icon_gotop
18+
autorisation
Войти | Регистрация
Время в Татышле
14:23
Sunday, 17 Октября
Рекламный баннер 990x90px top

Кышкыт аръёсы кылем пичи дыр

2014-09-25

- Азьло улон туж секыт вал. Озьы ке но улыны тыршим. Тодон-валан басьтон сярысь но тросэз сюлмаськизы. Лыдӟыны, гожъяськы­ны быгатӥсьтэм адями мар карыны пӧрмытоз? Тетрадь, чернила ӧвӧл вал. Муръёлэн шуменыз гожъяськем дыръёс но луизы. Сумкаосмы - фане­ралэсь лэсьтэмын. Со ужен Курга­кысь одӥг песятай выре вал. Бускель гуртын сыӵе лэсьтӥськись ӧй ке луысал, оло сумка шуон маке но ӧй луысал, дыр. Туала улонмы каньыл. Мар сиемед потэ – ваньмыз вань. Шу­ныт коркан улӥськом, - шуэ песянай.

Вераны кулэ, нокыӵе луонлыкъ­ёстэк но, азьло адямиослэн дышет­скон мылкыдзы бадӟым вылэм.

- Гожъяськыны тетрадь луымтэ­ен, атайлы гожтэт ыстӥ, гожъяськы­ны кагаз курыса. Гожтэтэлэсь атай кие вуэмзэ ӧй ке но тоды, сюлмам осконэ котьку улӥз. Малпанэ бы­дэсмиз: атай мыным туж бадӟым зӧкталаё альбом но перо келяз. Соку шумпотонэлэн пумыз но ӧй вал. Али но син азям со альбомлэн вылтусыз, - веранзэ азьланьтэ Дания песянай.

Ож аръёсы тушмон киослэсь сяна, сютэмлыкен курадӟыса кулэмъёс но трос луиллям. Дания песянай но со сютэм аръёсты пыр потэм. Вазь ӵукна султыса, шур дуре сьӧд пот бичаны бызьыса васькемзэ песянай ноку уг вунэты. Тодэ ваёнъёсыз сое ӵемысь ортчем аръёсаз берыкто:

- Яра скалмы вань вал, со потэз йӧлэн сураса кӧтмес тырылӥмы. Али пудоез но озьы уг сюдо ни. Веръямтэ турын-куар но ӧз кыльы. Картофка нянь интыын вал. Ог арын картоф­каез кын кутӥз, сютэм куломы, дыр, шуиськом вал. Тямыс пуд ӟеген кӧттэ тырод шат? Ож йылпумъяськем бере но ческыт нянь ӝӧк вылъёсын ӧй вал на. Нош толъёсы? Кезьыт куа­зен курадӟемъёсты вераса но уд быдты. Эстыны пу ӧвӧл. Ыль ньӧр тӥяса ваиськом, соин корка шун­тыны выриськом. Кӧс путэк корка шунаны чик уг малпа. Шуныт дӥськут сярысь веранэз ик ӧвӧл. Али куноын кадь улӥськом. Сыпыр-сыпыр шуныт коркан кӧлыны выдӥськом, шуныт коркан султӥськом.

- Атайды бен ожысь берытскиз-а? – юасько Дания Байтимировналэсь.

- Бертӥз, нылы, бертӥз. Кебитын ужаса пенсие потӥз. Пие кузпалъ­яськем бере, одӥг арскын улонысь кошкиз.

Дания песянайлэн пичи дырыз гинэ ӧвӧл, егит дырыз но секыт аръ­ёсы тупам. Ужась киос тырмыт луым­тэен, котькыӵе ужез со быдэсъям.

- Тулыс кизён ужъёслэсь азьвыл Янаулэ кидыслы лэзёзы вал. Пыдын - кут. Дэриен, вуэн суро лымы вылтӥсалазки кыскыса ветлэм дыръёс трос луизы. Нуналаз берытскыса бертыны ум вуиське. Одно ик кыӵе ке но гуртэ кӧлыны кылиськом. Кизён вакытэ бусые пичи уробоен кидыс поттаськом вал. Ужамтэ уж ик ӧз луы, лэся, - малпанъёссэ шарая Д. Тимиршина.

Тямыстон кык ар бере кылемын. Трос-а со? Егитъёс, со аресэ вуымтэ адямиос понна трос но, дыр. Нош Да­ния Байтимировна понна, со – шӧдтэк шорысь ортчем гумыр. Секытсэ но, курытсэ но, шӧгзэ-кузьытсэ но со веръям. Улоназ шудо, шумпотон минутъёсыз но песянайлэн ӧжыт луиллямтэ. Трос дыръя солэн тыбыр пыкъетэз луэм Валерий пиез. Туннэ нуналэ песянайез кык внучкаосыз, ньыль внукъёсыз шумпотто.

- Пиналъёс таза мед луозы. Ми­лесьтым адӟеммес соослы адӟыны медаз кылды. Улонмы шыпыт медло, - келяськыса шуиз песянай.

Миляуша БУЛАТОВА.

Калтасы ёрос.

2613

Оставить сообщение:

НАШИ ПАРТНЕРЫ