Котыре шулдыр мылкыд пазя

Мынам таиз герое Татыш­лы ёросысь Улысь Балтач гуртын улэ, татысь культура юртын ужа. Со эктӥсь но, крезьгуръёс тупатъясь но.

Культура удысэ Дмитрий Тархановез эктонэз яратон мылкыдыз ваиз. Школаын ды­шетскыкуз ик Дима бальной эктонъёсын тунсыкъяськиз. Пӧртэм кружокъёсы ветлы­са, аслэсьтыз быгатонлыксэ волятӥз. Тюмень улосвылысь Урай городын улӥсь семьязы 1995-тӥ арын Улысь Балтаче, анаезлэн вордскем палъёсаз бертэ. Нырысь нуналъёсы­сен ик эктыны быгатонлык­сэ адӟыса, культура юртэн кивалтӥсь Ирина Абзатовна Шайхлисламова Димаез до­разы ужаны ӧте. Со пӧртэм ужрадъёсы пыриськыны кут­ске, чебересь эктонъёсыныз учкисьёсты шумпоттэ. Со ды­рысен Дима культура удысын «пӧзе». Нырысь со школаын пиналъёслы эктонъя баль­ной кружокъёсты нуэ. Пӧртэм аръёсы гуртазы, школаязы, культура юртазы ортчись котькыӵе ужрадын «Реве­ранс» ансамблез адӟыны луиз. Ансамбле ветлӥсь пи­налъёс ёрос конкурсъёсы но ӵем пыриськылӥзы, грамо­таослы, дипломъёслы кузё луизы. Лулчеберет дунне­ын ужась Дималэн сюлмаз шуак выль мылкыд кылдэ. Со крезьгуръёслы оранжиров­каос лэсьтон борды кутске. Куараосъя режиссёръёслэн ужез сое кемалась ини бор­даз кыскем. Нош ас кожаз та уж борды кутскыны Дималы интернет юрттэ.

Верало ук, котьмалы мыл­кыд гинэ мед луоз. Дима пӧртэм программаосты ды­шетэ, видеоурокъёсты, виде­окурсъёсты эскерылэ, учке, аслыз кулэзэ тодаз кель­тэ. Ӝоген тыршемез выль емышъёссэ сётэ: Дима ачиз нырысетӥ фонограммазэ пӧрмытэ.

- Нош кудӥз уж секытгес луэ, эктон яке оранжиров­каос вылын ужан? – юасько Дималэсь.

- Кудӥз секыт, кудӥз капчи шуыса вераны уг быгатӥськы. Али дыре эктонлэсь ӧжытак палэнски, крезьгуръёс вы­лын тросгес ужасько. Мыным туж кельше миди-клавиа­тураен вырыны. Аппаратура басьтӥ, дорам ваньзэ ачим дышетӥсько. Мыным электро­никаен вырыны азьвыл но кельше вал. Нош али та уж монэ быдэсак бордаз кыскиз. Пичи гинэ ваньмон дыры луэ ке, соку ик компьютер сьӧры пуксисько. Оранжировкаос лэсьтыны курыса вазиськи­сьёс но трос. Кырӟанъёслы плюсовкаос, минусовкаос лэсьтыны курыса дорам ӵем лыктыло. Маин быгатӥсько, юрттӥсько, – вера Дима.

Тани со вераськон ку­спамы кыӵе ке тунсыко про­граммае пырыса мыным выль «пӧрам» ужзэ возьматэ. Ко­тыре чебер удмурт крезьгур вӧлме.

- Таиз берлось уже,– паль­потыса шуэ Дима.

- Тӥляд культура юртады капчи, дыр, ужаны, оранжиров­щик, крезьгуръя режиссёр ут­чанэз ик ӧвӧл? – юасько Дима­лэсь. Нош ачим тодам ваисько школаын организатор луыса ужам аръёсме. Кыӵе секыт вал соку выль кырӟанъёслы фоно­граммаос шедьтыны. Кырӟась пиналъёс но вань, кырӟан но дышетэмын, нош сцена вылэ потон понна одно ик ӟеч фоно­грамма кулэ.

Пумитам Дима пальпо­тэ гинэ. Таланто адямилэн ужъёсыз трос на, чебересь планъёсын тырмыса Дима азьлане учке. Крезьгур дунне­ен тырмем улоназ со выль юрт ӝутонлы, кык пиоссэ будэтон­лы но дыр шедьтэ. Аня куз­палыныз сузэрезлэсь куинь нылъёссэ но утьыны вӧзазы басьтӥзы. Пӧртэм ласянь та­ланто адями, яратоно кузпал но атаймурт, зэмос воргорон, матысьёсызлы но семьяезлы гажаса учкымон луэ.

Ирина САМИГУЛОВА.

Татышлы ёрос.