Кын корт но чигиське, адямилы чидано

- Туж секытэн улэме но туж шудо луэме сярысь вераны кутски ке, газетады гожтыса но уз быры. Улон монэ пӧртэм сямен эскериз, сизьым полэс чиданме сю полэс позыръяз.

Гыльсафа песянай бадӟым семьяын вордӥськем. Со ку­ать нылпиос пӧлысь кыкто нылъёслэн палыз луэм. Пичи дыръязы ик нылпиоссэ но кузпалзэ кельтыса, атайзы палэнэ кошкем. Анайзы куать нылпиосыныз огназ кылем. Секыт аръёсы апаез, агайёсыз улонысь кошкиллям. Гыльса­фа песянай нылпиос пӧлысь огназ гинэ улэп кылем. Анае­ныз туж секыт улӥллям, еги­тысен ужаны кутсконо луэм. Со кунян утем, ыж фермаын ужам. Гыльсафа песянай уж дураз бадӟымесь вормонъёс басьтылэм. Сюлмысь ужаны дышем кышномуртэз пӧртэм собраниосын но ушъяса ве­раллям. Одӥгаз аре сое кызь нуналлы турпутёвкаен Азиысь городъёсты адӟыны келял­лям. Озьы со Бухара, Ташкент, Алма-Ата но трос со выллем городъёсты адӟыса бертэм. Ас улоназ Гыльсафа песянай трос ӟечсэ но трос уродзэ адӟем. Семья кылдытыса улы­ны кутскем гинэ, вить толэзь пиеныз кельтыса, кузпалыз се­мьяысьтыз кошкем. Гыльсафа песянай пичи пизэ огназ будэ­тоно луэм. Азьланяз Гыльсафа песянаез нош ик секыт адӟон возьма: Владислав пиез, семья кылдытыса, куинь пиналъёссэ кельтыса, ньыльдон куать аресаз улонысь шуак кошке. Кышномурт чигиське, бӧрдэ, нош улонзэ азьланьтыны Лена кенэз но внукъёсыз юртто.

- Нылпи анаймуртлэсь вазь кошкыны кулэ ӧвӧл, ас нылпидэ ыштон анаймурт понна бадӟым кайгу луэ. Вор­монтэм вӧсез кулытозь нул­лоно луиське. Яра али огнам ӧвӧл, вӧзам матысь адямиосы вань. Вӧсьме Лена кенэным шори люкимы, ог-огмес валаса улӥськомы. Трос адӟонъёс, секытлыкъёс пыр потоно ке но луи, Инмарлы вазиськись­ко, Лена но Ирина кенъёсы, внукъёсы вань шуыса тау шу­исько. Туннэ нуналъёсы мон туж шудо адями. Пие улонысь вазь кошкиз ке но, огнам луэмме ноку ӧй шӧды. Ныл­пиосы монэ ноку палэнэ уг каро, вӧзам «биниськыса» уло. Арсений внуке выль юрт пуктӥз, татын ваньмы ӵошен улӥськомы. Лена кенэным ми 43 ар џошен улӥськомы ини. Арсений внукмылэн Ири­на кузпалыз но туж матысь адӟе, ӟеч вазиське. Али дыре егитъёс анай-атаен улон­лэсь палэнскыны тыршо, одӥг коркан улонлэсь кышкало. Мынам кенъёсы аслам нылъ­ёсы кадь луо, соос мыным туж матын. Вордӥськем ды­рысеным пӧртэм кайгуосты ке но адӟоно луи, туннэ мон асме шудоен лыдъясько. Тау кенъёсылы, внукъёсылы но внучкаосылы. Соос луэмен мон улонме азьланьтӥсько. Шыпыт пересьмон нуналъёс­ме матысь адямиосы шунто, улонам пичи дырысеным агай­ёстэк, апайёстэк огнам ке но кыли, туннэ мон туж узыр адями, – синвуаськыса вераз Гыльсафа песянай.

Улон – вакчи гинэ кыл. Нош кӧня отын капчиез но секытэз, шумпотонэз но чигиськыса бӧрдонэз.

Котькуд адямилэн аслаз адӟонэз, шуо калыкын. Туннэ Гыльсафа песянай кадь кыш­номуртъёс сярысь киноос уськытыны луэ. Кема ӧвӧл гур­тазы гажамон адями, яратоно анаймурт но песянай 85 арессэ пусйиз. Яратоно адямизэс ӟечкыланы ӵыжы-выжыоссы, внукъёсыз но внучкаосыз олокӧня пол люкаськылӥзы. Шулдыр выль юртазы шуныт ӟечкылан кылъёс, сюлмысь кырӟан гуръёс трос чузъясь­кизы. Гыльсафа песянай - туж узыр адями. Солэн кык гажано кенъёсыз,одӥг внучкаез, кык внукъёсыз, куать правнукъ­ёсыз.

Улон сюрессэ ужаса орт­чытэм, котькыӵе секытлыкъ­ёсты вормыны быгатэм кыш­номуртлэн улонэз учкымон пӧрмемын. Туннэ соос семья­язы ньыль поколение уло. Гурт калык но Гыльсафа песянаез гажа, семьяязы но татулык ку­зёяське. Арлыдо адями понна солэсь но бадӟым шуд вань на меда? Гыльсафа песянайлэн нюромем синъёсыз шоры уч­кыса валано: талэсь бадӟым шуд ӧвӧл ни. Келяськыса до­рысьтызы потыку, Гыльсафа песянай ватсаса вераз на:

- Нылы, дугды ай, гожты газетад егитъёс анай-атайзэс котьку гажаны мед быгатозы шуыса. Анай-атай бордын ук адямилэн та улонэ вамышез. Анай-атайёс но вордэм ныл­пиоссэс будэтыны ӟеч кужым мед шедьтозы.

Гыльсафа песянайлэсь ве­рамъёссэ кылыса ачим но син­кылиосме кутыны ӧй быгаты.

Тау тыныд, ӟеч адями, ӟеч кылъёсыд понна. Быдэс семьядылы бадӟым шуд но юн тазалык. Гуртъёсамы трос мед луозы Киргаысь Идия­туллинъёслэн кадь чебересь семьяос.

Ирина САМИГУЛОВА.

Пермь шаер.