Секытлыкъёс пыр потыса кыдамын

- Журналистъёс ми, - мар муген пыремме валэктыса шуисько. Юраен вераськыса сылытозь, Салимзян агай но Назия апай дорамы вуизы.

Назия апаен Салим­зян агай вить пиналъёссэс будэтӥллям. Али дыре ныл­пиоссы пӧртэм интыосын уло. Витьтон сизьым ар та­лэсь азьвыл кылдэм семья­зы пӧртэм шуг-секытъёсын пумиськем. Озьы ке но куз­палъёс сётӥськиллямтэ, туннэ нуналозь но улон сюрессэс ӵошен азьланьто.

- Синъёсы шуген адӟо, вить нылпиосмы пӧлысь кыкеныз люкиськоно луим, бӧрдыса ик синъёсы быризы, дыр, – вера Назия апай.

Ужан сюрессы но капчи луымтэ кузпалъёслэн, Назия апай фермаын скал кыскем, Салимзян агай тракторен но ужам, фермаын скотник луы­са но тыршем. Салимзян агай пичи дырзэ тодаз вайыку, синъёсыз нюромизы, куараез дырекъяны кутскиз. Вератэк но валамон: куамынэтӥ аръ­ёс бере вордӥськем ворго­ронлы улонлэсь вань секыт­сэ, курытсэ веръяно луэм. Сютэм улон, анай-атаезлэсь вазь люкиськон, кык пичи дыдыоссэ будэтон - ваньмыз пиосмуртлэн пельпум вылаз усем.

- Агае тракторен ужа, мон сьӧраз ветлӥсько, дышет­скисько. Лумбытэн ужась­комы, нош ужмес одӥг пуньы пызен дунъяло. Кӧт тыры­мон сиытэк, анай-атайлэсь жалямзэ-мусоямзэ адӟытэк будӥмы. Вакыт сыӵе вал, мон гинэ озьы ӧй буды, милям ёзъёслы трос секытлыкез адӟоно луиз. Милемлы сютэм улонэз, курадӟонэз, ожмась­кон аръёсты, матысь адями­остэ ыштонэз чидано луиз. Туала пиналъёс милесьтым адӟонъёсмес туннэ киноысь гинэ учко на. Медаз адӟе соос улонын сыӵе секытлыкъё­сты. Улонмы капчи, шудо мед луоз, – вера Салимзян агай.

Кузпалъёсын матэ тод­матскыса, соослэн сюлэм шунытсылы, улон шоры ля­кыт учкыны быгатэмзылы пайми. Кематэк кузпалъёс бадӟым юбилейзэс пусъёзы, Салимзян агайлы южтолэзе тямыстон арес, Назия апай­лы куартолэзе сизьымдон вить арес тырмоз. Пӧртэм секытлыкъёсты адӟыса, пыр потыса, адямилыксэс но ӟеч мылкыдзэс ыштымтэ куз­палъёслы сайкыт нуналъёс но шумпотон сӥзем потэ. Азь­пал нуналъёссы пӧртэм шум­потонъёсын но ӟеч иворъё­сын тырмемын мед луозы.

Ирина САМИГУЛОВА.

Калтасы ёрос.