icon_gotop
18+
autorisation
Войти | Регистрация
Время в Татышле
10:38
Четверг, 29 Июля
Рекламный баннер 990x90px top

Удмуртъёсты «бугыръясь» Ukmort Шамшияров

2014-10-09

Анаез Лилия Менгази­евна культура юртын ужам бере, Георгийлы со вить арес дыръяз ик арган басьтэм. Пичи пияшлы крезьгур нёжъ­яны туж кельшем. Аресэз мынэмъя, со чебересь бигер гуръёсты пӧрмытъяны кут­скем. Бӧрысь удмурт гуръёс борды но басьтӥськем. Со ды­рысен, пе, арганзэ нокытысь но уг кельтӥськы ни. Арганэз ик юрттэ солы калыкез ас котыраз люканы, удмуртъё­сты огазеяны. Георгий Ольга кузпалэныз «Урал кенеш» огазеяськонлэн ёзчиосыз луо. Соос кема аръёс ӵоже ини Екатеринбургын уло но Сверловск улосвылын улӥсь удмуртъёсты огазеян бордын тыршо. Кызьы ве­рало кузпалъёс, улоназы, пе, ваньмыз умой вал: ужзы вань, семьязы юн возиське, нылпиоссы визьмоесь луыса будэмын. Озьы ке но маке ӧз тырмы кадь, лул-сюлэмзы ялан пытсаськылӥз. Бадӟым мегаполисын ас калыкедлэсь мӧзмон мылкыд «сюпсьыса» улӥз, пе. Удмуртлыкез утён сярысь сюлмаськон арысь аре малпанъёссэс бугыръяз. 2008-тӥ арын «Урал кенеш» огазеяськонэз кылдытыса, соос удмуртъёсты огазеян уж борды пыр-поч кутско. Георгийлэн арганэз но юрттэ. Нырысь пӧртэм городъёсысь удмуртъёсын кылдытэм ан­самбльёсын кусып тупато. Георгий арганзэ кутыса кон­цертъёсын шудылӥз, Ольга кырӟаз. Собере асьсэос «Ош­мес» ансамбль кылдытӥзы. Пумен пӧртэм гуртъёсы но ӵошен поталлязы, котькы­тысь удмуртъёсты утчаны тыршизы. 2007-тӥ арын Дег­тярск городын нырысьсэ «Гербер» удмурт праздник ортчыто. Доразы куное Бран гуртысь песянайёс но вуыло. Ай соку соос «Евровидение» но вуылымтэ на вал. Нош Свердловск улосвылын улӥсь удмуртъёслы коллективзы соку ик туж кельшыса кылем. Мукетыз тужгес тодэ кыльы­мон пумиськонзы «Арган­чи» ансамблен луэм. Солэн кивалтӥсез Екатерина Лео­нидовна Антонова сюлэмзэс соку ик бордаз кыскем.

- Учкиськом шораз но пай­миськом. Сыӵе со шаплы, мы­ло-кыдо. Кырӟа, эктэ, арганэн но шудэ. «Арганчиос» туж бадӟым кужым сётӥзы, шоразы учкыса мылкыдмы утскиз. Удмуртлыкмес утон ужмы борды азьлолэсь но золгес кутским. Ма, кинлэсь ке возь­маса улод, асьмелы тыршо­но. Удмурт калыкмы тани котькытын но вань. Учке, паймелэ милям калыкмылы, тодэлэ удмуртъёсты шуыса вераммы потӥз, – тодазы ваё Шамшияровъёс. Тазьы верано ке, ваньзэ ӧвӧлзэ Сверд­ловск улосвылын ог 25 сюрс пала удмуртъёс уло. Соос Дегтярск, Реж, Ревда, Екате­ринбург, Каменск-Уральск го­родъёсын уло. Та городъёсын пӧртэм удмурт коллективъёс кылдылӥллям. Кытын ке соос али но вань, кудъёсыз кема возиськыны быгатӥллямтэ. «Урал кенеш» огазеяськон «Бускель пумиськон» фести­валь ортчытъянын кичӧлтӥсь луэ. Арлы быдэ соос доразы пӧртэм удмурт ансамбльё­сты, удмурт эстрадаысь тод­мо «кизилиосты» пумитало. Соос доры куное Николай Анисимов, Ирина Пчелово­дова, Алёна Тимерханова, Анна Плотникова, Геннадий Ганьков вуылӥзы ни. Со сяна, Удмурт Элькунысь пӧртэм ёросъёсысь ансамбльёсын ваче пумиськонъёссы ӵем луыло. Куноосты ӧтчан, пу­митан, куноян сяна, асьсэос но пӧртэм ужрадъёсы пырись­кыло. Ансамбльзы Удмурт Элькунын, Пермь шаерын ортчоно ужрадъёсы ӵем ву­ылэ. Свердловск улосвылын улӥсь удмуртъёс кырӟан-эктонъёссы пыр палэнэ кош­кыса улӥсь удмуртъёслэсь пӧсь саламзэс вутто. Паймы­тэ соиз: татысь удмуртъёс ӵем дыръя ужрадзэс нокыӵе коньдон юрттэттэк ортчы­то. Котькуд малпам ужзылы асьсэ кисыысьтызы конь­дон поттоно луо. Озьы ке но котьку огкылысь кариськыса ужало. Георгий монтажной колледжез горд дипломен йылпумъяса, утӥськон уды­сын тырше. Прораблэсь ужзэ быдэсъян висказ арганзэ кутыса лулысь-сюлмысь ас удмурт калыкез понна тырше. Ольга азьвыл заводын ужам, нош али личной няня луыса тырше. Бадӟым нылзы Юлия, театральной институтэз йыл­пумъяса, али дыре Москваысь Художествоя академической театрын (МХАТ) ужа. Пичи­ез Вика нылзы бухгалтер, дышетсконзэ экономиче­ской институтын азьланьтэ. Вераськонмес йылпумъяса Георгий шуиз:

- Милям ужмы «гольык» энтузиазм вылын ке но воз­иське, чик уг жаляськы. Уд­мурт «визьтэмлыкмы» вань ай, ветломы, удмуртъёсты бугыръяломы. Улон одӥг пол гинэ сётӥське, ас кылыдлы, ас калыкедлэсь культуразэ азинтонлы сӥзьыса лэсьтэм вамышъёсмы юнме уз луэ. Кы­дёкын улыса но удмуртлык­мы медаз быры, медаз безды. Мукет калыкъёслэсь адӟем карыса, асьмелы, удмуртъёс­лы но азинсконо, азьлань мынон сярысь сюлмаськоно.

Озьыен, Ukmort Шамши­яровлэн малпанъёсыз но выль ужъёсыз улонэ капчиен пыџаса мед мынозы. Солэсь адӟыса, мукет удмуртъёс но оло вырӟозы - сайкалозы. Ӟечез ук котьку сюлэмез бордаз кыскыны кулэ.

Ирина САМИГУЛОВА.

1714

Оставить сообщение:

НАШИ ПАРТНЕРЫ