icon_gotop
18+
autorisation
Войти | Регистрация
Время в Татышле
14:31
Вторник, 19 Октября
Рекламный баннер 990x90px top

Вань сыӵе уж – Танып шурез мертан

2015-03-12

Танып мертан удысын Ал­тауысь Шаймардановъёслэн династизы тыршем шуи ке но, уг янгыша, дыр. Туннэ нуналэ но татын соослэн выжыысь­тызы ик Маргарита Шуварова ужа. Быръем ужаз со 1988-тӥ арысен тырше. Кышномуртлы Алиса нылыз юрттӥське.

- Мон анайлэсь, атайлэсь ужзэс азьланьтӥсько, - вера Маргарита Шайхаттаровна. – Ми тямыс нылпи будӥмы. Ваньмы ик Танып мертан удысэз пыр потӥмы, шуыны луоз. Нырысь анай ужаз. Ӵем дыръя со уг вутӥськы вал уж дураз мыныны, солэсь ужзэ атай быдэсъяз. Берло ини ми, нылпиоссы.

Котькуд нунал, ӵукна но ӝыт тямыс часэ, танып мер­тасьёс шур дуре васькыло: ву­лэсь мурдалазэ эскеро. Мар­гарита апайлэн верамезъя, тулыс ужзы, пе, йылэ: нуналаз куинь-ньыль пол васькатэк уг луы. Вулэсь ӝутскемзэ сантиметрен мертано, пе. Южтолэзьысен коньывуонозь вулэсь чылкытлыксэ но, пе, эскероно.

- Азьло аръёсын ӵошатоно ке, берло уж капчияз. Анай-атай­ёс ужаку лы­мылэсь мур­далазэ но, зорлэсь, лы­мылэсь суткаяз кӧня усемзэ, лымылэсь плотностьсэ но мертало вал. Химанализ но лэсьтылӥзы, - вера кышномурт.

Таныпез эскерисьёслэн чакламзыя, шур тужгес пась­кыт ӧръяськем 1943-тӥ арын тулыс тудву вакытэ. Берло аръёсы Таныплэн вуэз трос­лы кулэсмем.

- 2010-2012-тӥаръёсы, гужемъёс кӧс луэмен, Таны­плэн вуэз син азьын кулэс­миз. Кызь сизьым ар ӵоже ужатозям сыӵеез адӟеме ӧвӧл. Соку толалтэ йӧлэн зӧкталаез но паймымон вал: 1 метрлы матэ. Вить ар пала ини тулыс Танып ярезлэсь вылӥе уг ӝутӥськы ни. Лымы но азьло мында ӧвӧл. Соин шурын ву ӧжыт, - валэктэ Маргарита апай.

Кема аръёс ӵоже та уды­сын тыршем М. Ш. Шуварова лэн Данъян грамотаосыз но трос. Соос пӧлысь тужгес бадӟымез – 2008-тӥ арын РФ-ысь гидрометеорологияя но котыр улосэз эскеронъя федерал службалэн Данъян грамотаез.

- Туэ йӧлэн зӧкталаез 60 сантиметрлы ӵоша. Эскерон ужъёсты быдэстон понна, шурез котькуд кык метрлы быдэ корано луиськом, коты­рак одӥг метр пасьта карыса усьтӥськом. Йӧ коранэз капчи ӧвӧл, тӥрен, ломен пайдаясь­киськом, - вера Алиса.

Танып дуре Маргарита апайен Алиса ӵем дыръя ӵошен ветло: толалтэ - ку­асэн, гужем – пыдын. Дышем ужзэс соос тодыса, пыр-поч быдэсъяло.

Миляуша НИГАМАТУЛЛИНА.

Бурай ёрос.

2484

Оставить сообщение:

НАШИ ПАРТНЕРЫ