«Орлёнок» лагере вуылӥмы

«Орлёнок» быдэс Рос­сиысь но кунгож сьӧрысь пиналъёсты огазе люка. Та­тын гужем 3500 нылпиос шу­тэтско, толалтэ - 1200. Пи­налъёслэсь шутэтсконзэс умой но пайдаё ортчытон понна культура юрт, авиаци­лэн но космонавтикалэн юр­тэз, крезьгуръя телестудия, школа, лечебной физкульту­рая зал, астрономической обсерватория, библиотека, компьютерной классъёс вань. Ми, Калтасы ёросысь пиналъ­ёс, Светлана Галиахметова но Светлана Тимиршина (Бадӟым Качак школа), Динара Гиль­малетдинова (Красный Холм школа) но Валерия Губаева (Татышлы ёросысь Улысь Бал­тач школа) Башкортостанысь пиналъёслэн делегациены­зы «Орлёноке» шутэтскыны вуылӥмы. Делегациын респу­бликаысь пӧртэм ёросъёсысь но городъёсысь 40 пиналъ­ёс вал. Милям «Штормовой» лагерьысь 12-тӥ сменамы «Есть корабль, где все мы капитаны» нимаськиз. Миле­мын ӵошен та сменаын луизы Башкортостанысь, Ленинград, Москва, Оренбург, Волгоград улосвылъёсысь, Молдавиысь вуэм 150 пиналъёс. Ми знамён­ной группаослэн конкурсазы, маршировкая, патриотической кырӟанъёсъя конкурсъёсы пыриськимы. Тодӥмы, ма со ку­брик, камбуз, кин со кок. «Сви­стать всех наверх» корабель­ной собранилэн люкаськоназ флотлэн йылолъёсызлы сӥзем уставез кутӥмы, корабль­мылы уяны сюрес бырйимы. Строевой кырӟанъёслы сӥзем «Красив в строю – силён в бою» конкурсын ми команда­лэсь ӵошен ужаны быгатэмзэ возьматӥмы. Геральдикалы сӥзем «Равнение на знамя» урокын корабльлэн символъ­ёсыныз, кун тодметпусъёсын тодматскимы. Нылпиослы сӥзем морской академиын пӧртэм морской дисциплина­ослы дышетским. Тунсыко вал флотлэсь историзэ дышетыны, морской узелъёсты эске­рыны, флажной семафорлэсь улонын кутӥськемзэ тоды­ны, барабанэн марш шудыны. Табере нылпи морской ака­демиез пыр потэм пиналъёс кышкатэк зэмос «плавание» кошкыны но быгатозы. Сочи­ысь Олимпийской парке кык нунал экскурсия радъяськиз. Ми пӧртэм кружокъёсы пы­риськимы. Кавказ гурезьёсы но вуылӥмы, походъёсы, экс­курсиосы ветлӥмы. Тужгес бадӟым порт луэм Новорос­сийск герой-городэ ветлӥмы.

«Орлёноклэн» аръёсын люкам йылолъёсыз трос. Соос пӧлын пиналъёслы адямиез, солэсь ужзэ, опытсэ гажан мылкыд пыӵатон валтӥсез луэ. Татын котькуд ужез ась­меос лэсьтӥмы, висъетъёсмес октылӥмы, дӥськутъёсмес утялтӥмы, лагерьын но столо­войын дежурить каримы.

«Орлёнок» лагерьын котькуд минут пайдаё орт­чиз. Пӧртэмесь конкурсъёс, спортъя праздникъёс, акциос но фестивальёс луизы. Ми котькуд ужрадэ пыриськыны тыршимы. Милям тыршеммы пӧртэм медальёсын, грамо­таосын, тау карон гожтэтъё­сын, дипломъёсын пусъемын. Нош ми понна «Орлёноклэн» значокез тужгес дуноез луиз. Волейболэн шудонын ми, кык Светаос, но Валерия Губаева азвесь медальёсын пусъемын. Скалодромысь ӵошатсконъёсын Светлана Галиахметова азвесь медален но «Лучший физорг» значокен пусйиськиз. Валерия Губаева шахматэн шудонын вормиз. Со сяна, Валерияез «Душевная песня» номинациен пусйизы, нош Динара Гильмалетдинова «Поколение интел» курсъё­сты ортчиз.

«Орлёнокын» луэммы ке­малы тодэ кылёз. Тылскем дорын кырӟамъёсмы, ӝыт пу­кем дыръёсмы, выль эшъёсмы, лулысь-сюлмысь вераськем­мы - ваньмыз тодамы луоз, аръёс ӵоже малпанъёсамы улоз. Эшъяськыны дышетскы­са, пӧртэм ужъёсын асьмеды возьматыса, ми трос выльзэ тодӥмы, тросэзлы дышетски­мы. Асьмелэн нимысьтымы ми ЦВВ-лэн директорезлы Г. А. Рахимовалы, школао­сынымы кивалтӥсьёслы но дышетӥсьёсмылы пумтэм тау кылъёсмес вераськомы.

Светлана ГАЛИАХМЕТОВА,

Светлана ТИМИРШИНА,

Динара ГИЛЬМАЛЕТДИНОВА.

Калтасы ёрос.