Яратоно уж мылкыдэз ӝутэ

Сяська магазинъёслэн кузёзы, котькуд праздникъ­ёсыз, шулдыръяськонъёсыз чебермась, калыклы чебер­лык но шумпотон ӵектӥсь ужбергатӥсь Вероника Бело­валэн нимыз тросэзлы тодмо. Калыклэн верамысьтыз ик валаны луэ та нылкышнолэн лякыт сямо но капчи мылкы­до луэмез сярысь.

Вероника Владимировна востэм, зӥбыт, трос верась­кисьтэм кышномурт. Кема аръёс ӵоже ужбергатӥсь луыса ужа ке но, солэн вылтӥяськон сямыз ӧвӧл: котькинэн вераське, кенеше, дэмланъёс сётэ. Соин ик, дыр, басьяськисьёс но котьку магазин тыр луо. Мон паймы­са чакласько, кызьы умой адямиос лякыт сямынызы но пуш чеберлыкенызы коты­рысьтызы калыкез небытгес каро. Вероника Владимировна вӧзын урод адямиос но шуна­ло, небӟо, котькудӥзлэн ассэ умоен возьматэмез потыны кутске. Ужбергатӥсь туж трос лыдӟиське, сяськаосты яратэм сяна, со психологияя книгаосын тунсыкъяське на.

Вероника Владимировна Ижкарын вордскемын, вы­жыосыз нош - Янаул ёросысь Вот. Ошья гуртысь. Пичи ды­рысеныз ик тунсыкъяськем кырӟан но крезьгур удысэн.

Шор ёзо школаын дышет­скыкуз, нылаш музыка пред­метъя дышетӥсьлэн ужез сярысь ӵемгес малпаськы­ны кутскем. Чеберлыкез гажан мылкыдыз Верони­ка Владимировнаез Каза­ньысь пединститутэ вуттӥз, музыкальной факультетэ. Институтэз йылпумъяса, Вероника Владимировна 15 ар ӵоже Янаулысь нылпи са­дын крезьгуръя кивалтӥсь луыса ужа. Тытын мылысь-кыдысь тыршыса ужамезлы вылӥкатегория сётӥллям.

Аръёс ортчыса, егит ӧнерчи выль сюрес вылэ вамыштон сярысь малпась­кыны кутске, ассэ мукет удысын но шараяны малпа. Крезьгур дуннеен эшъяське­мез, чеберлыкез данъямез ик инъет луиллям, лэся, удмурт нылкышнолы сяська удысэн герӟаськыны.

«Мон ноку уг быгаты сурен, виноен вузкарыны, - шуэ Вероника Владими­ровна, - тодӥсько ке но со коньдон ласянь туж пайдаё удыс шуыса. Мынам калы­клы шумпотон, чеберлык кузьмаме потэ. Ачим но уг эшъяськиськы тазалыклы изъян ваись макеосын».

Тани тямыс ар ӵоже егит нылкышно ужбергато­нын тырше. Туннэ нуналэ со тямыс адямилы уж ин­тыен юрттэ. Беловъёслэн азбаразы теплица ӝутэмын. Отын кык нылкышноос ужа­ло. Соос коркан но садын будӥсь сяськаосты будэто. Быдэс тол ӵоже татын вож сугон будэто. Берло соосты Нефтекамскысь магазинъё­сы келяло.

Семьяяз Вероника Вла­димировна - лякыт, умой, котьку юрттыны дась лу­ись анай но гажано кузпал. Кузпалыз Рудольф Борисо­вич, кышномуртлэн вера­мезъя, тужгес матысь эшез, юрттӥськисез, кенешчиез но бур киез луэ. Кузпалзэ ушъяса, Вероника Владими­ровна вера: «Вань ужмес ми ваче кенешыса радъяськом, со монэ котьку вылӥе ӝутэ, огнам мон та ужме нуыны ӧй вормысал».

Кузпалъёс кык пинал будэтӥзы. Бадӟымез Роман пизы Казаньын дышетске. Со - вуоно архитектор. Ро­манлэн киосыныз Янаулысь Азина урамлэн одӥгаз юр­тъераз нырысетӥез графика быдэстэмын. Отын кияз подносэн чак-чак ваись бигер дӥськутэн нылмурт возьматэмын. Кыкетӥез Ро­берт пизы Янаулысь шор ёзо школаын 8-тӥ классын дышетске.

Куддыр паймоно, кызьы меда та кышномурт сыӵе ужын но котьку зӥбыт, «па­зяськисьтэм» луыны быга­тэ? Вероника Владимировна шуэ: «Калыкен тупаса улон котькуд керетон-вожвылъ­яськонэз палэнтыны юрт­тэ. Монэ но улон дышетӥз котькуд адямиез валаны, калыкен тупаса улыны. Ужан интыям но котькинэн одӥг кыл шедьтыны тыршись­ко, секыт югдур кылдэ ке (сыӵеез но ужын луылэ), сое нокинэ вӧсь карытэк быдэ­стыны тыршисько».

Калыкен чаляк кусып тупатыны ке но быгатэ, эшъёс ласянь со туж бы­рйиськись, чакласькись адями. Уг яраты пќяськись, вылтӥяськись, ушъяськись адямиосты. Синазькыль каре азьтэм но мурт визь­мын улӥсьёсты, суп-сап ужа­сьёсты. Котькинэ ачиз кадь ик ужасен адӟемез потэ. «Котькуд адями аслыз ачиз улон сюрес быръе, - шуэ Вероника Белова. - Ачид мылкыд карид ке, кужымдэ но дырдэ жалятэк тыршид ке, соку гинэ уж емышед удалтоз».

Валентина БАЙТИМИРОВА,

Янаул ёрос библиотека­ысь методической ёзэтэн кивалтӥсь.