Бырем солдатъёслэн нимъёссы уз вунэ

Балтач ёросысь Асавка гурт отын 74 пиоссэ ыштӥз. Соос веся­клы ож бусыосы, мурт шаере выдӥзы. Быдӟым Вормон бере 70 ар ортчыса гинэ солдатъ­ёс вордскем гуртазы вуизы кадь. Асавкае ожын быремъ­ёслэн нимъёсынызы обелиск усьтӥзы. Со сяна, Быдӟым Атыкай ожысь офицерлэн Давли Зиятович Зиятовлэн шайгу вылаз пул юнматӥзы. Со сярысь сюлмаськизы Совето Союзысь Геройлэн пиез, от­ставкаысь подполковник Вла­дислав Шакиров но отстав­каысь подполковник Заниф Закиров. Нош Пермьысь улос­чизы, майор Рифат Пукроков обелиск но У. Ш. Шакировлэн мемориалэз вӧзы мерттыны кедр ваем. Писпу кема аръёс џоже татын, пе, мед будоз.

Та нуналэ Асавкае по­гонэн трос пиосмуртъёс лю­каськизы. Соос пӧлын луизы ожысь ветеранъёс но – Афган, Чечня пыр потэм солдатъёс. Озьыен, ожлэсь кышкытсэ соос асьсэ вылын веръямын. Асавкаос дуно кунооссэс пумитаны сюлмысь дасясь­киллям.  Нырысь соосты Ульмас Шакиров нимо библиотека-музеен тодматӥзы. Нош со­бере люкаськем калык куль­тура юртэ вамыштӥз. Отын «Спасибо Вам за Победу» митинг ортчиз. Зэм, бадӟым ужрадэз ульчаын ортчытыны чакламын вал. Но зоро куазь малпанъёсты быдэстыны люкетӥз. Та нуналэ инкуазь но калыкен ӵош викышъяз кожалод.

Митингез усьтыса Тошкур гурт поселениен кивалтӥсь Б. Ф. Аглямов вераськиз. Нош собере кыл сётӥськиз гуртысь куриськисьлы Га­лиахмат Миниахметовлы. Со Инмарлы вазиськемез сяна, Быдӟым Атыкай ож аръёсы будэмез сярысь но вераз. Та секыт аръёсы ик будӥллям-кыдаллям, кыл­сярысь, Фазиля Туктакиева, Мензифа Ишназарова. Секыт ож но со бере аръёс сярысь соос курыт синкылиосын тодазы ваизы. Та нуналэ трос шуныт кылъёсын вераськиз пенсиысь дышетӥсь Ф. Т. Туктакиева. Татчы люкась­кем погонэн адямиос пӧлысь тросэз Фатима Тимофеевна пыр потэмын ке шуи, уг янгы­ша, дыр. Дышетӥсь митинге азьвыл дышетскисьёсызлы кузьымъёсын вуэм. Сое Бал­тач ёрос администрациен кивалтӥсьлэн воштӥсез Ф. Г. Рахимов но басьтӥз. Фирда­вис Гайнелович таӵе ужрадэз дасясьёслы тау карон кылъ­ёсын вазиськиз.

- Ужмес ёрос админи­страцысен кутскимы. Собере пӧртэм интыосы вазиськоно луиз, - вераз со пумысен Вла­дислав Шакиров. - Милемыз котькытын валазы, юрттӥзы. Та нуналэ обелиск усьтон сярысь гуртмылэн юбилеяз ик вераськимы. Азьлояз обе­лискын ожын быремъёслэн нимъёссы гожтэмын ӧй вал. Нош Давли Зиятович Зия­товлы пул дасяны Ильшат Галлямшин юрттӥз.

Ожын бырем солдатъё­сты, улэпен бертэм ветеранъ­ёсты данъяса, та нуналэ трос шуныт кылъёс чузъяськизы. Соин, вылды, люкаськем ка­лыклэн синъёсысьтыз син­кылиос но быльыразы. Тужгес юн со шӧдӥськиз обелискез усьтэмзы бере. Трос калык солэн котыраз бергаз, ась­сэлэн ӵыжы-выжыоссылэсь нимъёссэс утчаз. Нош собере ваньзы ӵошен культура юрт сьӧры солдат ӝук веръяны вамыштӥзы. Пумиськон шул­дыр концертэн йылпумъясь­киз.

Та бадӟым ужрадэз орт­чытонын В. У. Шакировлы но З. З. Закировлы трос калык юрттӥськиз. Ӵошен уго коть­куд уж но капчиен сётӥське. Туннэ соос юрттӥсьёссылы тау карон кылъёссэс вераны дырто. Азьланяз, пе, медаз луы ни тылож, обелиск пуктон сярысь малпанъёс медаз по­ромытэ йырез.

Ольга НИГАМАТУЛЛИНА.

Балтач ёрос.