Хозяйствоос паймемын
Республикаысь котькудӥз гурт хозяйство воштӥськонъёсты ас вылаз шӧдоз. Уго бусы ужъёсты быдэстон 30 процентлы дуноялоз. Солэн мугез котькинлы валамон: удобрениослэн, техникалэн но та ужын кулэ луись арбериослэн дунъёссы йылэмын. Кизён ужъёсты быдэстыны Башкортостанлы огъя 6 млрд 750 миллион манет коньдон кулэ луоз.
«Кун юрттэт ке ӧз луы, тросэз ӟеч возиськись хозяйствоос но сое уз ворме», - вера республикаысь гурт хозяйствоя министр Николай Коваленко.
Бюджетысь висъялозы
Шуг-секытъёсын сэрен, республикаысь бусыос уз куштӥське. Солэн котькуд гектараз ю тысь пыртозы. Зэм, со понна туэ мултэсгес пӧсяно луоз. Соин, вылды, гурт калык аслаз кужмызлы осконэн ӵошен кунмылэсь юрттэтсэ но возьма.
Кунмы бусы ужасьёсты огназэс уз кельты – соослы пӧртэм субсидиос висъяськозы. Кизьыны кидыс басьтон понна, кылсярысь, ватсаса 180 млн манет субсидия сётӥськоз. Гурт хозяйствоя министерстволэн лыдпусъёсызъя, республика туннэ 30 сюрс тонна кидыслы кулэяське. Коньдон ласянь шуг-секытъёс кылдэмен, йӧллы 160 миллион манет тыр субсидиез но нырысетӥкварталын ик сётыны чакламын. Кылем арын сое кыкетӥкварталын гинэ висъяллязы. Бусы ужъёсын валче мукет проектъёс вунэтэмын уз луэ. 2015-тӥарын, кылсярысь, «500 ферм» программаез азинтонлы 210 миллион манет коньдон сётӥськоз.
Вуж техника но мултэс ӧвӧл
Башкортостанысь Гурт хозяйствоя министерстволэн лыдпусъёсызъя, ньыль ар куспын республикае 15,5 млрд манет тыр 13 сюрс техника басьтэмын. Гостехнадзоръя инспекциен кивалтӥсьлэн Ринат Галимовлэн верамезъя, республикаысь тракторъёслэн «арессы» туннэ шор лыдын 15,8 арлы ӵоша, ю тысь октон комбайнъёслэн – 11,7-лы, пудо сиён октон комбайнъёслэн - 9,1-лы. Таяз арын республикаын бюджет коньдонэн басьтэм техникаосты эскерон борды сак басьтӥськозы. Трактор-комбайнъёслы запчасть дасян сярысь но республикаын ик сюлмаськозы. Соос кунгож сьӧрын поттэмезлэсь номырин уз висъяське.
Тулыс бусы ужъёсы огъя 13700-лэсь трос тракторъёс потозы. Соосты та ӟырдыт вакытэ ӟеч дасяны ке быгатӥзы, кизён 10-15 нунал куспын йылпумъяськоз. Соин туннэ вуж техникаосты но ужлэсь палэнтыны дыртоно ӧвӧл. Уго бусы тракторъёсты вужезлы яке вылезлы уг висъя: котькуд гектараз ю тысь гинэ пыртэмын мед луоз.
Дасяз Ольга НИГАМАТУЛЛИНА.
Перепечатка материалов – с разрешения редакции. Мнения авторов и редакции могут не совпадать.
Все рекламируемые товары и услуги подлежат сертификации и лицензированию.За достоверность рекламы ответственность несёт рекламодатель.
E-mail: info@gazeta-oshmes.ru
Оставить сообщение: