icon_gotop
18+
autorisation
Войти | Регистрация
Время в Татышле
17:26
Четверг, 28 Октября
Рекламный баннер 990x90px top

Куриськон кылъёслы инкуазь но шумпотӥз

2015-06-11

Татышлы ёросысь Вылысь Татышлыын но таяз арын гуртэн вӧсяськонэз «улӟытӥзы» . Ви-тетӥ инвожо толэзе Инмарлы Татышлинка шур дурысь вож-вож ӝужам турыно возь вылын вазиськизы. 1930-тӥ арозь Мӧр вӧсьёс Вылысь Татышлыын радъяськизы. Лыдӟисьёсмылы ӵектӥськом Выль Татышлыысь вӧсь коркан утиськись гожтэм чуръёсын тодматскыны: «Татышлы ёросысь Юг шурлэн бур паласьтыз удмурт гуртъёсын улӥсьёс, араз одӥг пол люкаськыса, сое инвожо толэзьын ортчытъязы. Вӧсьёс Татышлы шурлэн кутсконаз чебер писпуос, пӧртэм сяськаё интыын ортчылӥзы. Соосты ортчытонын азьветлӥсьёс луизы Вылысь но Улысь Татышлыысь Ахмадулла но Мардымша Арманшинъёс, Шайдулла Гибадуллин, Гайди Буранов; Выль Татышлыысь но Майскысь Зият Байдуллин, Шаймардан Шайхаттаров, Зарип Байрамшин, Хамидулла Атнабаев, Мусакай Сайфиев; Уразгильдыысь Ислам Гильманшин, Абдулхак Абкадиров, Нуриахмет Гильманшин; Вязовкаысь Абдрафик Абкадиров, Зедымыш Бадретдинов, Сайфутдин Фатниев; Бальзюгаысь Туктар Кансияров, Шайдулла Гайдуллин, Менлыгали Давлетшин; Арибашысь Султан но Баутдин Гараевъёс; Юдаысь, Уядыбашысь Хаким Байрамшин, Зарифьян Шайдуллин, Хамидулла но Самигулла Насибуллинъёс. Вылӥын верам мӧйы адямиос репрессия аръёсы олокыӵе пыкылонъёслы, вӧсьлы люкетӥсьёслы учкытэк, Татышлы палась удмуртъёслэсь вӧсяськонзэс азинтыны сюлмаськизы.

1930-1932-тӥ аръёсы Мӧр вӧсез пӧртэм мугъёсын Выль Татышлы гуртэ выжтоно луиз. Со дырысен вӧсяськонъёс арысен аре ортчытъясько. 

Вӧсьёсыз данъяса, сое гажаса, ӟеч сямъёсыз, йылолъёсыз утёно. Асьмелэн осконмы - чылкыт инкуазь. Со быдэс дуннеысь улонэз кылдытӥз. Асьмеос ваньмы но Шундылы, Музъемлы, Вулы йыбырттӥськом. Соос калыклы улыны сиён-юон но мукетсэ сёто.

1993-тӥ арын Мӧр вӧсе люкаськем мӧйы муртъёс кенеш карыса «Дэмен» колхозлэсь правленизэ Вӧсь коркалы тупатыны куризы. Вӧсе колхозлэн кивалтӥсез Ренат Галямшин пыриськиз но калыклэн куронэзлы дурбасьтӥз.

1994-тӥ арын Мӧр вӧсез выль вӧсян коркан ортчытӥм. Та ужез «Дэмен» колхоз ас вылаз басьтӥз. Вӧсь коркаез ӝутыны тросэз коньдон сётӥзы. Уксё люказы Арибашысь – Садрихан Садретдинов, Юдаысь – Тимерай Ильтимиров, Татышлыысь – Байтемир Гарифуллин, Уразай Гайдышев, Гадылъян Садыков, Вязовкаысь – Хабибьян Туктакеев, Бальзюгаысь – Назип Садриев, Майскысь – Николай Исламов, Уразгильдыысь – Хаким Ярмиев, Зидрислам Шарипов, Уядыбашысь – Семен Даваев, Выль Татышлыысь – Хакимьян Гузаиров, Зиятдин Мусакаев, Меллакай Шарипов. Вӧсь коркаез ужазы пенсие потэм лэсьтӥськисьёс Гильфан Шагиев, Сайфутдин Гараев, Зиятдин Мусакаев, Хабрислам Хабибьянов но мукетъёс».

Озьы кема аръёс ӵоже Вылысь Татышлыысь удмурт калык Выль Татышлые Мӧр вӧсе гинэ ветлылӥз. Нош табере соос асьсэ понназы гуртэн вӧсяськизы. Уго табере Инмар-Кылчинлы вазиськыны нимысьтыз инты быръемын. Та ужпумез быдэстонэ  бадӟым люкет пыртӥз БР-ысь удмуртъёслэн Национально-культурной центрзылэн кивалтӥсез Р. Б. Галямшин. «Ренат Биктимировичен ӵош ветлыса вӧсь интыез усьтӥмы. Табере вӧсьмылэн аслаз интыез вань. Со туж чебер интые пуксемын. Вӧзаз ик синву кадь чылкыт ошмес жильыртэ. Азьпалан вӧсьмес кеньырен котыртомы, кызьпуос мерттомы. Со сяна, мылкыдмы вань на вӧсь корка пуктыны», - малпанъёсыныз люкиськиз Риф Адисанов. Матысь дыре вылысь татышлыос Выль Татышлые Мӧр вӧсе вуылозы.

Вылысь Татышлыысь удмуртъёс гуртэн вӧсе шумпотыса люкаськизы. Отчы пичиез но, мӧйыез но вуыны мылкыд кариз.Та нуналэ шуныт зоръёс, шыпыт, тыро улон но вань ӟечсэ курыса Инмар-Кылчинлы вӧсясьёс Кабиок Бадамшин, Борис Мардамшин но Фархулла Гараев вазиськизы. Соослы пӧраны Риф Адисанов, Темырхан Шайсламов но мукетъёс юрттӥзы. Тыл вылын пӧзьтэм, ӵын шӧмо ӝукез котькудӥз ас понназ куриськыса веръяз, луоз. Та нуналэ вӧсьлэн выльысь радъяськыны кутскемезлы инкуазь но шумпотӥз кадь. Уго куриськон кылъёс бере со шуныт зоръёссэ сётӥз, нош бӧрысь шунды пӧсь тылсиоссэ кузьмаз.

Марина НИКОЛАЕВА. 

2709

Оставить сообщение:

НАШИ ПАРТНЕРЫ