icon_gotop
18+
autorisation
Войти | Регистрация
Время в Татышле
12:51
Вторник, 19 Октября
Рекламный баннер 990x90px top

Сюресъёс вуттӥзы «Чакарае»

2015-07-02

Вунэм йылолъёсты улӟытыса

Куноосты Бадӟым Качак гуртын туж шуныт пумитазы. Гуртоос ульчае ческыт пӧръёсын, пӧсь чаен ӝӧкъёс дасяллям. Арган куара, шулдыр удмурт кырӟанъёс та нуналэ быдэс гуртэ вӧлмизы. Бӧрысь дуно куноос Чакара гурезе тубизы. Татын вӧсясь Анатолий Насипуллин, тазалыко но шудо улон курыса, Инмарлы вазиськиз. Куноос куриськем  ӝук веръязы.

Возь вылын башкир но бигер юртаос, пор, ӟуч но удмурт коркаос пуктэмын вал. Бускель ёросъёсысь удмурт хозяйствоос но та сярысь сюлмаськизы. Котькуд пырись-потӥсез соос ческыт сиён-юонъёсынызы куноязы.

Возь выл тыр инкуазь ваньбуреныз, ужась калыкеныз узыр калтасы музъем сярысь кылбур чузъяськиз. Фестивалез усьтыса вераськиз Калтасы ёрос администрациен кивалтӥсь Юрий Садыров.

- Гажано калтасыос, дуно куноос. Бадӟым Качакын таӵе фестивальлэн ортчемез – со ми понна дан! Ваньдылы бадӟым тау ужрадэ вуэмды понна, - вераз со.

Фестивальлы аспӧртэм шӧм пыртӥз бадӟым салют. Озьы ик ӟечкылан кылъёсынызы вазиськизы УР-ысь йӧскалык политикая министр Лариса Буранова, БР-ысь культурая министрлэн воштӥсез Шамиль Абдраков, УР-ысь культурая но туризмъя министрлэн воштӥсез Пётр Данилов, БР-ысь но УР-ысь Калыкъёслэн эшъяськон юртъёсынызы кивалтӥсьёс Азат Ибрагимов но Алексей Щуклин, Удмуртъёслэн Ассоциацизылэн вице-президентэз Валерий Хохряков  но мукет дуно куноос.

Фольклор коллективъёслэсь концертсэс усьтӥз Татышлы ёросысь вуэм «Шулдыр ӝыт» калык ансамбль. Кылем арын сямен, туэ но «Чакарае» вуизы «туклячиос» - Линда но Алина Гильмановаос. Кырӟаны усточи нылашъёсты кужмо кичабонъёсын пумитазы-келязы. Аспӧртэм дӥськутэныз паймытӥз Ермекей ёросысь вуэм Анастасия Вождаева. Шулдыресь кырӟанъёссэс сюлмысь кузьмазы, кылсярысь, Екатеринбургысь «Азвесь гур» но «Ошмес», Дегтярскысь «Италмас», Пермь шаерысь «Пинал сюлэм» но «Тюрагай», Вятские Поляныысь «Чипчирган», Калтасы но Татышлы ёросъёсысь «Марӟан» ансамбльёс. «Бусы ужъёс» йылолэз яркыт возьматӥз Бурай ёросысь «Инвожо» ансамбль, «Турын дасянэз» - Нефтекамскысь «Выжы-кум» но Татышлы ёросысь «Уӵы ныл» ансамбльёс. Огдырлы учкисьёсты удмурт сюанэ вуттӥз Янаул ёросысь «Югдон» коллектив. Кин гинэ ужрадэ пыриськиз, ваньзы усто быгатонлыкъёссэс возьматӥзы. Соослэн кырӟан гуръёссы кема чузъяськизы на пель сьӧрын. Фестивале пыриськем фольклор коллективъёсты, ужрадэз дасясьёсты но нуисьёсты тау карон гожтэтъёсын пусйизы.

БР-ысь Культурая министерстволэсь тау карон гожтэтъёссэ сётӥзы Татышлы ёросысь Вязовкаысь «Уӵы ныл», Бурай ёросысь Алтауысь «Инвожо» но Калтасы ёросысь Бадӟым Качакысь «Зангари» ансамбльёслы. 

«Древние напевы удмуртов «Чакара» фестиваль – удмурт фольклорез паськыт возьматӥсь ужрад, шуыны луоз. Татын пӧртэм-пӧртэм интыосын улӥсь удмуртъёслэн сям-йылолъёссы, калык дӥськутъёссы возьматӥсько, аспӧртэм кырӟанъёс, крезьгуръёс чузъясько. Фестиваль дискотекаен но эшъяськон тылскемен йылпумъяськиз. 

Вормисьёсты радио пыр кылзомы

«Чакара» фестивальын таӵеез ӧй вал на. Туэ отын нырысьсэ нимаз кырӟасьёслы конкурс радъяськиз. Азьпалтыса верало, отын тросэз кужымзэс эскерыны мылкыд каризы. Устооссэ кырӟасьёсты бадӟым кузьым возьма угось: вормисьёслэсь кырӟанъёссэс матысь дыре удмурт радиоын кылзыны луоз. Та нуналэ сцена вылысь ӝужась кизилиосты дунъязы Москваысь вуэм куно, этно-кырӟась Наталия Дзыга, Ижкарысь «Ӟаныкай» ансамблен кивалтӥсь Александр Минеахметов.

Конкурсэз Григорий Тимирбаевлэн «Чакара гурезь» кырӟанэныз усьтӥзы. Люкаськем калыклы сое кузьмазы ужрадэз нуись Ольга Набиева но кырӟанлэн авторез. Нош собере сцена вылын кузёяськизы пӧртэм регионъёсысь вуэм конкурсантъёс. Отчы нырысетӥен тубиз Татышлы ёросысь Бальзюга гуртысь Валерий Сабанчин. Со удмурт кырӟанзэ Александр Минеахметовен ӵош быдэстӥз. Тани быдэс возь тыр арган куара чузъяськиз. Куноосты жингрес гуръёсыныз Татарстанысь Кукмор ёросысь Борис Семёнов шулдыртӥз. Солэн капчи шудэмез троссэ учкисьёсты эктыны ӧтиз.Нош Татышлы ёросысь Вязовкаысь Фирая Туктамышева соосты мур малпаськонэ уськытӥз. Солэн «Кылзы тон уӵыез» кырӟанэз тросэзлэсь сюлэмзэс бугыртӥз.

Та нуналэ учкисьёслы Свердловск улосвылысь Реж городысь Серафима Передерина, Пермь шаерысь Бадӟым Гондыр гуртысь Валерия Тимирова, Киров улосвылысь Надежда Исаева но трос мукетъёс шулдыртӥзы. Кырӟасьёслэн лыдзы куамынлы матэ вуиз. Соос пӧлын луизы на пор, бигер кырӟанъёсты быдэстӥсьёс но. Озьыен, конкурс возьматӥз: шаерысьтымы калыкъёсмы бадӟым эшъяськонын уло. Вераны кулэ, та нуналэ Бадӟым Качакысь Ольга Набиева но Виталий Хайдаршин учкисьёслы асьсэлэсь выль кырӟанъёссэс кузьмазы.

Люкаськем калык шӧдытэк ик кылиз, лэся, конкурслэсь йылпумъяськемзэ. Капчи гуръёс соослы кема дырлы вормонтэм кужым сётӥзы, мылкыдзэс ӝутӥзы. Учкисьёс понна конкурсын котькудӥз кырӟась вормиз кадь. Озьы ке но жюри аслэсьтыз кылзэ вераны дыртӥз: «Чакара» фестивальын радъяськем конкурсын вормисе потӥзы Татышлы ёросысь Вязовка гуртысь Лилияна Нуриахметова, Выль Татышлыысь апай-сузэръёс Линда но Алина  Гильмановаос, Марий Эл Элькунысь Карлыганысь Дмитрий Яковлев.

Миляуша БУЛАТОВА,

Ольга НИГАМАТУЛЛИНА. 

2774

Оставить сообщение:

НАШИ ПАРТНЕРЫ