Сильтӧл бере трос ужъёс быдэстэмын

Рустэм Хамитов нырысь Янаул городысь «Восточный» микрорайонэ но Конигово гур­тъёсы вуылӥз. Ёрос админи­страциен кивалтӥсьлэн Иль­шат Вазигатовлэн верамезъя, 12 выль ӝутэм юртъёслэн 11-ез кузёосызлы сётэмын ни. Башкортостанлэн Президен­тэз одӥгеныз юртэн тодмат­скиз, калыкен пумиськылӥз. Рустэм Хамитов соосты сюлмаськытӥсь ужпумъёс ся­рысь юалляськиз. Нош берло вераз, калыклэн куронъёсыз ар пумозь быдэстэмын мед луозы.

- Асьмеос вань ужъёсты ньыль толэзь куспын йыл­пумъям. Калык шуныт улон юртъёсын тырмытэмын. Тол куазез соос кезьытын ӧз пумиталэ. Озьыен, азямы пуктэм ужпуммес дыраз бы­дэстыны быгатӥмы, - шуиз Рустэм Закиевич.

Республикалэн Президен­тэз кониговоослы чидамзы но валамзы понна тау кариз. Нош гурт калык президент­лы, ёрос администрациен кивалтӥсьлы, гурт поселени­лэн кивалтэтэзлы, предпри­ятиослы но организациос­лы шуныт кылъёссэ вераны дыртӥз. Уго секыт вакытэ соос пӧртэм ласянь юрттэт возьматыны тыршизы.

Рустэм Хамитов «Победа» ООО-ын тыршисьёслэсь но ужзэс данъяз. Президент та­тысь 270 йыр кысконо скалъ­ёслы чаклам фермае пыраз. Со 2013-тӥ арын «500 ферм» программа улсын усьтӥськиз. Азьланяз татын йӧл дасян­лэсь быдӟалазэ 40 процентлы будэтыны чаклало.

Президентлэн ужез Крас­нокама ёросысь Кариево гур­тын йылпумъяськиз. Татын сильтӧл бере 136 юртъёс тупатэмын. Рустэм Хамитов гуртын улӥсьёслэн мылкыд­зыя шӧдӥз, кивалтэт но ка­лык ог-огзэс валало.

Дасяз

Ольга НИГАМАТУЛЛИНА.