Ма муген Москвае вуи? Школаын дышетскисьёс пӧлын П. И. Чайковскийлэн 175 арес тырмонэзлы сӥзем дас витетӥез калыккуспо конкурс ялэмын вал. П. И. Чайковскийлэн творчествоезлы сӥзем сочинениосъя конкурсын республикаын вормисе потӥ. Кивалтӥсе - Елена Манапова. Та аспӧртэм конкурслэн валтӥсь призэз луиз Москвае экскурсие вуылон.
28-тӥ инвожое шаермылэн шоркарез Россилэн пӧртэм сэрегъёсысьтыз 150 вормисьёсты пумитаз. Дышетӥсьёсын ӵош - 260 кузя. Башкортостанысь ми вить кузя вал: куинь вормисьёс но кык дышетӥсьёс. Милемыз 20 этажъем «Корстон» отеле интыязы. Ми 12-тӥ этажын улӥм. Отын туж трос вал кунгож сьӧрысь вуэмъёс, нош мон кадь гордайёс чик ӧй вал. Соин, лэся, котькудӥз мынам кытысь вуэме, кин луэме сярысь тунсыкъяськиз.
«Красная площадь», «Кремль», «Александровский сад», «Воробьевы горы» - ваньзэ ми адӟим. Вуж исторической урамтӥ но автобусэн ортчим. Москвалэсь 150 иськеме интыяськем Клин городэ но вуылӥм. Отын берлось ньыль арзэ улэм Пётр Ильич Чайковский. Композиторлэн улэм юртаз – музее – кожылӥмы. Музейлэн садаз солы туж бадӟым памятник пуктэмын. Пётр Ильич сярысь ужме быдэстыку трос тодӥ вал. Со кема улымтэ, 53 аресаз холера висёнлэсь кулэм. Нош Москвае вуылыса, сӥё-дано адямилэсь улос-вылоссэ но адӟи. Та дырозь мынам Москвае вуылэме ӧй вал на. Мыным шоркармы туж кельшиз. Огкылын вераса, Москва – со кузьыли кар. Таӵе тунсыко конкурсъёс тросгес мед луысалзы вылэм. Нош мынам кыдёкысь экскурсие таин медаз на йылпумъяськы.
Валерия ГАЙНИЯРОВА.
Татышлы ёрос.
Оставить сообщение: