«Сьӧрады ӧсъёсты пытсаны эн дыртэ…»

Фестиваль-конкурслэн гала-концертаз учкисьёс котькуд кырӟась-эктӥсез шумпотыса пумитазы. Уго та нуналэ соос азьын республи­каысьтымы но солэн палэ­нысьтыз трос выль кизилиос ӝуатскизы. Фестивале Уфа, Дюртюли, Благовещенск, Москва улосвылысь Дубна городъёсысь но Башкор­тостанысь пӧртэм ёросъё­сысь кырӟасьёс, эктӥсьёс но крезьгурчиос пыриськизы. Татышлы ёросысь Арибаш гуртысь В. Ф. Шарифьяно­вен кивалтоно «Кордон» ан­самбль но учкисьёслы шул­дыр кырӟанъёссэ кисьтӥз. Та нуналэ котькуд кырӟась-эктӥсь залын пукисьёслэсь шунытсэс шӧдӥз. Учкисьёс валаса ик ӧз вуттэ, лэся, дыр вуиз вормисьёсты шараяны.

Вормисьёсты ӟечкыланы сцена вылэ ӧтизы дуно куно­осты – Башкортостан Респу­бликалэн тӧроезлэн админи­страциеныз кивалтӥсьлэсь воштӥсьсэ М. В. Михайло­вез, республикаысьтымы культурая министрез А. И. Шафиковаез, Бирск ёрос ад­министрациен кивалтӥсез Н. А. Хорошиловез. Максим Вла­димирович Михайлов респу­бликалэн тӧроезлэсь Рустэм Хамитовлэсь ӟечкылан гож­тэтсэ лыдӟиз. Отын шуэмын:

- «Крещенские морозы» фестиваль республикаысь­тымы пӧртэм калык культу­раосты азинтыны юрттэ. Со пинал артистъёслы сцена вылын асьсэды шӧдыны ды­шетэ, лулчеберетмес узыр­мытэ.

Республикамылэн куль­турая министрез но пусйиз: «Та выллем конкурсъёс кырӟасьёслы-эктӥсьёслы асьсэлэн быгатонлыксылы оскон пыӵато. Нош городъё­сысь но гуртъёсысь сценаос со ласянь нырысетӥ вамыш гинэ лэсьтыны юртто».

Фестивальын «Эстрад­ная песня» номинациын 63 егит кизилиос кырӟазы, «Эстрадный танец» номи­нациын 12 группаос эктӥзы. Нош «Эстрадная музыка» но­миницаын жюрилы 12 вокал группаосты эскероно луиз. Чылкак татын ик кужымзэ эскериз «Кордон» ансамбль.

- Фестивале пыриськон сярысь берло нуналъёсы гинэ малпаськыны кутски­мы. «Продолжать дышать» кырӟанмылы кылбур но крезьгур гожтӥз группаысь­тымы кырӟась Камил Шара­футдинов. Нош аранжировка­зэ быдэс группаен лэсьтӥмы. Кыкетӥез номермы «Green dau» группалэн «21 guns» кырњанэзъя дасямын вал. Озьы Бирскысь сцена вылын Камил Шарафутдинов, Айрас Хабипов, Юля, Нияз но Руслан Шарифьяновъёс кырӟазы. Со­ослэсь быгатонлыксэс жюри III степенё дипломен дунъяз. Арибашъёслы бадњым фести­вале вуылыны гуртысьтызы ужбергатӥсьсы Г. В. Гильма­утдинов юрттӥз.

«Крещенские морозы» фестивале арлы быдэ тодмо кырӟасьёс но вуыло. Таяз арын отчы кырњась, крезь­гурчи но аранжировщик Ан­дрей Державин ӧтемын вал. Со «Чужая свадьба», «Брат» но мукет кырӟанъёссэ быдэстӥз. Нош берло со шуиз:

- «Крещенские морозы» фестивалез келяса, сьӧрады ӧсъёсты пытсаны эн дыртэ, со вуоно кизилиосты мед витёз.

Ольга НИГАМАТУЛЛИНА.

Ангелина НУРИЕВА,

Татышлы ёросысь Арибаш школаен кивалтӥсь.