icon_gotop
18+
autorisation
Войти | Регистрация
Время в Татышле
11:30
Четверг, 29 Июля
Рекламный баннер 990x90px top

Со сярысь киноос уськытыны луысал

2015-04-02

Дас ньыль арескын шко­лаез йылпумъяса, Гыльни­ясма апай колхозэ ужаны лыктэм. Соку со парсь фер­маын ужам. Ужзэ данъясь пӧртэм грамотаосыз трос. Ужын басьтэм вормонъёсыз понна сое Москвае но шутэт­скыны лэзьылӥллям.

- Одӥг адямилы дас ку­инь йыр парсь утёно луиз, котькуд парсьмылэн огъя 17 парсьпиез луоз вал. Ка­лык азьвыл кышкась луиз. Кивалтӥсьёслэсь кылзэс котьку кылзӥськыса ужа­мы. Ужлэн, гурт хозяйство­ын ужась калыклэн данэз бадӟым вал. Ваньзэ киын ке но лэсьтӥмы, секыт ужлы ноку ӝожтӥськыса ӧм улэ. Дырыз сыӵе вал, калык но азьвыл мукетгес луиз. Уж бордысь шудмес утчамы. Уж­лэн секытэз шоры учкытэк, коньдон сярысь малпаськы­тэк улӥмы. Нош али адями коньдон поттон сярысь сюл­маськегес. Туала улонлэн куронъёсыз но мукетэсь. Ми ужан дыръя парсь утён туж секыт ужен лыдъясь­киз. Ведраосы сиён тырыса карнанэн ӝутыса потталомы вал. Гужем вож сиён сётъямы. Чорыген, сисьмем грушаосын но сюдӥмы. Ваньзэ асьмеос киын ӝуткаса асьме кужымен лэсьтӥмы. Тазалык быриз, висёнъёс но пӧртэм сямен куасалтыны кутскизы. Озьы ке но ужам аръёсме секытэн уг малпаськы. Уж луыку адя­милы улыны капчи. Уж бордын улэмлэн дуныз но луэ. Ужаса адями шудзэ шедьтэ. Нош ужлы паймем адями улонын йыроме, – сюлмысь вераз Гыльниясма апай.

Кышномуртлэсь верам­зэ кылзӥськыса паймисько: гуртын улӥсь кышномуртлы макем трос чидано но вор­моно луэ. Нош верамъёсаз ӝожтӥськон но, ортчем аръ­ёсыз сярысь жалян мылкыд но ӧвӧл. Гыльниясма апай ужам аръёсыныз данъяське, ортчем нуналъёссэ ӟеч мыл­кыдын гинэ тодаз вае. Азь­выл поколениын улэмъёслэн кужымзы но чеберлыксы со бордын ик луэ. Гыльниясма апай али дыре Володя пиез­лэн семьяеныз улэ. Куинь пиналъёссэ будэтэм анай­муртлэн табере внучкаосыз но вань ини.

Егит дыръёсаз ужаса кыдам адямилэн азьланяз но пӧртэм секытлыкъёсын пумиськонэз вань вылэм. Гыльниясма апайлы пизэ ыштон, внукеныз люкиськон, кузпалызтэк улонзэ азьлань­тон кайгуос пыр потоно луэм. Озьы ке но кужмо кышномурт кайгуоссэ вормыны быгатэ.

- Улон адямиез ваньзэ чиданы дышетэ, - шуэ со, - синкыли пыр пальпотыны но.

Ирина САМИГУЛОВА.

Пермь шаерысь Куеда ёрос.

1698

Оставить сообщение:

НАШИ ПАРТНЕРЫ