icon_gotop
18+
autorisation
Войти | Регистрация
Время в Татышле
06:16
Понедельник, 26 Июля
Рекламный баннер 990x90px top

Артэ но ӵош

2014-12-18

Тани ог куамын вить ар талэсь азьло Уфаысь искусствоя институ­тын удмурт студентъёс артистлы дышетскизы. Диплом уж карыса, соос Мустай Каримлэсь «В ночь лунного затмения» трагедизэ удмурт кылын возьматӥзы. Институтын сяна, та спектаклез Удмурт драмтеатрын но пуктӥзы. Озьы башкир пьеса уд­мурт кылэ нырысьсэ берыктэмын вал. Ачиз Мустай Карим институтэ удмурт студентъёсын пумиськы­ны ветлӥз, шудэмзылы ӟеч дунъет сётӥз. Бӧрысьгес Мустафа Сафич ветлӥз Ижевске но (ӵапак соку кармы Устинов каремын вал). Таяз учыре – советской литературалы сӥзем нуналъёсы. Мыным соин пу­миськыны шуд усиз, интервью но басьтӥ. Книгаяз автограф гожтыкуз тазьы шуиз: «Мон егит адями ӧвӧл ни. Мыным Устинов ним чик уг кельшы, соин ик Ижевск шуыса пусъё». Озьы ик кариз. «Долгое-долгое детство» книгазэ али но утьыса возисько. Та повестьысь куд-ог люкетъёссэ уд­мурт кылэ берыктыса, «Советской Удмуртия», «Дась лу!» газетъёсын печатлай.

Та учырез мон алигес верай Уфа­ын кун филармонилэн сцена вылаз. Отчы тыраз ик калык люкаськемын вал. Башкортостанысь писательёс­лэн огазеяськонзылэсь 80 ар тыр­монзэ ӵапак отын пусйизы угось. Та ужрадэ Татарстанысь, Чувашиысь, Удмуртиысь, Челябинск но Оренбург улосвылъёсысь, Москваысь писате­льёс но вуизы. Сцена вылысен чузъ­яськизы уно ӟечкыланъёс, шуныт кылъёс, кырӟанъёс, эктон гуръёс.

Башкортостанысь писательёс­лэн огазеяськонзылы книгаос, жур­налъёс сяна, мон пулэсь лэсьтэм шкатулка но кузьмай. Сётыкум таӵе кылъёс верай:

– Кузя Насретдинэз уно кунъё­сын тодо. Удмурт калыклэн но ма­скарчиез вань. Солэн нимыз – Лӧпшо Педунь. Али со гуртын улэ. Пиналъёс но мӧйыос дораз ӵем ветло. Лӧпшо Педунь соосты серекъятэ, шудытэ, перепечен куноя. Мынэсьтым Уфае писательёслэн юбилеязы мынэмме тодыса, со сьӧрам куриськиз. Мон пумит ӧй луы. Поездэн ӵош мынӥм. Автобусэ пуксим но, Лӧпшо Педунь олокытчы ышиз. Со ватӥськыны яратэ. Кытын ке татын ик улэ, дыр. А-а, валатски кытчы ватскемзэ. (Па­кетысь шкатулкаез поттӥсько, сое усьтӥсько. Отысь «Лӧпшо Педунь сярысь» пичи книгаез басьтӥсько). Тани со Лӧпшо Педунь, пичи кни­галы пӧрмытскем. (Книгаез пи­сательёслэн огазеяськонзылэн кивалтӥсьсылы Наиль Гаитбаевлы сётӥсько). Та шкатулка огшоры ӧвӧл. Пӧртмаськись но ӧвӧл. Сое асьтэлы пӧртмаськись кароно. Шкатулкалэн нимыз – Кизили. Тазьы ик нимаське удмурт нылпиослы потӥсь журнал но. Кызетӥарзэ мон солэн валтӥсь редакторез луисько. Тани та номер­мы (возьматӥсько) Башкортостанысь удмуртъёслы сӥземын (журналэз сётӥсько). Шкатулкае дуно арбе­риос тырыны уг яра. Отчы тунсыко малпанъёсты, ӵектонъёсты люка­но. Туннэ отчы мон одӥг малпанме поныса кельтӥсько. Нош малпанэ таӵе: азьланьын Удмуртиын башкир культуралы но литературалы сӥзем нуналъёс ортчытоно, нош Башкор­тостанын – удмурт культуралы но литературалы сӥзем нуналъёс (шка­тулкаез сётӥсько). Гажано писате­льёс, тӥкизили кадь пиштыны тырше, тӥлесьтыд нимъёстэс мед тодозы, мед гажалозы, книгаостэс лулысь-сюлмысь мед лыдӟозы. Книгаосты понна бадӟым гонорар мед сётылозы, соин тӥвыль машина басьтыны мед быгатоды, кызьы луэ вал Совето Союз дыръя. Серекъянды, пальпотон­ды котьку бордады мед луозы.

Тӥни озьы, ӟечкыланэлэн шор­сюлмыз удмурт но башкир писате­льёслэсь кусыпъёссэс юнматон сярысь сюлмаськонэн герӟаськемын вал. Зэмзэ но, али ми, гожъясьёс, ог-огмес сокем ӟеч ум тодӥське, ог-огмылэсь произведениосмес но ӧжытгес берыктылӥськом. Удмурт драматургъёслэн одӥг пьесазы ке но, башкир кылэ берыктыса, Уфаын возьматэмын мед луысал. Удмурт драмтеатр та ласянь Башкортостан пала вамыш лэсьтӥз ни. Мустай Ка­римлэсь трагедизэ сяна, Флорид Буляковлэсь «Бызьыны вуэм песя­найёс» комедизэ берло ог дас вить ар ӵоже возьматъя ни.

Удмурт артистъёс Башкортоста­нэ вуыло, удмурт гуртъёсын спектак­льёс возьматъяло. Удмурт писате­льёс но отчы мед лыктылозы вылэм.

Башкортостанысь писательёслэн огазеяськонзылэн ужамез адӟем ка­рымон. Союззылэн кык этажъем ни­маз юртсы вань. Отын укмыс адями тырше. Огазеяськоназы ог 250 адями пыртэмын. Дано писательёссэс сӥлы каро. Ми Салават Юлаевлэн, Ак­муллалэн, Мустай Каримлэн памят­никъёссы вӧзы улэп сяськаос тырим. Элькунысь культурая министрен но пумиським, музейёсы но ветлӥм, Баш­кир драмтеатрын спектакль учким.

Таӵе ужрад азьланьын кусыпъё­сты юнматыны одно ик юрттоз.

Ульфат БАДРЕТДИНОВ,

Россиысь писательёслэн огазеяськонзылэн ёзчиез.

1392

Оставить сообщение:

НАШИ ПАРТНЕРЫ