«Армиын шунды но вазь ӝужа вылэм»

- Солдат улонэдлэн нырысетӥ нуналъёсаз арми сярысь кыӵе малпанъёсыд кылдӥзы?

- Монэ армие 2014-тӥ арысь 18-тӥ инвожое басьтӥзы. Собере вить ну­нал ортчыса, Ульяновск городысь учебной центре вуи. Вордскем шаерелэсь палэнын улон нырысетӥ ну­налъёсы секытэн сётӥськиз. Татын ваньмызлы выльысь дышетсконо луиз. Сиён ла­сянь гинэ но бадӟымесь воштӥськонъёс шӧдӥськизы. Со сяна, котырысьтыд выль адямиосын ӟеч кусып тупа­тон сярысь малпаськоно вал. Армиын анай-атайлэсь, эшъ­ёслэсь, дорлэсь дунзэс ӟеч валаськод вылэм. Нырысь котькуд ӵукна соос сярысь малпанэн кутскылӥз. Вераны кулэ, армиын шунды но туж вазь ӝужа вылэм (серекъя). Татын туж вазь сайкато. Нош берло ваньмызлы дышись­киз, солдатлы казарма но шуныт потыны кутске. Туннэ службаме Армениысь Гюмри городысь 102-тӥ военной ба­заын нуисько. Солдат улонэ пумысен ӝожтӥськонъёсы ӧвӧл, ваньмыз аслаз радлы­кезъя мынэ.

- Армие мыныны ачид мылкыд карид яке кызьы шуо, «по призыву» басьтӥзы?

- Армие мынонлэсь палэнтӥськон сярысь мон ноку ӧй мал­паськылы. Та­залык пумы­сен но ӝожтӥськонъёс ӧй вал. Со сяна, кыкез ик агайёсы армиын кы­дамын. Школаез йылпумъям бере Пермь шаерысь Чернуш­ка городысь политехниче­ской коллеждын «Разработка и эксплуатация нефтяных и газовых месторождений» ӧръя тодон-валан басьтӥ. Уже интыяськон пумысен но шуг-секытъёс ӧй кылдысал­зы, дыр. Но, малпасько, вань­мызлэн аслаз дырыз. Армия егит пиосты юнгес, кужмогес каре, асьсэлэн кужымзылы оскон пыӵатэ.

- Агайёсыд, эшъёсыд арми улон сярысь тыныд трос вера­зы, дыр. Быдэсмизы-а соослэн кылъёссы?

- Арми улон сярысь мон зэмзэ ик трос кылэмын вал ни. Уродзэ но, ӟечсэ но ӧжыт ӧз вералэ. Нош табере сое ваньзэ ас вылам шӧдӥсько ни. Соин куддыр соослэн кылъёссылы но осконо луэ. Эшъёсы армиын изьыны ӧжыт дыр висъямзы сярысь трос­гес вераллязы. Со сяна, со­ослы печення-пряник, кампет ӧжыт шедьылэм. Нош тужгес секытэз луэм доразы пыжем-пӧзьтэм сиёнъёслэсь мӧзмон.

- Вуоно солдатъёслы мар верасалыд?

- Армилэсь медаз кышка­лэ. Отын нырысетӥ нуналъ­ёсы гинэ секыт. Тазалыкед, чиданэд ке луиз, ваньзэ вор­мыны луэ. Одӥг ар сокем трос дыр ӧвӧл. Нош со сярысь мал­панъёс олокӧня аръёс ӵоже тодэ ваёнъёсын утиськозы.

- Туннэ трос верало Укра­инаын кылдэм кышкыт югдур пумысен. Та выллем ож тылӝу кылдӥз ке, тон дась-а тушмон пумитэ султыны?

- Война туж кышкыт су­редэн мынам син азям пуксе. Озьы ке но мон котьку дась шаермес тушмонлэсь утьыны, шудо улонмы понна нюръясь­кыны.

- Озьыен, Шаермес ути­сьёслэн нуналэнызы тонэ, солдат!

- Тӥледыз но, газетэз лыдӟись вань нылкышноо­сты сямен ик, вуоно Тулыс праздникен ӟечкыласько. Вӧзады котьку мед луозы зэмос пиосмуртъёс.

Вераськиз

Ольга НИГАМАТУЛЛИНА.