Укно синъёс мӧзмыт учко

Сюресъёс тупатэмын, газ кыскемын

Выль Кирга (удмуртъёс сое Выль Кырги нимало) Сандугач гурт поселение пыре. Солэн выжыез Пермь шаерысь Вуж Кирга гуртэ кошкемын. Отысь кӧня ке адямиос 1683-тӥ арын выль интые улыны выжиллям. Но мылкыдынызы вордскем палъёсынызы люкиськыны дыртӥллямтэ, гуртсылэсь нимзэ утьыны малпаллям. Озьы Янаул ёросын Выль Кир­га кылдэм. Кызетӥ даурозь татын улӥсьёс пудо ворды­са улӥллям. Выль Киргаын пӧртэм аръёсы школазы, ныл­пи садзы, сельпозы, клубзы, почтазы, библиотеказы, скал но парсь вордон фермаоссы луиллям. Нош туннэ та уж ин­тыос огез но ӧвӧл ни, шуыны луоз. Клублэн пулэсь ӝутэм вуж юртэз гинэ сэрттэмез курыса кадь мӧзмыт сылэ. Куке но татын бадӟымесь ужрадъёс, пӧртэм пумиськы­лонъёс ортчылӥзы, дыр. Нош туннэ солэн бушесь укноосыз кӧшкемыт адско. Нош табере гурт калык концертъёсы но пӧртэм шутэтскон ужрадъёсы Янаулэ яке Сандугаче вет­лэ. Туннэ соос огез пумысен шумпото: Выль Киргае нуись сюресэз тупатӥзы. Азьвыл ся­мен бусы сюрестӥ курадӟыса ветлоно уз луэ ни. Школаын дышетскись пиналъёслы но табере со ласянь ӟечгес луоз. Уго соосты нуналлы быдэ дышетскон юртазы автобусэн нулло.

Выль Киргаын туннэ вить дышетскись нылпиос лыдъ­ясько. Соос пӧлысь кыкез бадӟым классъёсын тодон-валан басьто, куинез – покчи классъёсын. Куке но Выль Киргаын асьсэлэн сизьым классъем школазы луэм, 1978-тӥарын со ворсаськем. Трос визьмо нылпиосты со ас пыртӥз поттэм. Нош али та дышетскон юрт сярысь топольёс гинэ тодэ вайыто на. Школа но мукет уж инты­ос быремен сэрен ик, лэся, егитъёс туж ӧжытэз гуртэ кылё. Соос пӧлысь тросэз школазэс йылпумъямзы бере, пӧртэм городъёсын тодон-ва­лан басьто но отчы ик ужаны интыясько. Гуртын улыны мылкыд карисьёслэн уноез парсь вордон комплексын тыршо. Нош Виктор Актими­рович Галиакберовез, кыл­сярысь, музъем уж бордаз кыскем. Солэн аслаз бусыез вань. Отын со турын, ю-нянь будэтэ. Турынэз удалтыку, гурт калыксэ но пудо сиёнэн тырмытэ. Со сяна, Виктор Актимировичлэн Сандуга­чын вукоез но вань. Отчы киргаос, мукет бускель гур­тъёсын улӥсьёс сямен ик, пызь-кеньыр изыны вуыло. Нош мукет вузъёслы соос Ба­рабановкаысь, Сандугачысь но Янаулысь магазинъёсы ветло. Та пумысен выль кир­гаослэн шугъяськонзы ӧвӧл, уго тросэзлэн капчи машина­зы вань.

Гуртлэн данъяськонэз

Выль Кирга музъем туж бадӟым ӧвӧл. Озьы ке но татысь калыклэн сюлмысь тыр­шемез тросэзлы тодмо. Выль киргаос данъясько, кылся­рысь, генерал-полковникен Вячеслав Галинэн, Ленин ор­денэн данъям трактористэн Фатихзян Матхановен. Пенси­ысь дышетӥсь Бадрислам Са­дритдинович Садритдинов но туннэ татын одӥгез гажамон адями луэ. Со борды ик, оло, гуртлэн историезлэн одӥг люкетэз но ватскемын, дыр. Бадрислам Садритдиновлэн верамезъя, азьвыл аръёсы гуртын бадӟым ӵыпетсы вань вылэм. Гурт калык Сандугач шурзэс (калыкын сое Салду­геч шур шуо) валэн ӵыпылэм. Ӵыпетсы чорыген узыр луэм. Выль киргаослэн вӧсьсы но Салдугеч нимаськем. Отын Гыльмай ӵужатай (гуртын озьы вазиськиллям, фамили­ез тодмо ӧвӧл), Нури Семёнов Инмарлы куриськиллям. Тун­нэ татын вӧсьёс уг ортчо ни. Калыклэн Инмарлы осконэз бырем, лэся.

Йылпумъян интые

Одӥг урамлэсь сылӥсь гуртын йыг-йыг коркаос сыло. Жаляса верано, соос пӧлын али ӝутӥськисьёсыз ӧвӧл. Оло нош азьпалан луозы на? Уго гуртэ сюрес тупатэ­мын, газ кыскемын, котыраз вож-вож нюлэс будэ. Гурт калык ог-огеныз тупаса но кенешыса улэ. Соос улонысь вань шуг-секытъёсты но шум­потонъёсты шори люко.

Марина НИКОЛАЕВА.

Янаул ёрос.