icon_gotop
18+
autorisation
Войти | Регистрация
Время в Татышле
20:29
Вторник, 3 Августа
Рекламный баннер 990x90px top

Кин азьланьтоз улонмес?

2015-06-04

Бадӟым ву

Тулыс, Герей шурмы ӧрысьтыз потыса, быдэс возь вылэ вӧлдӥське. Гурт вӧзы пумтэм-йылтэм «зарезь» кылдэ. Отын уясь йӧос пароходъёс выллем адско. Ӵаж! вуӵ-ӵ! куара нюлэс тыр шуккиське. Тунсыко суред. Сое адӟыны трос калык люкаське. Пиналъёс пыжъёссэс потто. Шум­потыса уяло соос, жингрес куаразы котыре вӧлме. Вӧлмем ву вылын кырӵӧжъёс уллёен-уллёен лобало. Соос бӧрсьы, кема улытэк, юсьёс, лудӟазегъёс, ванемъёс (цапляос) вуо. Ваньзы шулдыр гужемез чида­тэк витё.

Гужем Бадӟым вуын нылпиос ву пыро. Кызьы гинэ соос уг пыласько! Тыбыр вылазы уяло, ӟазегъёс ся­мен зымо, песоке «ватскыса» шудо, шунды шорын «пыжо». Нылпиослэн куаразы быдэс гуртэз шулдыртэ.

Пыласькон сяна, пичиез но, бадӟымез но, ты дуре визнанэн вась­кыло. Чорыгъёслы но узыр милям Бадӟым вумы.

Сӥзьыл ты «тылобурдо ферма­лы» пӧрме. Кыӵе гинэ уясь бурдоос татын ӧвӧл! Ваньзэ тодмаса-синю­

нйылтыса но уд вуы. Шулдыр гурзэс кузьмало соос гуртоослы.

Шуркынмон толэзь. Ты йӧен шобырске. Пиналъёслы выль шум­потон: соос хоккеен шудыны татчы вуо. Жадьытозязы, пеймыт усьытозь шудо соос.

Бусы

Гуртлэн уй палаз ӵошкыт, пась­кыт, вӧлмыт бусы. Отын гурт хо­зяйстволэн узырлыкез, калыклэн тужгес дуно сиёнэз – нянь будэ. Тулыс ке вуэ, отчы тракторъёс гы­рыны-кизьыны пото. Уен-нуналэн ужало соос. Гуретэм куара куддыр гуртэ ик кылӥське, музъемез зур­катэ кадь.

Гужем ю бусы зарезь выллем тулкымъяське. Ӟег шепъёс йыръ­ёссэс музъемозь ик мыкырто, музъ­ем-анайлы йыбыртто, лэся. Тани ыркыт тӧл пельтӥз, котыре ӟег зын вӧлскиз. Зор шапыкъёс усьылыны кутскизы. Будосъёс, иське, чылкыт омырен шокчозы, кот музъемысь выль кужым басьтозы.

Ӟег вуиз: модосъёсыз ӵужектӥзы, шепъёс зарни тысен тырмизы. Бусые комбайнъёс потӥзы. Ю тысь амбаре вуоз. Выль пызьлэсь буй-буй нянь пыжозы. Няньлэсь но дуноез дунне вылын мар меда?

Герей шур

Гуртлэсь кыдёкын ик ӧвӧл Ге­рей шур бызе. Синкыли кадь чылкыт со. Кыӵе гинэ чорыгъёс ӧвӧл отын! Пӧртэм возьёс, пӧртэм тэльёс пыр ортчыса вуэ со ми пала. Интыен-ин­тыен со туж ӝог бызе, кытын ке кал­лен поръяса кожъёс кылдытэ. Кӧня пудо-животъёс юо солэсь вузэ. Гужем шуре шумпотыса пыласькы­ны вуыло пиналъёс но бадӟымъёс. Городысь куноос вуо ке гуртамы, соос нырысь ик Герей дуре васько. Солэн чеберлыкезлы синмаськыса уг быро. Шулдыр милям Герей дур­мы. Гырон-быдтон праздник но та шур дурын радъяське. Калык татчы котьку шумпотыса вуэ.

Герейлэн тужгес шулдыр вакы­тэз – льӧмпу сяськаян дыр. Тӧдь дэрем дӥсям выль кен выллем адско соку ярдуръёс. Шур кузя ческыт зын вӧлмемын. Шокчиськод ке ческыт зынэн тырмем омырез, сюлмын шум­потон кылдэ, мылкыд ик ӝутске…

Гуртлэн сюлмаськонэз

Гуртмы пичи ке но, татын данъ­яськымон, тыршись калык улэ. Вакы­таз Чиндэрын 300-лэсь ятыр адями лыдъяськем, али дыре татын 200-лэсь трос адями улэ. Пӧртэм удысъ­ёсын тыршо соос. Пӧлазы данъясь­кымон дышетӥсьёс но, эмчиос но, инженеръёс но, зоотехникъёс но, ме­ханизаторъёс но, шофёръёс но вань. Кылсярысь, Чиндэр гуртлэн одӥгез дано пиез – Ильтимир Минтимиро­вич Байметов – Удмурт Элькунын потӥсь «Вордскем кыл» журналлэн валтӥсь редакторез луыса ужаз.

Гуртэ чебер ке но, берло дыре со­лэн шулдырлыкез ыше, шуыны луоз. Гурт хозяйство куажгамын. Тазаесь воргоронъёс, нылкышноос ужтэк кы­лемын. Покчи классъёслы школалэн но ӧсъёсыз пыраклы ворсаськизы. Уж интыос луымтэ бере, егитъёс палэнэ кошко. Кин азьланьтоз на милесьтым улонмес?

Тросэз воргоронъёс вахта ама­лэн ужало. Юрт котырысь вань ужъёс нылкышноослэн пельпумъёсазы уси­зы. Нош уже интыяськыны быгатым­тэос? Ӵукна ик соос магазин котыре люкасько, курытсэ шедьтон сярысь малпасько.

Тодам лыкто К. Маркслэн кылъ­ёсыз: «Уж лэсьтӥз адямиез». Зэм, уж бордын узырлык, уж бордын шумпо­тон, уж бордын тупаса улон, ужын се­мья кыда. Уж ке вань, улон но капчи.

Дмитрий НАСЫРОВ.

Калтасы ёросысь Покчи Качак гурт.

1519

Оставить сообщение:

НАШИ ПАРТНЕРЫ