Шулдыр пумиськон

Таиз бадӟым ужрад дас кыкетӥез луиз. Ужрадын, Свердловск улосвы­лысь 160 пӧртэм калыкъёс пӧлын, удмуртъёс но асьсэ лулчеберетсэс данъяса возьматыны быгатӥзы. «Эгес» удмурт огазеяськонэ пы­риськись ёзчиос «удмурт азбар» тупатӥзы. Отын вашкала удмурт арбериосын адӟытон радъямын вал. Екатеринбургысь «Азвесь гур», Дегтярскысь «Италмас», Ревдаысь «Чусву» но Каменск-Уральскысь «Улон» фольклор ансамбльёс Губер­наторлэн администрациысьтыз но Правительствоысь вылӥкуноосты шулдыр кырӟанъёсын, шаньгиен-ня­нен, чечыен но пӧсь чаен пумитазы.

Та бадӟым праздник пӧртэм ка­лыкъёслэн Спартакиадаенызы кут­скиз. «Эгесэ» пыриськись пиналъ­ёсмы, егитъёсмы но ӵошатсконъёсы азинлыко пыриськизы. Соослы тужгес матын луизы волейбол но тен­нис. Малпасько, соослэн мылкыдзы уз кысы, азьланяз вормисьёс радэ потозы.

Бадӟым люкаськон шулдыр кырӟанъёсын но эктонъёсын йыл­пумъяськиз.

Марина ЯГУТКИНА,

Свердловск улосвылысь «Эгес» огазеяськонлэн тӧроез.