icon_gotop
18+
autorisation
Войти | Регистрация
Время в Татышле
20:24
Вторник, 3 Августа
Рекламный баннер 990x90px top

Ваннапалан ӝуатско тылъёс...

2015-06-11

Калтасы ёросысь Бадӟым Качак гуртын аспӧртэм пичияк Сабантуй яке ульчаослэн шулдыръяськонзы ортчиз. Пенсиысь дышетӥсьёслэн С. С. Суфияровалэн но М. Т. Ахмадыршиналэн кичӧлтэмзыя, Бадӟым Качакысь ваннапал ульчаын улӥсьёс уллапалъёсты, шординъёсты, кырӟылгаосты, камбаркаосты но выль урамъёсты куное ӧтизы.

 Та ужрадэз кык кузя гинэ уд вормы, малпам ужез улонэ быдэстыны вань ульчаысь калык пыриськиз. Сабантуй ортчытон возь вылэ ваннапалъёс кузь ӝӧк пуктӥзы. Маиз гинэ ӧвӧл вал отын, кыӵе гинэ сиён-юонэн тырмемын ӧй вал ӝӧк выл! Нош пӧртэм турынъёслэсь лэсьтэм чайзылэн зыныз калыкез кыдёкысен гочатӥз. 

Пудооссэс пумитаса, скалъёссэс кыскемзы бере, ӧтем куноос ваннапала тубизы. Отын соосты удмурт дӥськутъёсын усто апайёс арганэн кырӟаса-вераса пумитазы. Шулдыр гуръёс быдэс гуртэ вӧлдӥськизы кадь, сюлэме но задор мылкыд каръяськиз.

Та нуналэ люкаськем калыкез аспӧртэм ужрадэн ӟечкыланы ёрос администрациен кивалтӥсьлэн воштӥсез Д. Б. Сайфугалиев, интыысь аскивалтэтлэн тӧроез Г. Д. Хайдаршин вуэмын вал. Соос люкаськемъёслы ӟеч мылкыд но капчилык сӥзизы, азьпалан но, пе, та выллем ужрадъёс тросгес мед луысалзы.

Со сяна, ужрадын «Чакара» фестивалез ортчытон ласянь но вераськон ӝутӥзы. Азьвылгес фестивальлэн оргкомитетэз «Чакараез» Калтасыысь Сабантуй возь вылын ортчытыны вераськемын ке вал, калыклы та выллем малпан ӧз кельшы. Соин ик люкаськемъёс кивалтэтлы та юанэн вазиськизы.

Д. Б. Сайфугалиевлэн верамезъя, «Чакара» фестиваль туж бадӟым ужрад. Отчы быдэс Россиысь удмуртъёс вуозы шуид ке но, уд янгыша. Соин ик, сое учкымон ортчытон понна, трос кужым кулэ луоз. Бадӟым Качакысь одӥгаз возь вылын ортчытыны вераськемын ке вал, отчы туж трос кужым пононо луоз. Нырысь ик тыл кысконо, сцена но пуконъёс лэсьтоно. Сое ваньзэ кивалтэт гинэ вормыны уз быгаты, одно ик калыклэсь юрттэт кулэ луоз.

Люкаськем калык Динар Басыровичлэн верамезлы шумпотӥз но ужрадэз ортчытыны вань кужымзэ поныны кыл сётӥз. Озьыен, регионъёс куспысь «Чакара» фестивалез Бадӟым Качак музъем вылын ортчытыны вераськемын вал.

Нош шулдыръяськон таин гинэ ӧз йылпумъяськы, ваннапалъёс, уллапалъёс, шординъёс, кырӟылгаос, камбаркаос, выль урамъёс пӧртэм шудонъёсын кужымзэс мертазы, арганэн кырӟазы-эктӥзы.

Люкаськем калыкез ӝытпал тужгес но уродъяськись кузькукъёс но ӧз кышкатэ. Сабантуй возь вылын кема  чузъяськизы на шулдыр удмурт гуртъёс. 

Венера ИЛЬБАЕВА.

Калтасы ёрос.

1550

Оставить сообщение:

НАШИ ПАРТНЕРЫ