Азьлане вамыштоно осконэн

Башкортостан Республи­калэн Президентэзлэн Ру­стэм Хамитовлэн кылъё­сызъя, берло аръёсы улонэн люкиськемъёслэн лыдзы вордӥськем пиналъёслэсь шӧдскымон тросгес. «Тӥ уло­нэн люкиськемъёслэсь лыд­зэ кулэстон бордын уд ужась­ке. Ёросъёсысь калык сюрес вылын, тылпуын, вуын быре, асьсэды быдтӥсьёс но ӧжыт ӧвӧл. Валтӥсь эмчиос кема­лась ни вунэтӥзы фельдшер­ско-акушерской пунктъёс сярысь. Туннэ соос трос дыр­зэс кабинетъёсазы ортчыто. Табере адямиослы котькуд эмъюрттэт понна коньдон тыроно луэ. Малы асьмеос таӵе югдуре вуэмын?» - ва­зиськиз президент пумисько­нэ вуэм кивалтӥсьёслы.

Туннэ Башкортостанысь тазалыкез утён удыс Россиын одӥгеныз ӟеченыз лыдъясь­ке. Кылем арын сое азинтон­лы огъя 45 млрд манет конь­дон висъямын вал, туэ – 54 млрд манет. Со Башкортостан Республикалэн бюджетэзлэн бадӟым люкетэз луэ. Нош уж вылын та лыдпусъёс малы ке сокем зол уг шӧдӥсько. Башкортостан Республикаысь Президентлэн верамезъя, калыклэн улонэз шор лыдын 74 аресозь кыстӥськыны кулэ. Туннэ та лыдпус 69,8 аресын возиське.

- Быдэстэм ужъёсын гинэ буйгатсконо ӧвӧл, азьпала вамыштыны тыршоно, - вераз Рустэм Закиевич. - Туннэ ми гуртъёслы, отын улӥсь ка­лыклы котыр ласянь юрттэт возьматыны тыршиськом, кылсярысь, ульчаосты таза­тыны 100-лы матэ трактор висъяны малпаськом. Но со понна ми тӥ азе но юн куронъ­ёс пуктӥськом: калыклэсь та­залыксэ юнматоно, кулэмъ­ёслэсь лыдзэс кулэстоно, муниципалитетъёсын, гурт интыосын калыклы каньыл улыны луонлыкъёс кылдыто­но, котыр улосэз утён сярысь сюлмаськоно.

Дасяз  Ольга НИГАМАТУЛЛИНА.