Удмурт кыллэсь мӧзмем сюлэмзы небӟиз кадь

- Свердловск улосвылын кызьы удмурт дискотека «вордӥськиз»?

- Свердловск улосвылын поръёс пӧлын дискотекаос арлэсь кема радъясько ни. Та ужрадэз соос пӧлын пор пи Вячеслав Петров радъя. Со ик милемлы удмуртъёс пӧлын но таӵе дискотека ортчытон сярысь малпанэныз вазиськиз. 

- Ку нырысетӥез дискотека ортчиз? Трос-а калык отчы люкаськиз?

- Нырысетӥез удмурт дискотека Свердловскын 14-тӥ южтолэзе ӝытазе ужась клубын ортчиз. Шулдыръяськонэ Екатеринбургысь, Вылысь Пышмаысь, Среднеуральскысь, Каменск-Уральскысь, Ревдаысь 16-17 аресысен 65 аресозь кырӟаны-эктыны быгатӥсьёс но удмурт культураез мур гажасьёс пыриськизы. Соос сюлэсь трос люкаськизы. Дискотекамес Удмурт Элькунысь вуэм кырӟасьёс Алина Антонова, Михаил Никитин, диджейёс Дмитрий но Юрий Митрошинъёс шулдыртӥзы. 

- Тодӥсько, алигес кыкетӥез дискотекады ортчиз ни.

- Кыкетӥзэ шулдыръяськонмес егитъёслэн куремзыя радъямы. Со Дегтярскысь Культурая дворецын 30-тӥ куартолэзе ортчиз. Шулдыръяськонэ вань мылкыд карисьёс вуыны мед быгатозы шуыса, ми сое ӝыт сизьым часын кутскимы. Отчы озьы ик Екатеринбургысь, Вылысь Пышмаысь, Среднеуральскысь, Каменск-Уральскысь, Ревдаысь, Дегтярскысь сюлы матэ кырӟась-эктӥсьёс люкаськизы. Екатеринбургысь ужрадэ лыктыны мылкыд карисьёсты нимысьтыз автобусэн нуимы-ваимы. Тазэ дискотекамес узырмытыны Удмурт Элькунысь Иван Котельниковез, диджейёсты Дмитрий но Юрий Митрошинъёсты, Свердловск улосвылын вордӥськем, башкир музъемын будэм но али дыре Удмурт Элькунын улӥсь Алёна Тимерхановаез вазимы. Соослэн ужрадэз шулдыртэмзы люкаськем калыклы сокем сюлмаз кельшиз, уйшор бере но ӟеч мылкыд кузьмасьёсын люкиськемзы уг поты на вал. Алёна Тимерхановаез выльысь но выльысь кырӟаны курылӥзы. Солы чебересь кырӟанъёс, задор мылкыд кузьмамез понна тау кылъёсмес вераськом.

- Калыклы удмурт дискотека кыӵе мылкыд кельтӥз?

- Улосвыламы улӥсь калыкмылы ужрад туж кельшиз. Соос сыӵе шумпотэмын, лӧптэмын. Удмурт кыллэсь, вордӥськем палъёссылэсь мӧзмем сюлэмзы небӟиз кадь. Шулдыръяськон ортчытэм бере, калыклэсь трос шунытэсь кылъёссэс кылӥськом, озьы ик пиналъёс но интернет пыр тау каронъёссэс верало.

- Та выллем шулдыръяськонлэн кыӵе кулэлыкез?

- Та выллем люкаськонъёс удмурт калыкез огазеяло. Асьмелэсь кылмес, культурамес дунъяны но азинтыны юртто. Со сяна, пиналъёсты ог-огенызы эшъяськыто. Таӵе ужрадъёсын ик мӧзмись сюлэмъёс ог-огзэс шедьтыса, выль семьяос но, оло, кылдозы.

         Марина НИКОЛАЕВА.