icon_gotop
18+
autorisation
Войти | Регистрация
Время в Татышле
17:49
Пятница, 29 Марта
Рекламный баннер 990x90px top

Шимес адӟон пыр – шудо улонэ

14:44 16.07.2015

- Вордӥськи 1925-тӥ арын Мамады гуртын. Татын ик будӥ, улӥ. Пичи дыры син азям пуксе – туж умой, кызьы шуо, бай улӥськом вал. Коркамы кык этажо вал. Куинь амбармы, вуз карон юртмы но вань вал.

Тулыс. Кизён дыр. Байкылды каш бусы. Вань калык татын. Гырон-кизён ужъёсты азьло курегпуз кизьыса кутско вал. Ми, пичиос, со курегпузъёсты ӵошатскыса бичаськом. Кинлэн тросгес луоз? Атай курегпузъёсты юри мон азе «кизе», лэся. Мон шумпотыса бичасько. Мыным соку куинь арес вылэм, дыр, туж пичи на вал мон. Озьы ке но со суред яркыт луыса тодам кылем. Шулдыр кутским со арын кизёнэз, но сӥзьыл юосты басьтыны ӧз кылды ни. Милемыз кулак карыса, ваньзэ талазы-быдтӥзы. Улон сураськем-пожаськемен, атаймы потыса кошкиз. Нокин уг тоды, кытчы кошкемзэ. Вить валъёсты, одӥг толэсэз колхозэ сётӥм. Куамынлэсь трос ыжъёсмес улляса кошкизы. Скалмы одӥг гинэ вылэм, лэся. Берло сое но басьтӥзы. Улон коркамы но мукетъёс кузёяськыны кутскизы: ми улын улӥськом, вылысь этажез сельсовет каризы. Бӧрысь юртмы школалы пӧрмиз. Милемыз улляса поттӥзы. Пичиесь укноосын, пичи гинэ корка улыны выжим. Ыжпи корка шуиськом вал ми сое. Куать арлэсь трос  отын курадӟыса улӥм: дӥськутъёсты талазы, сиыны сиёнмы ӧвӧл.

Сандыкъёсты бугыръякузы, ӟус улэ одӥг дэрем усьыса кылем. Туж шумпотӥм солы. Ӵуказеяз бадӟым апай бускель гуртэ мыныса, со дэремез одӥг ведра пызьлы воштӥз. Пичи ке но сиён луиз шуыса шумпотӥськом. Апай бертыса пыриз гинэ но, пызьзэ бушатыны ӧз вуы, сьӧртӥз ик куинь воргоронъёс вуизы но пызен ведразэ басьтыса кошкизы. Тани ваньмы зар-зар бӧрдӥськом.

Мар карод? Урам кузяе кураськыны потӥ. Мар гинэ ӧй кылы, мар гинэ ӧй адӟы соку. Кин ке куасьмем нянь юдэссэ сётэ, коӵыш йыръем нянь юдэс сётӥсьёс но луизы. Одӥг ӟеч уг вуны, одӥг лек уг вуны, шуо. Коркась корка ветлӥсько. Одӥг апай нянь, шаньга пыжем. Монэ жаляса, со ӝыны шаньгазэ сётӥз. Ой, шумпотӥ, пыды музъеме ик уг йӧты, бызисько доре, агаен, апайёсын ческыт карыса сое сиимы.

Гуртэ концерт лыктэ ке, отчы потыны дӥськутэ ӧвӧл. Нош ик муртлэсь кураськоно. Секыт вал, туж секыт...

Анаен бусыын уриськыса ветлэм дыръёс но уг вуно. Мыным соку куать арес вал. Пӧсь шунды-а ӵушка, тӧл-а пелля, зоре-а – лумбыт бусыын. Отын ужам понна пуньыен пызь сёто вал. Солэсь шыд пӧзьтыса сииськом.

Дас ньыль аресам сплаве ыстӥзы. Оштолэзьысен коньывуон толэзёзь Танып шур кузяын ужай, доре но бертылытэк. Куинь тол нюлэскын кор поттонын тырши, валэн но ужай. Колхозлэн ӵектэмезъя, ньыль ар ӵоже Свердловск улосвылэ торф поттыны ветлӥ. Ужамез, адӟем секытлыкъёсты вераса быдтод шат?

Шуг-секытъёс трос адӟеменыз, лэся, анаймы вазь кулӥз. Ыжпи коркан улыкумы атаймы бертӥз вал, милемыз Москвае, пе, нуисько шуыса. Но сое тюрьмае басьтыса кошкизы. Соку атаймес берпуметӥзэ адӟим.

Бадӟым апаймы бызиз. Кырсилэн корка бугроез вань вылэм. Сое вайыса, ыжпи коркамы вӧзы итыса куать сэрго корка ӝутӥм. Тыршыса, ужаса ми но калык радэ потӥмы. Кулак карыса ваньзэ талазы ке но, милям ниммы выльысь ӝутскиз.

1945-тӥ арын Карамутдин войнаысь бертӥз. Ми паръяським. Сизьым нуны вордӥмы вал, куинез висьыса кулӥзы. Огез пие ньыльдон одӥг аресаз улонысь кошкиз…

Секытлыкъёс пыр потыса, туннэ нуналэ куноын кадь улӥсько. Ваньмыз вань, ӝӧк выл тыр сиён-юон, уж трослы капчиямын. Эх, ӧвӧл ни ведь егит дыры!

Миляуша БУЛАТОВА.

Бурай ёрос. 

6369

Оставить сообщение: