Вӧсяськон возь вылэ вуэм калык вӧсясьёслэсь куриськемзэс чидатэк возьмаз. Тани кема улытэк, вӧсез усьтыса вераськиз Вуж Варяш гуртлэн вӧсясез Александр Ахтариев. Нош бӧрысь Янаул ёросысь Вуж Варяшысь но Андреевкаысь, Татышлы ёросысь Выль Татышлыысь, Бурай ёросысь Алтауысь, Удмурт Элькунысь Ува ёросысь Пекшурысь но мукет вӧсясьёс Инмарлы вазиськизы. Куриськисьёсын ӵош возь вылэ люкаськемъёс но котькудзы асьсэ понназы Инмар-Кылчинлэсь тазалык, ӟеч улон но ваньзэ умойзэ гинэ куризы, луоз.
Удмуртъёслэн Бадӟым вӧсязы таяз арын дас вить пурты ӝук но куинь пурты чай пӧзьтӥзы. Вуж Варяш гурт поселениын улӥсь калык Элен вӧсе дас одӥг ыжпи но кык ӟазег сётӥз. Ыжпизэс сётӥсьёс пӧлын луизы Вуж Варяшысь М. Шаритдинов, Р. Яруллин, А. Нуриев, А. Гарифзянов, Л. Насибуллин; Выль Варяшысь - А. Насибуллин, Н. Фаткуллин, Ф. Тимирбаев; Нанядыысь - З. Тимирзянова, Г. Тимирзянов; Будья Варяшысь - Б. Саитдинов. Нош Вуж Варяшысь Р. Минигараев но А. Набиуллин ӟазегзэс сётӥзы. Со сяна, Т. Набиуллиналэсь кык ӟазегзэ коньдонэн басьтӥзы. Мукет гуртъёсысь вуэм куриськисьёс асьсэлэсь сьӧразы ваем пудозэс вӧсязы.
Шумпотыса верано, Элен вӧсе егитъёс но пыриськизы. Озьыен, азьланьын но удмурт калыклэн Бадӟым вӧсез азинскоз, Инмар-Кылчинмы выль кужымен улыны оскон пыӵатоз.
Марина ХИСАМУТДИНОВА,
гуртысь библиотекаен кивалтӥсь.
Оставить сообщение: