тунсыкъяськись воргорон ваньзэ пыр-поч эскерыны, тодыны малпам. Архивъёс, сайтъёс пыр тодэм: Алексей Егорович Сарапульцев 1892-тӥ арын вордӥськем. Фронтэ сое басьтӥллям БАССР-ысь Татышлы ёрос военкоматысен. Солдат сярысь справкаын кыӵе гуртысь луэмез пусъемын ӧвӧл. Озьы ик кулэм нуналъёсыз но уг тупало: одӥгаз справкаын 1942-тӥ арысь 4-тӥ толсур пусъемын, мукетаз – 14-тӥ толсур. Арут Григорьевич та лыдпусэз эскерон бордын кема тыршем. Сочиысь со дыре 35-тӥ номеро госпитален кивалтӥсьлэн но отысь эмчиослэн гожъямъёссыя тодмо луэм: рядовой Сарапульцев госпитале 13-тӥ толсуре шедем, кулэм нуналэз – 14-тӥ толсур. «Родные» графаын солдатлэн кузпалыз пусъемын – Манифа Сарапульцева. Мукет гожъямъёсты документысь пыр-поч эскероно кадь ӧвӧл, гожъямъёс умой возиськиллямтэ. Справкаын А. Сарапульцевлэн шайгу интыез ӟеч пусъемын: «Краснодарский край, Шапшугский район, деревня Якорная Щель, 302-й километр, пионерский лагерь, южная сторона». Арут Варваштянлэн гожтэт ыстэмез юнме ӧз луы. Алексей Сарапульцевлэн внукез, Андрей Петрович Мазеин, Татышлы ёросысь Арибаш гуртын улэ.
Вормон Нуналэ, ёрос администрацилэн юрттэт возьматэмез улсын, Андрей Мазеин но Татышлы ёрослэн представителез, «Планета Спорт» ФОК-ен кивалтӥсь Насибулла Хуснуллин Сочи вӧзы интыяськем Якорная Щель посёлоке вуылӥзы. Отысь Братской могилае Алексей Сарапульцевлэсь нимтулзэ пыраклы гожтӥзы.
- Ож аръёсы бырыны шедем улосчиосты буре ваён – со данъяськон. Нош матысь адямиоссы понна, кылын вераны луонтэм шумпотон, - вера Н. Хуснуллин.
Сочие ветлэмъёслэсь бертэмзэс Сарапульцевлэн матысьёсыз чидатэк витизы, шумпотыса пумитазы. Андрей Петрович отысь ӵужатаезлэн шайгу вылысьтыз музъемен берытскиз.
Миляуша
НИГАМАТУЛЛИНА.
Оставить сообщение: