Кема ӧвӧл Татышлы ёросысь Арибашысь Гульсария но Ришат Давлетьяновъёсын пумиськылӥ. 22 ар ӵоже нылпиослы тодон-валан сётон удысын тыршем кышномурт малпамтэ шорысь крестьян хозяйство кылдытэм. Табере со бусы гыронэн, ю-нянь будэтонэн тунсыкъяське.
- Фермер луэмелы ачим но паймисько, - вераськон мытыса шуэ Гульсария Максимовна. – Кема аръёс ӵоже пиналъёс пӧлын ужай. Уж сюресме чутрак воштон сярысь малпанэ ик ӧй вал. Улон ӝог азьлань дыртэ, выль ужъёсты но «шӧмъям» потэ кадь. Гурт удысын но ас кужымме эскереме потӥз. Кылем арын «Поддержка начинающих фермеров» кун программае пыриським. Отын 1,5 миллион манет тыр грант утӥм. Со коньдон нырысетӥ вамышъёс лэсьтонын бадӟым юрттэт луиз.
- Уждэс Тӥ ма бордысен кутскиды? – юасько кышномуртлэсь.
- Нырысь семьяын кенешим, ужкагазъёс люкамы, бизнес-план дасямы. Собере ини йӧ вырӟиз. Та ужам мыным бадӟым юрттэт возьматэ кузпалы Ришат Мансурович. Грант утыса пыртэм коньдонлы МТЗ-82 Беларусь, пресс-подборщик басьтӥмы. Туннэ нуналэ огъя 10 техника лыдъяське. Ужась киослы ум ёрмиське, ми дорын кызь адями тырше. Ужасьёсынымы удалтӥз: ваньзы соос тыршисесь, ужзэс валаса ужало, - шумпотыса вера Гульсария Максимовна.
Давлетьяновъёс та ужзы борды кылем арын гинэ ке но кутскизы, туэ соос трос ю тысь басьтӥзы. 270 гектар гыроно-кизёно бусыосазы соос йыды но чабей будэтӥзы. Кутскем ужзэс азинтыны юрттэмез понна, соос Татышлы ёрос администрацилы пумтэм тау карон кылъёссэс верало.
- Улондэ музъемен герӟад ке, азьланяз вань малпанэд музъем сярысь луэ вылэм. Вашкала дырысен асьме калык музъем ужъёсты быдэсъяса улэм. Няньтэк улон уг луы. Секытлыкъёслэсь кышкаса улӥд ке, ӧк выламы ноку нянь уз вуы, - вера кивалтӥсь.
Альфия САЛИМГАРАЕВА.
Татышлы ёрос.
Оставить сообщение: