Нылпиос книгаен мед эшъяськозы

Литературалэн арез улсын таяз арын шаерамы пӧртэм ужрадъёс ортчылозы. Озьы 5-тӥтулыспалэ дышетскон юртъёсын «Единый урок ли­тературы» радъязы. Та нуналэ Татышлы ёросысь Кызыл-Яр школаын урокъёс расписаниын сямен ик радъяськизы. Озьы ке но соос пӧлысь котькудӥз литератураен герӟаськемын вал. Нырысетӥно куинетӥклассъёсын дышетскисьёс доры, кылсярысь, матема­тикая уроказы (дышетӥсьсы В. В. Рафикова) выжыкылысь геройёс вуылӥзы. Пиналъ­ёс Незнайкаез, Буратиноез, Красная шапочкаез лыдъ­яськыны, пӧртэм задачаосты ужаны дышетӥзы. Нош кыкетӥно ньылетӥклассъёсын ды­шетскисьёслэн дышетӥсьсы З. А. Шаймарданова пиналъ­ёсызлэсь визьзэс «Умники и умницы» шудонын эскерыны малпам. Нылпиос Пушкинлэсь, Никитинлэсь, Суриковлэсь, Бартолэсь, Маршаклэсь, Чу­ковскийлэсь чуръёссэс ӟеч тодэмзэс возьматӥзы.

Та нуналэ котькудӥз урок литератураен герӟаськемын вал. Билогияя урокын, кыл­сярысь, тямысэтӥклассысь нылпиослы дышетӥсьсы Ю. В. Губаев «Литература и здоро­вье» викторина ортчытӥз. Нош англи урокын (дышетӥсь М. А. Шаймарданова) дышетскисьёс ӟуч гожъясьёслэсь ужъёссэс англи кылэ берыктон бордын тыршизы. Витетӥклассын дышетскисьёс математикая уроксэс кема ӵоже уз вунэтэ, дыр. Соос пӧртэм задачаосты ужаса Пушкинлэсь но Лер­монтовлэсь, Тургеневлэсь но Чеховлэсь биографиоссэс но творчествозэс тодазы ваизы. Оскем потэ, дышетӥсьёслэн та нуналэ тыршемзы юнме уз луы. Урокъёс дышетскисьё­сты чеберлыко литератураен эшъяськытозы.

Туала вакытэ лыдӟиськон пиналъёслэн улоназы туж пичи инты басьтэ. Азьвыл асьмеос тужгес лыдӟиськись шаерен лыдъяськимы, нош туннэ та ласянь югдур чылкак воштӥськемын. Пиналъёс кни­галэсь палэнтӥсько. Мар каро­но югдурез тупатон понна? Та выллем юанлы анай-атайёс, нылпи садъёсысь воспита­тельёс, дышетӥсьёс ӵошен ужаса гинэ валэктон сётыны быгатозы.

Эльвира ГИЛЬМАНШИНА,

Татышлы ёросысь Кызыл-Яр школаысь дышетӥсь.