icon_gotop
18+
autorisation
Войти | Регистрация
Время в Татышле
16:27
Четверг, 28 Октября
Рекламный баннер 990x90px top

Выль ар уе

2015-01-15

…Наташа ноку но ӧз мал­палля вал выль ар уе больни­цае шедёз шуыса. Нош пинал возьмась кышномуртэз ӵапак 31-тӥ толсуре ӵукна роддо­ме ваизы. Нуназе вакыт На­ташалэн нылыз вордӥськиз. Пичи нылыз, вуись Выль ар, картэзлэн шумпотыса укно улын кесяськемез – та нуналэ огазе сураськизы. Ӝытпал На­таша каллен гинэ палатаетӥз вамышъя вал ни. Мылкыдыз капчи. Шудо со, туж шудо туннэ.

- Кызьы, пе, таӵе шудо ва­кытын кӧлыса улод? – малпа со ас понназ укное учкыса. Озьы ке но кӧнялы ке умме усьыса кошке. Наташаез мед­сестралэн куараез сайкатӥз.

- Султэ, укол лэзёмы, – каллен гинэ йӧтӥськиз со Наташа борды.

- Кин ке Выль ар пумитаны дасяське. Нош мынам дежур­ствое тани туннэ тупаз. Сояз корпусын хирургъёс операцие дасясько, – укно шоры возьма­тыса вераз медсестра.

-Кышкыт авария луэм сю­рес вылын, – Наташалы укол лэзьыкуз, лулӟыса вераз на медсестра.

Медсестра палатаысь потэм бере, котырын чал-чал луиз. Кытын, пе, изёд на, Наташалэн изён мылкы­дыз тӧлӟемын. Син шораз пумит сылӥсь юртлэн укно­осыз йӧтӥзы. Отысь одӥгаз висъетлэн укноосыз юг-югыт пишто. Наташа валес вылаз ӝутӥськыса учке. Ӝӧк котыре тӧдьы халатэн эмчиос лю­каськиллям. Соослэн вырем­зы шоры учкыса Наташа валаз: эмчиос операция лэсьтыны дасясько.

- Остэ, Инмаре, кинлы ке Выль ар, кинлы ке операци­онной ӝӧк вылэ выдоно, - кышномурт таӵе малпанъё­сын мукет пала берыктӥськыса выдӥз. Нош умме усемез уг луы, йы­раз ялан пӧртэм малпанъёс бер­гало.

- Кин меда со отысь адями? Ма луиз соин? Выль ар уе кин ке шул­дыръяське, кин ке ужа, кин ке вордӥське, кин ке… Я, умой мед ортчоз ни опера­цизы… - тодмотэм адямиез малпаса лулӟиз Наташа.

Выль ар вуэмез кышномурт пумитатэк ик кылиз. Синъ­ёссэ усьтыкуз куинь час уй вал ини.

- Остэ, Выль ар вуэм ук ини, выль шудбурен, выль ӟеч мал­панъёсын, ачим но, матысьёсы но шудо мед луомы. Пичи нылы таза мед будоз, – малпаз со ас понназ. Кышномурт султыса укно доры лыктӥз.

- Остэ, али но операцизы бырымтэ на, лэся, - ӝӧк коты­ре люкаськем тӧдьы халатэн эмчиосты адӟыса чабкиськиз Наташа.

- Инмаре-кылчинэ, юртты соослы. Ӟеч мед лэсьтозы ужзэс. Со адямиез но, Инмаре-кылчинэ, утьы. Кулон огпалтӥ мед кошкоз. Утьы Инмаре, утьы со мискинез. Тани тыныд Выль ар - нош ик жаляса учкиз со югыт укноос шоры. Наташа вазь ӵукнаозь изьыны ӧз быга­ты ни. Олокӧня пол укно доры лыктылӥз, олокӧня пол тод­мотэм адями понна куриськы­са инмарлы вазиськылӥз. Нош куазь юганы кутскыку тылъёс кысӥзы, эмчиос оген-кыкен висъетысь потӥзы.

- Быриз… - малпаз шоразы учкыса Наташа.

…Ӧсазы жингыртэм бере ик Лена бызьыса корказе потӥз.

- Анай, Игорь вуиз, - нылаш корка пальпотыса пыриз.

- Вуиз ке, вуиз, – малпаз кышномурт, муспотон нылыз шоры учкыса.

Тани соос ваньзы ӝӧк сьӧры пуксизы. Анаез, атаез, выныз, Наташа но Игорь. Егит пияш ӧжытак возьдаськыса, Леналэн анаеныз атаез шоры учкыса вазиз:

- Мон туннэ Лена­ез вордӥськем нуналэныз, ваньдэс вуись Выль арен ӟечкыласько. Та ӝытэ мынам нылдэс кузпаллы куреме потэ. Лена, ойдо кузпалъяськомы. Ваньзы Игорь шоры учкизы, нош Лена пальпотӥсь шудо тусын вераз:

- Мон соглаш, соглаш. Анай, атай, мон яратӥсько Игорьме. Егитъёслы нокин пумит ӧз луы.

- Нош тынад анаед, ата­ед тодо-а ини Лена сярысь? – Игорьлэсь юатэк ӧз чида Наташа. Игорьлэн тусыз мал­паськись луиз. Ӧжыт шыпыт улэм бераз Игорь вераз:

- Мыным соку вить арес гинэ вал. Матысь гуртэ ӵужанае доры Выль ар пуми­таны мыныку аварие сюри­мы. Анае но атае отысен ик кулӥллям, нош монэ эмчиос улэп кельтӥллям.

- Дугды ай, Выль ар ӝытэ шуиськод-а? – дырекъясь куараен юаз Наташа.

- Бен, Выль ар ӝытэ. Со уе мон кыкетӥ ползэ вордӥськиськем шуыны луэ, – вераз Игорь. Наташалэн синъёсыз синкылиен тырми­зы. Кышномурт эмъяськон юртэз, хирургъёсты, операция лэсьтэмзэс син азяз пуктӥз.

- Дугды ай, кыӵе арын со вал? Кыӵе эмъюртын?

- 1994-тӥ арын, монэ ась­ме райцентрысь эмъюртэ ваиллям. Соку, Выль ар ӝытэ, быдэс уй улонэ понна нюръ­яськиллям, – валэктыса вераз Игорь.

- Остэ, озьыен тон вал соку отын? Эх, пие, пие…- На­таша Игорез бордаз юн-юн ӟыгыртӥз.

Гужем Ленаен Игорь куз­палъяськизы. Егитъёс шоры учкыса, Наташа малпаз:

- Шудоесь мед луозы.

Ирина САМИГУЛОВА.

2649

Оставить сообщение:

НАШИ ПАРТНЕРЫ