Светлана Шаймиевалэн пудо котырын тыршемез куамын кык арлы ӵоша ни. «Пичи дырысен апай сьӧры фермае скал кыскыны ветлылӥ», – вера со.Та вакытэ ик, луоз, солэн сюлэмаз пудоосты яратон пыӵам. Нош бӧрысь, йӧн-йӧн ужаны кутскем бераз, Светлана Шаймиевалы удысаз визь-кенеш сётӥсьёс луизы хозяйствоысь та вакытэ адӟем карымон но синмаськымон ужасьёс Екатерина Мухтаршина но Фания Муллаярова. Озьы Света апайлэн улонэзлэн 25 арез ортчиз. Ӵемысь со трос йӧл кыскеменыз висъяськылӥз. Нош туннэ со - осеменатор. Геннадий кузпалыныз ӟеч но таза кунян басьтон сярысь сюлмасько. Соослэн ог-огзэс валаса тыршемзы юнме уг луы. Бӧрысь быдэстэм ужзы узыр емышеныз шумпоттэ. Таяз арын но кузпалъёс, кылем арысь та дырен ӵошатыса, тросгес кунян басьтыны быгатӥзы. Кунянъёс таза мед вордӥськозы шуыса, соослэсь анайёссэс но ческыт сюдон сярысь сюлмаськоно. Света апайлэн верамезъя, пудоослэн сиёназы соос патока, жмых, сылал но мукет ватсэтъёс йылэто на. Скаллэн йӧлыз «кыл йылаз» луэ уга. Пудоез вакытаз но тырмыт сюдыса гинэ азинсконъёс басьтыны луэ. Со сярысь ӟеч тодо хозяйствоысь устоосыз скал кыскисьёс Елена Хабибуллина но Ильмира Гарайшина. Соослэн кыкназылэн но куатьтонлы матэ кысконо скалъёссы лыдъясько. Уж дуразы воштӥсьёссы луымтэен, скал кыскисьёс шутэтскон нуналъёстэк но ужано луо. «Шуг-секытъёслы дышимы ни. Уж интымы милям кыкетӥдормы кадь ни», - верало соос.
Валтӥсь ужзы сяна, С. Шаймиева осеменаторъёслы, Е. Хабибуллина но И. Гарайшина скал кыскисьёслы радъяськем ёрос но республика ӵошатсконъёсы пыриськыло. Отысь соос ӵемысь Данъян грамотаосын берытскыло. Нош Светлана Шаймиевалы 2004-тӥарын Башкортостан Республикаысь гурт удысысь сӥё-дано ужась ним сётэмын.
Марина НИКОЛАЕВА.
Татышлы ёрос.
Оставить сообщение: