Тулыс нунал ӝегамез уг яраты

Татышлы ёросысь «Рассвет» СПК-ын но нянь будэтӥсьёс корт валъёссэс «эмъян» бордын мыло-кыдо тыршо. Татысь гаражын но, аз­барын но уж пӧзе. Лудэ потэм­лэсь азьвыл ваньзэ рос-прос тупатъяно-дасяно. Угось ту­лыс нунал ӝегамез уг яраты. Ю тысез муэ пыртонэз дыраз йылпумъяно. Хозяйствоысь механизаторъёс со сярысь ӟеч тодо. Кема аръёс ӵоже тыршем Владимир Зидыма­ков, Геннадий Гайнияров, Да­нил Нурисламов но мукетъёс оскем ужзэс толалтэ но, гу­жем но лулысь-сюлмысь бы­дэсто. Бадӟым опыто механи­заторъёсын ӵош вамышъяны тырше хозяйствоысь тужгес егитэз ужась Владислав Ра­химов но. Тупатъяськон ужзэс огъя кужымен соос нырысетӥ оштолэзе йылпумъязы.

Хозяйство асьсэлэсь да­сям кидыссэс уже кутоз. Татысь валтӥсь агрономлэн Андрей Шайхуллинлэн вера­мезъя, таяз арын соос тысё культураос пӧлысь тужгес трос кизёзы чабей. Со одӥг сюрс гектаре пыртэмын луоз. Нош сезьылы 640 гектар висъяськоз, йыдылы - 310 гектар. Пудоосты сюдон вы­лысь 700 гектаре пӧртэм культураослэсь (кумбагыш, чабей, вика, кӧжы, ӟег) ки­дысъёссэс муэ пыртозы. Со сяна, 400 гектаре кукуруза кизьыны чакламын, 60 гекта­ре -тари. Толйись ӟег 500 гек­тарын ӝужалоз. Сое но трос аръем турынэз подкормка лэсьтыны аммиачной сели­траез, нош мукет будосъёсты кизьыкузы туковой суретэз уже кутозы.

Кизьыны но мускыт пыт­саны укмыс, муэз усыяны сизьым, музъемез небӟытыны кык агрегатъёс потозы. «Вань ужъёсмес умой быдэстӥм ке, кизёнмес 10-12 нуналскын йылпумъялом», - оскытӥз хозяйствоен кивалтӥсь Аль­берт Минлебаев.

Марина НИКОЛАЕВА.