icon_gotop
18+
autorisation
Войти | Регистрация
Время в Татышле
11:42
Sunday, 17 Октября
Рекламный баннер 990x90px top

Ӝуатскизы выль кизилиос

2014-12-11

Туэ фестиваль сизьыметӥ ползэ ортчиз. Со Балтач, Калтасы, Татышлы, Янаул ёросъёсысь, Пермь шаерысь Куеда ёросысь, Ижкарысь 25 кырӟасьёсты огазеяз. Тужгес трос кырӟасьёс вуизы Улысь Балтач гуртысь. Жаляса вера­но, фестивале Бурай, Ермекей, Илиш, Кушнаренко ёросъё­сысь удмурт кырӟасьёс ӧз вуэ.

Фестиваль кык турен орт­чиз. Нырысь кырӟасьёслэсь быгатонлыкъёссэс - куа­разэс, сцена вылын асьсэ­ды возьыны быгатонлыксэс, дӥськутсэс - дунъяз жюри. Жюриын луизы: Удмурт Эль­кунысь «Ӟаныкай» ансамбль­лэн художествоя кивалтӥсез Александр Миниахметов, Татышлы ёросысь культура ёзэтэн кивалтӥсь Салим Га­рифуллин, агитационно-куль­турной бригадая методист Гульнара Шаймиева, «Жиде­ген чишме» вокал ансамблен кивалтӥсь Светлана Шаехо­ва, Улысь Балтач культура юртысь клубной ужъёсъя валтӥсь ӧнерчи Ирина Шайх­лисламова.

Кызьзэ тужгес устооссэ кырӟасьёсты кыкетӥ туре, Га­ла-концертэ, бырйизы. Жюри­лэн тӧроезлэн Александр Ми­ниахметовлэн кылъёсызъя, ужрад огпол шокчем выллем ортчиз. Со шуиз: «Секыт вал устоосты бырйыны. Ваньзы ик конкурсантъёс сюлмысьтызы кырӟало, тыршо. Соослэн туж кырӟамзы потэ. Ӵектӥсько со­ослы азьпалан но сцена вылэ потаны, быгатонлыкъёссэс будэтыны, азьлань но азьлань мыныны».

Гала-концерт. Сцена вы­лысь выль кизилиосты уч­кыны залэ трос калык лю­каськиз. Ужрадэз усьтыса, конкурсэ пыриськемъёсты, куноосты ӟечкыласа верась­кизы Татышлы ёрос Кенеш­лэн секретарез Р. Г. Рахи­мов, ёросысь культура ёзэтэн кивалтӥсь С. Г. Гарифуллин, Выль Татышлы гурт поселе­нилэн администрациеныз кивалтӥсь Н. В. Рахимьянов, Удмурт Элькунысь Камсьӧр удмуртъёслэн огазеясько­нэнызы кивалтӥсь Ф. А. Чи­бышева. «Конкурсэз быдэсак эскери, учки. Малы ке но тро­сэз Удмурт Элькунысь компо­зиторъёслэсь кырӟанъёссэс бырйиллям. Нош асьмелэн, Башкортостанысь удмур­тъёслэн, гуртысь компози­торъёслэн кырӟанъёссылы саклык висъясьёс туж ӧжыт. Мынам одӥг куронэ, ӵектонэ вань: вуоно фестивальын ась­ме диалектэн кырӟанъёс мед чузъяськозы. Асьме­лэсь сям-йылолъёсмес утьы­ны мед быгатомы, асьме­лэн кырӟанъёсмы медаз ыше. Арысь аре соосты ӝужась кизилиосмы улӟытыны, утьы­ны мед быгатозы», - куронэн вазиськиз Флюра Ахметовна. БР-ысь удмуртъёслэн НКЦ-енызы кивалтӥсьлэн Янаул ёросъя воштӥсез Ю. С. Саитов учкисьёслы но конкурсан­тъёслы Ренат Биктимирович Галямшинлэсь ӟырдыт салам вуттӥз, удмурт калыклэсь кырӟанэн юн-юн герӟаськемзэ пусйиз.

Сцена вылын «кизили­ос» огзылэсь огзы яркыт­гес пиштӥзы. Туала эстрада кырӟанъёсты вошъязы ваш­кала удмурт гуръёс. Тани конкурсантъёс понна тужгес сюлмаськытӥсь минутъёс вуизы. Кин Гран-прилы кузё луоз? Дыр вуиз «кизилиос­лэсь» нимъёссэс шараяны.

Татышлы ёросысь нылъёс: Валерия Губаева «За ориги­нальное исполнение» номи­нациысь дипломен пусъемын, Инесса Зидымакова «Юный исполнитель» номинациын висъяськиз, Валерия Гайния­рова – «Лулгур» номинациын, Балтач ёросысь Радмир Гали­ев – «Воля к победе» номина­циын, Янаул ёросысь Милена Зайнуллина – «За артистизм» номинациын, Калтасы ёросысь Диана Шакирова – «Надежда» номинациын. Куинетӥ степенё лауреат нимъёслы кузё луизы татышлыос Анастасия Гузаи­рова, Линда Гильманова, Инна Зиянбаева но Милена Ками­дуллина. Кыкетӥ степенё лау­реатлэсь дипломъёссэ утӥзы Татышлы ёросысь Мариалина Нуриахметова, Карина Шай­марданова, Олег Марданов но Янаул ёросысь Алёна Садыко­ва. Вашкала удмурт гуръёсты усто быдэстӥсьёс - Ижкарысь Лилиана Нуриахметова но Татышлы ёросысь Снежана Зиянгирова – нырысетӥ степе­нё лауреат нимлы кузё луизы. Котькинлэсь усто кырӟаса Гран-при утӥз Ижкарысь вуэм Ксения Ахметханова. Озьы ик синпель кузьымъёсын но ужрадэ пыриськемзы пон­на дипломъёсын пусъемын Пермь шаерысь Куеда ёро­сысь Стелла Мелляхматова, Татышлы ёросысь Анжелика Рахимзянова, Яна Фазлыева но Анастасия Миншарапова.

Кырӟан. Буйгатэ но, бӧрдытэ но, со пыр усьтӥське лулпуш дунне. Фестиваль ӝытэ егит кырӟасьёс пӧртэм удмурт гуръёсты быдэсты­са, зэмос кизилиос выллем ӝуатскизы. Оскисько, азьпа­лан но соос уз кысэ, яркыт но кема пиштозы .

Миляуша БУЛАТОВА.

Татышлы ёрос.

2231

Оставить сообщение:

НАШИ ПАРТНЕРЫ