Кырӟанъёсын возисько калык сямъёс

Кызьы со кылдӥз? Ма бордысен ваньмыз кутскиз? 2010-тӥарын Шагирт клубе Гожанысь жингыртӥзы: «Вӧй келян» празднике вазизы. Ужрадэ ӧтемзы сярысь тодмо нылкышноослы верай. Озьы празднике мыныны люкась­кимы: Анна Галяутдинова, Елизавета Тухватова, Свет­лана Ахматова, Любовь Сади­ева, Антонида Милиахматова, Татьяна Гильзатова, Ракия Кафисова, Дания Шайкылова но мон. Клубын ужасьёс пӧлын мон огнам удмурт бере, монэ ик ансамблен кивалтӥсе но бырйизы. Озьы кылдӥз «Ин­вожомы». Кӧня ке дыр орт­чыса ансамбле вуизы Римма Михайлова, Анна Аллоярова, Елена Глухова но Людмила Гильзатова.

Вить ар – трос ӧвӧл, со дыре ик ӧжыт но ӧвӧл кадь. Со куспын ми, инвожоос, пӧртэм ужрадъёсы вуылӥм ни: Уд­мурт Элькунын ортчись «Ча­кара. Древние напевы удмур­тов» фестивальын кык пол луим, Екатеринбургын радъ­яськем «Выжы кыл» фестива­ле но пыриським, ньыль пол Уинскоеысь «Медовый Спас» ужрадын шулдыръяським. Отын милемыз «Бурановские бабушки» ансамблен ӵошато.

Вераны кулэ, ёрос ужрадъ­ёсы но ансамбльмы азинлыко пыриське. 2013-тӥарын вете­ранъёслэн огазеяськонъёс­сы пӧлын радъяськем ёрос конкурсын кыкетӥинтылы кузё луим. Гуртысь культу­ра юртамы ортчись одӥгез ужрад но «Инвожотэк» уг ортчы. Берло дыре ансамбле нылпиос но пыриськыны кут­скизы. Юбилеймылы сӥзем концертын нырысетӥклассын дышетскисьёс Милена Гиль­затова но Есения Ракимова «Пипу куар» кырӟанзэс кузь­мазы. Шумпотымон, азьпалан песянайёслэсь кутскем ужзэс азинтӥсьёс одно ик луозы.

«Инвожоез» ӟечкыланы бускельёсмы – Гожанысь «Пи­нал сюлэм», Киргаысь «Уӵы» ансамбльёс – вуизы, шулды­ресь кырӟанъёссэс кузьмазы. Озьы ик ӟечкылан кылъёсын вазиськизы Шагирт гурт посе­ленилэн администрациеныз кивалтӥсь В. Ф. Муллаяров но Куеда ёросысь удмурт огазеяськонэн кивалтӥсь С. И. Гадиятов.

Юбилейез радъяны юрттэт возьматэмзы понна тау кылъёсмес вераськом гуртысь культура юртысь ӧнерчиослы: Е. К. Гайолова­лы, Р. Г. Шайхетдиновалы, «Рябинушка» ансамбльлы (кивалтӥсез К. В. Кокорина). Озьы ик бадӟым тау Шагирт гурт поселенилэн админи­страциезлы, «Шагиртский КДЦ» МБУ-лэн директорезлы З. Р. Дроздовлы.

Евелина ЖДАНОВА,

«Инвожо» ансамблен кивалтӥсь.