Ӵошен - ӝыны даурлэсь кема

Мынам вераме потэ татысь Миннимухаметовъёслэн семьязы сярысь. Таяз арын Гильмухан агайлэн но Васила апайлэн семья кылдытэмзы дырысен 55 ар луэ. Семьялэн нуналаз соосты ӟечкыланы дыртӥм.

1960-тӥ арын коньывуон толэзе Гильмухан агай 15 арес нылэз, Василаез, выль кенлы ваем. Марзэ-созэ валаса вуытэк но, выжыкылын сямен, кузпалъёс кузь улон сюресэ вамыштӥллям. Соос трос кужымзэс понӥзы гурт хозяйствоез азинтонлы. Гильмухан агай кема аръёс ӵоже механизаторын тыршиз, нош Васила апай колхозын пӧртэм ужъёсты быдэсъяз. ӵошен соос синмаськымонэсь куинь пиос но одӥг ныл будэтӥзы. Табере нылпиоссылэн котькудзылэн асьсэлэн семьяоссы. Анай-атайзэс соос укмыс внукъёсын но куать правнукъёсын шумпоттӥзы.

Тани туннэ но Васила апайлэн корказ ческыт нянь зын вӧлмем. Озьы со ужаса бертӥсь нылпиоссэ возьма.

       Зульфира ЗАРИПОВА,

«Шулдыр ӝыт» удмурт калык ансамблен кивалтӥсь.