Тулыс вуиз яркыт дӥсьёсын

Вуж Варяш музъем вы­лын туннэ толэз келяло, че­бер тулысэз пумитало. Тани пенсие потэм нылкышноос но куас вылэ султӥллям. Толлы тау карон кылъёссэс вераса, соос чылкыт азвесен пиштӥсь лымыетӥгылӟо. Ку­ать нылкышноос пӧлысь кин финише нырысетӥен вуоз? Ӝоггес бызиз Замфира Ха­санова. Сабира Набиевалэн, Раиса Набиевалэн, Раиса Антоновалэн, Фарида Рахим­зяновалэн, Евгения Шакир­зяновалэн но мылкыдзы ӧз куашка. Куас сюресын соос тазалыксэс юнматӥзы.

Анайёс, песяйёс, ӵужайёс бӧрсьы бызизы нылпиос. Куас сюрес вылын Шакирзя­новъёслэн семья командазы но туж шаплы адӟиськиз. Кыкетӥклассын дышет­скись Радмир уг бызьы, лобе, кожалод.

Нош табере куас сюрес вылын 60 ареслэсь бадӟым пиосмуртъёс. Та нуналэ соос арлыдзы сярысь но вунэтӥзы кадь. Касим Камалитдинов, Владимир Галиманов, Федор Галякберов, Фатих Низамут­динов пинал дырзэс тодазы вайыса сямен куас сюрес вылтӥ ширто.

Тол келянын куамын­лэсь трос адямиос куас вылэ султӥзы. Максим Хи­самутдинов, Яна но Рубен Мингараевъёс, Диана, Али­на, Денис Насибуллинъёс, Максим Галякберов, Тамара Низамутдинова Ярослав пиеныз, Юрий Шарафиев но мукетъёс тазалыко улонэн эшъяськемзэс возьматӥзы. Шӧдӥське, Вуж Варяш школа­ысь физкультурая дышетӥсь Леонид Багаутдинов ужзэ тодыса-валаса быдэстэ.

Клуб вӧзын трос ка­лык люкаськемын. Тулыс гуртэ лыктэ яркыт чебер дӥсьёсын, жингыр куарае­ныз, шуныт шунды тылсиен, кырӟанъёсын но кылбуръё­сын, пӧсь табанен, чайен… Кыкетӥклассын дышет­скись Юлия Асатова кырӟа-жингыртэ: «…Туж пичи на мон, ӝог будӥсько мон, анай­лэсь но атайлэсь бадӟым луо мон…»

Вуж Варяш гурт поселе­нилэн администрациеныз кивалтӥсь Миншакир Шайс­ламович Шаритдинов но культура удысын ужасьёс куинетӥарзэ ни таӵе бадӟым праздникез ортчытъяло. Туэ отчы 300-400 адями - гурт калык но куноос – люкась­кизы.

Галина АЛЕКСЕЕВА.

Янаул ёрос.