icon_gotop
18+
autorisation
Войти | Регистрация
Время в Татышле
16:13
Четверг, 28 Октября
Рекламный баннер 990x90px top

Шумпото пичиос – выль садэ ветло соос

2014-09-25

Со дырысен кема дыр ӧз ортчы, ми нош ик Татышлы ёросысь Выль Татышлы нылпи садэ куное вуимы. Таиз вуонмы­лэн мугез шумпотымон: азь­выл колхозлэн правлениез интыяськем юртын тупатон ужъёс мынӥзы. Ёрос админи­страцилэн кичӧлтэмезъя, вакчи дыр куспын та юртэз нылпи садлы пӧрмытӥзы. Табере гурт шорын сылӥсь нылпи садлэн выль юртэз пичиосты ӵукналы быдэ шумпотыса пумита. Кык этажъем юртлэн выль ук­ноосыз пальпотыса учко. Вуюись буёлъёсын тырмем кенеръёс но нылпи садэз шулдыр котырто, мылкыдэз ӝуто.

- Нылпи дуненнелэн шудо интыез. Таӵе яркыт буёлъё­сын тырмем, выльмем юртын ик ортчыны кулэ пичиослэн жингрес нуналъёссы, - ас поннам малпаськыса выль­мем юртэ кожисько. Татын монэ нылпи садэн кивалтӥсь Ольга Ивановна Константи­нова пумита. Ольга Ивановна азьвыл Выль Татышлы шко­лаын ужаз. Нош нылпи садэн кивалтон ужез ас вылаз «ныпъямез» бере ик, солы ӟырдыт уж борды кутсконо луиз. Кивалтӥсь ужъёсыны­зы тодматыса вераз:

- Нылпиосмылы таӵе бадӟым, выльмем юртэ вы­жон возьмамтэ шорысь дуно кузьым выллем луиз. Ужъ­ёсты радъяны В. Н. Магзу­мовен кивалтоно бригада басьтӥськиз. Анай-атайёс но палэнэ ӧз кыле, техника ласянь, пӧртэм ужъёсты бы­дэстон пумысен бадӟым юрт­тэт возьматӥзы. Нылпи сад­мылэн коллективаз ужасьёс но трос кужымзэс понӥзы. Выль юртэ выжон нуналмес вуттон понна, ӵошен трос сюлмаськимы, тыршимы.

Азьвыл правление луэм юртамы трос выльдӥськонъёс, воштӥськонъёс кулэ вал, аз­барысен ик ваньзэ воштоно луимы. Ӝужытэсь писпуо­сты погыръямы, жуг-жагез тазатӥмы. Вуоно нылпи сад­мылэсь пушсэ но, вылӥзэ но лэсьтӥмы. Шумпотымон соиз: табере ваньмыз выль. Мебель но ваимы, пиналъёсмы понна нимысьтыз кӧлон, сиськон, шудон висъетъёс тупатэ­мын. Таӵе бадӟым ужез огъя кариськыса гинэ лэсьтыны луэ. Соин ик котькуд анай-атайлы, коллективысьтымы ужасьёслы, гурт поселенилэн, «Дэмен» СПК-лэн кивал­тэтэзлы пумтэм тау карон кылъёсме верасько. Ёрос ад­министрацилэсь, ёросысь ды­шетонъя ёзэтлэсь юрттэтсэ но котьку шӧдыса улӥськомы.

Вераськеммыя Ольга Ивановна мыным нылпи са­дэз возьматэ. Выль ковёръ­ёс вылтӥ небыт вамышъяса ми радэн сылӥсь висъетъ­ёсы кожылӥськомы. Одӥгаз висъетын пичи тренажёръёс пуктылэмын. Пиос но нылъёс лӧптэм мылкыдын соос ко­тырын бергало. Пиос рульзы борды кутӥськыса бызись дорожкаос вылын пыдъёссэс усто возьыны дышетско.

- Толон гинэ тренажёръ­ёсмес интыямы, нош ерпеч­каос выль макеосын вырыны дышетскизызы но ини, куд­дыр милемыз но дышето, – пичи пиослэн выремзы шоры учкыса пальпотэ Оля апайзы.

Мукетыз висъетэ кожыку, радэн-радэн сылӥсь выль шо­бретъёсын но миндэръёсын кӧлон интыос синэз бордазы кыско, туж мусо адӟисько. Нош куинетӥвисъет пичи­ослэн мисьтаськон интызы луиз. Пичи раковинаос, одӥг радэн ошылэм ӵушконъёс мисьтаськон интыез туж мусо возьмато. Выль пичиесь унитазъёс гинэ но аспӧртэм мусо адӟисько, пичи кузёоссы сярысь пальпотыса верало кадь. Кык этажъем нылпи садлэн шулдыр юртаз ветлы­тозь тодӥ: татын 50 пиналъ­ёслы инты дасямын. Али дыре пичиослы но бадӟымъёслы группаосын быдэн кызь вить пиналъёс лыдъясько. Выль Татышлы гуртысь нылпи­ос сяна, нылпи садэ Майск гуртысь пиналъёс но ветло. Коллективазы Светлана Мул­лаярова, Алина Шаритдинова, Нина Гайниярова, Занфира Шайхуллина, Надежда Шарт­динова, Нина Самигулова, Валентина Бадретдинова, Зиннат Даутов, Александр Галиев ужало. Али дыре Та­тышлы ёросын гуртысь нылпи садъёс пӧлын та выллем ныл­пи сад одӥг гинэ, пе. Жингрес куараосын тырмем нылпи дуннеысь потыку шумпотыса малпай: нылпиосмы шудоесь, соос понна гуртамы таӵе че­бер, выль юрт ужаны кутскиз. Нош нылпиосмы шудо ке, ась­меос но шудо, гуртмылэн че­бер вуоноезлы оскон но вань.

Ирина САМИГУЛОВА.

Татышлы ёрос.

2466

Оставить сообщение:

НАШИ ПАРТНЕРЫ