Шутэтскозы, дышетскозы, мӧзмыны уз лу дырзы

«Усточикарез» усьтонлы сӥзем ужрадын нылпиос аспӧртэм космической корабле шедизы. Соосты ӟечкыланы отчы кожылӥзы Татышлы ёрос Кенешлэн секретарез Р. Г. Рахимов, дышетонъя ёзэтэн кивалтӥсь А. М. Фарвазетдинов, БР-ысь удмуртъёслэн историяя но культурая центренызы кивалтӥсь Л. З. Рахимьянова, нылпиослэн но егитъёслэн «Батыр» клубенызы кивалтӥсь Э. Д. Валиева.

Та нуналэ космической корабль шундыен, толэзен, инвисэн, кизилиосын пумиськылӥз. Озьы нимасько лагерьын шутэтскись нылпиослэн отрядъёссы. Соосын тодматскыса, шӧдӥськиз, «Усточикаре» кырӟаны-эктыны, вераны шаплы нылпиос люкаськиллям. Озьы ке но дас нунал ӵоже соослэн таӵе быгатонлыкъёссы трослы волялозы на. Со сярысь сюлмаськозы «Комета» отрядысь ӧнерчиос. Туэ лагерьын «Кызьпу туй» (ӧнерчиез М. Адуллин), «Зарни куро» (С. Гильмухова), «Эстрада» (А. Гаврилов), «Калык кырӟан гуръёс» (Л. Нуриахметова),  «Лидер» (М. Турова), «Театр» (А. Герасимова), «Художественной туспуктэм» (А. Самирзянов) ӧръёс ужалозы. «Усточикарын» пиналъёслэсь шутэтсконзэс но тунсыко радъяны тыршозы. «Марсианинъёс» отрядысь шаплыесь вожатойёс В. Митрофанова, В. Васильева, Р. Гайниятов, И. Шайхуллина, О. Садретдинова, А. Вахрушева, Л. Стрелкова, крезьгуръя но физкультурая кивалтӥсьёс К. Баширов но  В. Зинатуллин пӧртэм конкурсъёс, шудонъёс ортчытъялозы. Озьыен, пиналъёслэн лагерьын мӧзмыны дырзы уз луы. Нош доразы анайзылэсь пӧзьтэм сиёнзэс тодазы вайытыса, татын ческыт зынэн гочатозы пӧзьтӥськисьёсын Е. Хазетдиноваен, Р. Гайнияроваен но О. Зариповаен дасям шыдъёс, ӝукъёс но мукет пӧртэм сиёнъёс. «Ужан нуналъёсмы пайдаен мед ортчозы, шутэтсконмы сярысь малпанъёсмы кемалы тодамы мед кылёзы», - вазиськиз лагерьлэн тӧроез И. Гайнияров «Усточикарез» усьтыса.

Дас нунал ӵоже пиналъёс зэмос выжыкылын улозы. Аспӧртэм космической корабльзы соослы бадӟым кужым сётоз, трос эшъёс шедьтыны юрттоз, вылезлы дышетоз.

 Ольга

    НИГАМАТУЛЛИНА.