«Нефтекамскысь удмуртъёслэн куаразы»

Бурай ёросысь Алтау гуртын вордскыса будэм нылаш 8-тӥ класс бере Можгаысь педучилищее дышетскыны пырем.

- Малы Можга? Малы ке шуоно Ульфат Бадретдинов отын дышетскиз. Соин мынам отын тодон-валан басьтэме потӥз. Специализацие вал – старшой пионервожатой но покчи классъёсты дышетӥсь. Диплом басьтэм бере направлениен Сарапулысь одӥгаз школае ужаны ыстӥзы. Куинь ар отын ужай. Туж тунсыко, пыраклы тодэ кыльымон аръёс вал со: коллективмы огкылысь, директормы милемыз валась, юрттӥсь, - ортчем аръёсаз выльысь берытскыса выллем вера Фируза Шарапгалиевна.

Бӧрысь егит дышетӥсь вордскем гуртаз берытскем. Фагиля эшеныз соос Свердловске заводэ ужаны мыныны малпало вылэм. Сюлэмызлы матын луись школаез юн-юн бордаз кыскем, лэся. Фируза Шарапгалиевна Алтау школае ужаны интыяськем. Куинь ар ужамез бере улон сюрессэ Семипалатинскысь бертэм егит пияшен герӟам. 1988-тӥ арысен Фируза апай Владимир кузпалыныз ӵошен вамышто, шумпотонъёссэс но, шуг-секытъёссэс но шори люко. Соосты Евгений но Наталья нылпиоссы шумпотто.

Кузпалъяськем дырысенызы Фаизовъёс Нефтекамскын уло. Татчы вуыса, Фируза апай уж сюрессэ городысь 11-тӥ номеро школаын азьланьтэм. Бӧрысь 8-тӥ номеро школае ужаны выжем. Кызь укмыс ар ӵоже покчи классъёсын дышетскисьёслы тодон-валан сётэм нырысетӥ категориен дышетӥсьлэн шыкысаз данъян грамотаосыз, тау карон гожтэтъёсыз трос люкаськемын. Нош дышетӥсь понна тужгес бадӟым кузьым, вормон – со дышетэм нылпиослэн тонэ гажаса вазиськемзы, аръёс ортчыса но тон сярысь малпаськемзы, тау кылъёссэс верамзы.

Улонын пӧртэм дыръёс луо. Огдыре Фируза апай висьыны усем. Соин ик со школаен, пичильтыкъёсын люкиськем.Собере городысь педколледжын, музейын ужам на. 2012-тӥ арысен со Нефтекамскысь удмуртъёслэн огазеяськонэнызы кивалтэ.

- Нефтекамскысь удмуртъёслэн куаразы, - вера Фируза Шарапгалиевна сярысь городысь йӧскалык огазеяськонъёсын кивалтӥсь Мария Ягафарова.

Удмуртъёслэн огазеяськонзы Нефтекамскын кемалась кылдэмын. М. Ягафаровалэн кылъёсызъя, со 2009-тӥ арысен гинэ шӧдскымон азинскыны кутскем, куке кивалтӥсе Татьяна Глимзяноваез юнматӥллям. Соку ик «Выжы-кум» удмурт фольклор ансамбль но кылдэмын. Али дыре соин Ф. Фаизова кивалтэ.

- Фируза Шарапгалиевна сюлмысьтыз, дырзэ но кужымзэ жалятэк тыршемен, «Выжы-кум» ансамбльлэн нимыз, городын но ёросын сяна, палэнэ но паськыт вӧлмиз. Кыӵе гинэ фестивальёсы, ужрадъёсы соосты уг вазё! Вераны кулэ, Фируза Шарапгалиевна ачиз но пӧртэм, тунсыко но пайдаё луись ужрадъёс радъян сярысь сюлмаське. Кылсярысь, Нефтекамсклэн кылдэмез дырысен 50 ар тырмонлы сӥзем ужрадэ соос удмурт корка дасязы. Туж усто пӧрмытӥзы. Туэ «Ночь музеев - 2015», «Весна Победы» ужрадъёсы но удмурт огазеяськонэ пыриськисьёс пыр-поч дасяськизы, «Турын турнан», «Армие келян» удмурт калык йылолъёсты вылӥ дунъет сётымон возьматӥзы. Городын удмурт ёлка ортчытон но йылоллы пӧрмиз ни. Ваньмыз со кивалтӥсьлэн тыршеменыз герӟаськемын, - вера Мария Касимовна.

Нефтекамскысь йӧс-калык огазеяськонъёсын кивалтӥсь удмуртъёслэсь одӥг аспӧртэмлыксэс пусъе на: удмурт ужрадъёсы пӧртэм аресъемъёс, пе, пырисько, удмуртъёс ваньзы ӵошен шулдыръяськыны быгато, бадӟымез но, пичиез но, егитэз но палэнэ уг кылё.

- Басьтом, «Выжы-кум» ансамблез. Азьло отчы арлыдоос гинэ пырисько вал. Нош туннэ нуналэ? Мӧйыосын ӵош егитъёс но ансамбльын кырӟало-экто. Яке «Лыжня зовёт» ужрад. Толлэн одӥг нуналаз городысь удмуртъёс ӵошен кариськыса куас сюрес вылэ султо. Нылпиос понна но, анай-атайёс понна но, песяй-песятайёс понна но  со туж пайдаё пумиськон луэ. Сое удмурт огазеяськон гинэ радъя, - шуэ М. Ягафарова.

Тыршись адями котькытчы, котьма быдэстыны вуэ, шуо. Общественной ужъёсы пыриськон сяна, Фируза апай киужъёсын вырыны но дыр шедьтэ. Улон юртсэ борддоръёсысь пужыятэм картинаос шулдырто. Озьы ик кибашлы кышномурт курикен керттӥськыны яратэ. Узыяны, борыяны, губияны ветлэ. Чорыганы но, пе, дыр шедьтӥсько.

- Нош пӧръёсыз солэн макем ческытэсь! - вера удмурт огазеяськонэ азинлыко пыриськись, городысь историяя но шаертодонъя музейысь материально-технической службая ёзэтэн кивалтӥсь Венера Атнакузина. – Фируза Шарапгалиевна куно пумитаны яратэ. Репетициосты но со ӵемысь дораз радъя.

Лякыт сямо кышномуртлэн сюлэм шунытэз, небыт кылыз эшъёсызлы но, нылпиосызлы но, кузпалызлы но, вань матысьёсызлы но тырмо. Ужрадъёсы пыриськыны, калык пӧлын луыны быгатэмез понна, Фируза апай кузпалызлы тау кылъёссэ вера. Ог-огдэ валаса, ог-огедлы юрттӥськыса, кенешчи луыса улонлэн емышез но узыр, пе, луэ.

Миляуша БУЛАТОВА.

Нефтекамск город.