Анай кылмы улон сюрес кузя валтэ

Школаосын дышетски­сьёс, дышетӥсьёс но анай-атайёс пӧлын туннэ анай кылэз дышетон ласянь пӧртэм малпанъёс кылдэ­мын. Кинъёс ке сое мултэ­сэн лыдъяло, нош кинъёс ке сюлмысь дышетысалзы. «Анай кылэз дышетоно. Со адямилы аслэсьтыз мал­панъёссэ усьтыны, сое ӟечгес валэктыны юрттэ», - вераз со пумысен Лутфулла Гайфул­лович. Кунолэсь кылъёссэ юнматыса, Улысь Балтач школаен кивалтӥсь Л. Л. Зи­дымаков вераськиз. Татысь дышетскон юртэ 2012-тӥарын ньыль арлы «Педаго­гические условия формиро­вания успешной личности в национальной (удмуртской) школе» опытно-эксперимен­тальной площадка усьтэмын вал. Отчы 8-9-тӥклассъёсын дышетскисьёс пырисько. Соослэсь быгатонлыкъёс­сэс волятон понна школа бордын пӧртэм кружокъёс ужало. Улысь Балтач школа­ысь пиналъёслэн анай кыл­зэс азинтонын вормонъёссы шӧдскымон. Соос, кылсярысь, арлы быдэ удмурт кылъя но литературая республика олимпиадаын, «Ӝужась кизи­лиос» конкурсын вормисьёс пӧлын луо. Озьы ке но, Л. Л. Зидымаковлэн верамезъя, азьланяз та выллем вор­монъёсын гинэ буйгатсконо ӧвӧл, азьпала вамыштыны тыршоно.

Татышлы ёросысь коть­куд удмурт школаысь дышетӥсь но соин кивалтӥсь таӵе мапанъёсын улэ, вылды. «Соос спортын но, предмет олимпиадаосын но кужымзэс ӟеч возьмато, республика ужрадъёсысь вормонъёсын бертыло», - шуиз ёросысь ды­шетонъя ёзэтэн кивалтӥсь А. М. Фарвазетдинов. «Анай кылъя предметъёс пиналъ­ёслы ӟуч кылъя огъя кун экзаменъёсы дасяськонын юрттэт мед луозы», - ватсаз со вераськонзэ азинтыса. Та нуналэ Адегам Магдано­вич ёросысь удмурт кылъя дышетӥсьёслэсь пиналъёс­лы ӟеч тодон-валан сётыны быгатэмзэс пусйиз. Озьы ке но соос понна азьланяз квалификацизэс будэтонъя курсъёс радъялляны тыршо­но. Нош коньдонэз но дырез шыръян понна, соосты ёро­сын ортчытоно. Та выллем курсъёсты татышлыос орт­чиллям ни. Нош янаулъёслы, кылсярысь, соос пыр потоно на. Со сяна, соосты, котькуд ёросысь дышетӥсьёсты ся­мен ик, мукетыз но паймытэ: школаосын удмурт кылъя но литературая книгаос уг тырмо. Но котырес ӝӧк сьӧрын валэктӥзы: тазэ но ужпумез быдэстыны, пе, луо­но. Со понна котькуд ёросысь дышетӥсьёслы тырмымтэ книгаоссэс басьтыны одӥг заявка дасяно. Берло соос «Удмуртия» книга поттон из­дательствое ыстэмын луозы. Заявкаосты БР-ысь удмур­тъёслэн историяя но куль­турая центразы яке «Ошмес» газетлэн редакцияз кутозы. «Ошмес» газет нылпиос­лэсь анай кылзэс волятонын бадӟым инты басьтэ. Но озьы ке но берло дыре шӧдӥське: нылпиос удмурт кылын ӧжыт гожъясько. Дышетскисьё­сты гожъяськонэн, чылкыт удмурт кылын эшъяськытон понна дышетӥсьёслы, оло, мургес ужано? Валче ужлэн гинэ емышъёсыз шӧдскымон луо угось.

Альфид ЗАЙНОКОВ.