«Кышкыт суредъёс – син азям, ыбылэм куара – пель сьӧрам»

- Ӟечесь, пырелэ, - ӧссэ усьтыса пумитаз монэ пичи пияш.

Корреспондент луэмме верай гинэ но, кышномурт бамзэ киосыныз ӵоктаса бӧрдыны кутскиз.

- Эн бӧрды, ӵужай. Чи­датскы, ваньмыз умой луоз, - буйгатэ сое бадӟым внукез, Дима. Нош пичиез, кык аресъ­ем Лёва, бордаз ӝиптӥське, со но ӵужайезлэсь кайгу­зэ валаса, буйгатыны выре, лэся. Арлыдо кышномурт пи­чильтыкъёсыз шоры учкыса пальпотыны тырше ке но, уг быгаты, синвуосыз быльыра­са васько бам кузяз.

- Дима, тыныд татын кельше-а? Бертэмед уг поты-а? - юасько школае да­сяськись пияшлэсь.

- Бертэме туж потэ, но… отын ыбылӥсько ук. Война, - мӧзмыт синъёсыныз шорам учкыса вера со.

- Донецке мынам нылы, пие кузпалыныз но нуныеныз кылизы, - мырдэм вера Сауия апай.

Кызьы со уз бӧрды, 28 ар ӵоже со сюлмыныз но лулы­ныз Донецкен герӟаськемын ни вал. Отын солэн ас­лаз юртэз вал. Али сое но пуштытӥллям ини.

Сауия апай Улысь Балтач вӧзысь Дубовкаын вордскыса будэм. Дас куать аресаз со гуртэз­лэсь палэнэ кош­кем. Нырысь Ка­захстанын улэм. Собере улон сюре­сэз сое Украинае вуттэм.

- Пересьмыса, мар адӟыны гож­тэм вылэм. Ноку уг малпаськы вал войналэсь курыт шӧмзэ веръяло шуыса. Адӟонлэсь уд пегӟы, лэся. Бадӟым тау миле­мыз шуныт пуми­тамзы понна ёрос но гурт кивал­тэтлы, туганъёсылы. Маин быгато, юрттыны тыршо. Азьпалан мар луоз – тодмо ӧвӧл. Танялэн татын улэмез уг поты. Война дугдӥз ке, одно ик вордскем палъёсы берто шуэ. Нош мон? Ачим мар карыны, мар малпаны ик паймисько. Донецкын адӟем кышкыт, вирен сураськем суредъёс уй-нунал син азям уло, ыбылэм куара – пель сьӧрам. Ми автовокзалэн аэропорт куспысь районын улӥськом вал. Самолётъ­ёс, вертолётъёс дугдытэк йыр вадьсын лобало, котыр сьӧд ӵынэн зӥбемын, юртъёс огез бӧрсьы мукетыз гомаса ӝуало. Кышкыт, туж кыш­кыт. Пӧсь куазен гудыртыса, ӵашйыса чилектэм выллем со. 31-тӥпӧсьтолэзе лумбыт гуын пуки, ӧжытлы но ӧз чалмытске снаряд куараос. Собере ини валатски, палэ­нэ кошконо шуыса. Ӝыны ар Крымысь туклячиос дорын улӥмы. Выль ар азьын берен Донецке бертӥм. Коркамы ӝыныя куажгамын, отын улыны уг луы ни вал, соин огдырлы квартира утчамы. Куинь-ньыль нунал гинэ улӥмы отын, подъездэ мина усиз. Укно пиялаос пырдыса котыре пазьгиськизы. Кызьы отын улод на? Нылпиос жаль, соин татчы бертоно карись­ким. Лёва пичи ке но вал, ваньзэ тодэ, али но инмысь самолёт адӟе ке, кышкаса ватске, - вера Сауия апай.

Сауия апайлэн нылыныз, Таняен, вераськыны ӧз кыл­ды: со уж муген Уфае мынэм вал.

Миляуша БУЛАТОВА.