Антиквариатэн вузкарисьёс

Соос пала вамыштӥз гинэ но, кин ке но вазиз:

- Ӟечбур, уром!

Гури куара пала учкиз но Алдар Митреез адӟиз. Кылчи гуртоез шоры мыньпотыса шуэ:

- Ӟеч, ӟеч. Мар ке мон вунэтӥськем, лэся, асьмеос куке уром вал-а? Ачид малпа ай, тон кин но, мон – кин? Ась­меос одӥг улмо садысь емышъ­ёс ӧвӧл. Зэм, кыкнамылэн ик кушем ниммы вань. Та ласянь гинэ асьмеос пӧртэмесь ӧвӧл, дыр. Монэ малы Кылчи нимало? Шонер, трос кыллы бырисько. Нош тонэ малы Алдар шуо? Пӧяськиськод бере – Алдар ини. Оскид ке оскод, ӧд ке нош… Мон сярысь ке верано, бен, куд-ог адямиосты сереме уськытӥсько: озьы мон соосты визьнодасько, мынам сыӵе аспӧртэм дышетон амалэ.

Алдар Кылчиез кылзыкуз, ма карыны паймеменыз, чи­ньыосыныз мыйык пумъёссэ питыръяса сылӥз. Чиданэз чигемен, вазьытэк ӧз чида:

- Тырмоз кылдэ «зуданы», мукет дыръя чирдод. Мон тон доры одӥг муген лыктӥ вал, нош тон борддорысь час выл­лем дугдондэ но уд валаськы.

Гури Митрейлэн кылъёсыз­лы паймиз:

- Тазэ верад ке, верад. Тон мынэсьтым но ортчытгес ӧд лэзьы-а? Зэм, тынэсьтыд сыӵе мудрон кылъёстэ кыло шуыса уг малпаськы вал. Молодец! Вить тыныд.

- Тырмоз ни тыныд вӧямтэ питран кадь ӟукыртыны, - Кыл­чиез куспетӥ кариз Алдар. - Кылзы ай монэ. Кык толэзь азьвыл клуб азьысь киын нул­лон швейцар час шедьтӥ. Ны­рысь кузёез шедёз, малпай. Нош гуртын али ке но нокин уг вераськы сыӵе аспӧртэм час сярысь. Сое кытчы ке но вуза­но вал. Сыӵе час туж дуно, пе, сылэ, шуо.

- Нош ик пӧяськиськод, дыр, - уг оскы Кылчи.

- Марлы мон юнме пӧяськом, - шуиз но кисыысь­тыз час поттӥз Алдар. Гури сое кияз бергатӥз но шуэ:

- Зэмзэ но швейцар час. Кунгож сьӧрысь букваосын Женева гожтэмын, 1936-тӥ арын лэсьтэмын. Антиквари­ат, иське. Кытчы вузаны уд тодӥськы-а, мар-а? Городысь ломбардэ нуоно. Отын одно ик басьтозы.

- Ломбардэ сётыны луэ шуыса мон ачим но тодӥсько, - мыньпотэ Митрей.

- Тодӥськод бере, малы мон доры лыктӥд?

- Тон кыллы усто, котьки­нэн вераськыны быгатӥськод. Соин ик лыктӥ. Ӵуказелы ужъ­ёсыд трос-а?

Гури йырберзэ кормаса шуэ:

- Ӵуказе? Ӧвӧл кадь.

- Ойдо, иське, ӵошен го­родэ ветломы. Мон туннэ йӧл нуллӥсь шофёрен верасько.

- Тани мар, тон одӥг кило «топливо» басьтыны эн вунэты.

- Кыџе «топливо»? - паймиз Митрей.

- Асьме гуртын ваньзы тодо: топливо - со ньылон гылтон.

- Озьы? Мон уг тодӥськы на вал. Басьто, одно ик басьто, - соглаш луиз Митрей.

Воргоронъёс џуказеяз сю­рес вылэ потӥзы. Гурт пуме гинэ вуизы но, Кылчи Гури шуэ:

- Потты ини со одӥг ки­лодэ.

- Ма, мон одӥг гинэ ӧй, ку­инь кило басьтӥ, - куинь лит­ръем пластик бутылкаё пивозэ возьматыса шуэ Митрей.

- От! Алдар бере Алдар ини. Мон тыныд водка басьтыны косӥ вал. Нош тон – пиво. Ярам ини, вай, пиводэ юомы.

Воргоронъёс городэ вуыку, бутылказы ӝыныя бушамын вал ини. Машинаысь васькизы гинэ, Алдар куак пӧлы бызиз. Отысен куараез кылӥськиз:

- Мынам самаре быректӥз.

Кылчи Гури но Алдар доры вамыштӥз. Отын сылыкузы, Алдар пырсйиз но шуэ:

- Учкы ай пумит сылӥсь бадӟым юртлэн укноосаз. Ныл­кышноос тунсыкъяськыса асьмеды эскеро, лэся.

Кылчи Гури серектыса вера:

- Ма, со укноос шат? Витри­наос ук. Нош нылкышноосыд – манекенъёс. Кылзы ай, табере мон тонэ индеецез кадь Лэчыт син нимало.

- Шуид ке шуод ини. Асьме­лы часэз вузано вал.

- Ох, туннэ коньдон жиль­дом! – киоссэ посэ Кылчи. – Ойдо бускель ураме, отын ломбард вань.

Воргоронъёс ломбардэ вуыку, вакыт лымшоре кошкем вал ини.

- Учкы ӧс борды, телефон номер гожтэмын, – вазиз Ми­трей. - Ломбардын ужасьёслэн, дыр.

- Ма бен, эскеронэз кема ӧвӧл. Жингыртӥд – тодӥд.

Воргоронъёс озьы ик лэсьтӥзы.

- Алло, - кылӥськиз теле­фонын.

- Вай мон верасько, - Алдар­лэсь кисы телефонзэ кыскиз Кылчи. – Иське, мон марлы тон сьӧры лыктӥ.

Гури телефонэз пель дораз карыса вера:

- Милям киын нуллон швей­цар часмы вань. Со антиквари­ат, 1936-тӥ арын лэсьтэмын.

- Ма, нырысь частэс учконо. Собере дун сярысь вераськом. Кема ӧвӧл мон сыџе часэз 100 сюрс манетэн басьтӥ, - валэктӥз тодмотэм пиосмурт.

Сыӵе кылъёсты кылыса, воргоронъёс лӧптӥзы.

- Асьмеос 110 сюрс куром. Со дунэн ӧд ке басьты, мукет ломбардэ мынӥськом шуом, ява, - валэктэ Кылчи.

- Мон согл аш, - йырзэ сэзъя Митрей.

Магазинлэн кузёез одӥг часкын вуиз.

- Ми тӥледлы жингыртӥмы, - вераны кутскиз Кылчи. – Му­кет ломбардэ но мыныны мал­паськом вал, вераськем бере, кыл вылын одно ик сылоно.

- Вае частэс учком, - вазиз магазин кузё. Алдар кисы­ысьтыз чассэ поттыса сётӥз. Тодмотэм воргорон сое кияз бергатӥз но шуэ:

- Тӥ мар, пиокъёс, та выл­лем часэз вуз карон юртысь 500 манетэн басьтыны луэ ук.

- Кызьы?! – паймиз Алдар.

- Кык кияды пӧзьы поныса, - серектӥз воргорон.

- Нош малы час бордын 1936-тӥ ар гожтэмын? – юа Гири.

- Со арын час поттон за­вод ужаны кутскем. Тӥ сое уд тодӥське шат?

Алдарен Кылчи гурта­зы вуытозь но вераськытэк бертӥллям. Со дырысен соос ог-огенызы уг верасько ни.

Артём НИКИТИН.