icon_gotop
18+
autorisation
Войти | Регистрация
Время в Татышле
13:47
Пятница, 29 Марта
Рекламный баннер 990x90px top

Кышканлэн синъёсыз бадӟымесь

09:31 11.09.2014

Трос кор­каослэн липетъёсысьтызы шиферъёс но профнастилъёс лобылэмын. Укноме усьтыса одӥг воргоронлэсь юай:

- Кониговоын но таӵе ик сильтӧл лекъяськиз-а?

- Отын татынлэсь но кӧшкемытгес, шуо, - вазиз со. Та кылъёсты кылэм бере, сюлэме кин ке но бышкалтӥз кадь. Асме буйгатыса сю­ресме азьланьтӥ. Янаулэз ортчем бере сюрес дурысь вылӥвольтъем линиысь чигтылэм юбоосты адӟи. Конигово вӧзы вуыкум, гурт вӧзысь 30 метрлэсь ӝужыт топольёс син шоры йӧтӥзы. Писпуос вайёстэк сыло, куд-огез чигтэмын яке выжыосы­нызы ик погыртэмын. Сыӵе кошкемыт суредэз адњыса, кузпалэлы вазиськи:

- Финария, мынам Кони­говое бырем.

Берлогес липетъёстэк кылем коркаос син азе йӧтӥзы. Гуртэ пырыкум сю­рес дуре интыям трос ма­шинаосты адӟи: гуртоослэн ӵыжы-выжыоссы юрттыны вуылӥллям. Соин ураметӥмашинаен ортчыны инты ик ӧвӧл. Та вакытэ кин ке ураган бервылысь жуг-жагез уробоосы тыре. Пӧлазы тӧлперилэсь «ужзэ» учкыса калгисьёс но ӧжыт ӧвӧл. Со­ослы сюрес вылысь шифер но пияла кесэгъёс, чигтылэм электроезъёс но уг люке­то. Гурт электротылтэк но чагырэстӥськонтэк кыле­мын.

Ӝожмыт куараен бӧксӥллям

Тӧлпери Кониговое ӝытазе 7 часлэсь азьло вуэм. Нырысь зорыны кутскем. Соин ик гуртын улӥсьёс тросэз коркаосазы пыриллям. Озьы гурт калык инкуазь бугыръ­яськемлэсь утиськыны вут­скем. Нокин но сӧсырмымтэ, кулымтэ. Рамис Баширов сильтӧл вуыку азбараз вы­лэм. Шиферъёслэсь лобамзэс адӟыса кышкам но туалетаз ватӥськем. Тӧл сое туалетэн ӵош ӝутэм. Оло, пе, нуысал но, туалет вылэ олокытысь профнастил усьыса, сое ӧй ке уськытысал.

Андрей Гарипов пиез­лэн нылыныз гаражаз ватӥськиллям. Та нуналэ гурт пудоосты Валерия но Герас Зидияровъёс возьмал­лям. Соос верамъя, тӧлпери вуыку скалъёс тросэз йыръ­ёссэс вылэ ӝутыса ӝожмыт куараен бӧксӥллям. Собере шӧдтэк шорысь ваньзы Шады шур пала туж ӝог вортты­ны кутскиллям. Асьсэды, пудо возьмасьёсты, бадӟым кужмо тӧл пыд вылысьтызы погыртэм. Олокытысь, пе, кужым поттыса султӥмы но пудоос сьӧры бызимы. Ыжъёс ворттыкузы ог- огзэс лёганы кутскиллям. Зидияровъёс пограм пудоосты ӝуткаса азьпала улляллям. Со вакы­тэ Костиново гурт палан туж югыт луэм: тӧлпери пурысь пилемъёсты ас котыраз лю­кам.

Дэмен кариськыса

Та нуналъёсы Конигово­ын ваньмыз 49 коркаос вань. Соос пӧлысь 10-эз сильтӧл кузёяськыку липеттэк кы­лиллям, нош одӥгез, Павел Шараповлэн кык этажъем коркаез, куашкам. Тайфа Се­мёновалэн - интыысьтыз вырӟем. Тӧлпери кык хозяй­ствоосы гинэ йӧтымтэ. Вале­рий Гариповлэн бакчаысьтыз кык тонна секталаё цистер­наез сильтӧл одӥг иськемлы палэнэ сэрпалтэм. Сизьым центнеръем турын рулонъёс 200-300 метр палэнэ кушты­лэмын. Гуртын улӥсь Флюра Баширова верамъя, сильтӧл дыръя картофкаос, кешыръёс но лобаллям. Юрий Зидияров­лэн хозяйствоысьтыз пуныез ышем. Сое тӧлпери сьӧраз нуэм, лэся…

Конигово вӧзти бызись Шады шур дуре но васькылӥ. Отын тополь вайёсы бинись­кем но музъем вылын ко­стаськись профнастилъёс, дӥськутъёс но миндэръёс, чигылӥськем липет коръёс но пулъёс, пильылӥськем шиферъёс костасько.

30-тӥгудырикошко­нэ ӵукнаысен ик Кониго­воын сильтӧл бервылысь жуг-жагез октыны кутскизы. Юрттыны вуизы гуртоослэн ӵыжы-выжыоссы, эшъёссы, тодмоосы но МЧС-ёс. Нош «Победа» ООО, «Дружба» СПК но фермер Альфир Га­лимзянов техника висъязы. Пӧсь шыдэн но ӝукен сюдӥзы ужбергатӥсь Л. Г. Валиев, «Победа» ООО но Шудек шко­ла. Озьы ик газовикъёс но электрикъёс ужазы. Соослэн тыршемзыя Кониговоын 30-тӥгудырикошконэ ӝытазе чагырэстӥськон но, электро­тыл но вань вал ини.

«Корка пушкын олома но

лобаз»

Тӧлпери вуон вакытэ Тай­фа Семёнова пересь анаеныз но нылпиосыныз корказ вы­лэм. Со верамъя, педлон аспӧртэмлыко гу-у-у-у! куара кылӥськем. Шӧдтэк шорысь пеймыт луэм но олокытысь шифер укнояз лобӟыса пырем, ӧсэз усьтӥськем.

- Мар гинэ ӧз лоба меда корка пушкын: телевизор, шифер кесэгъёс, куаръёс, ту­рын но тузон. Собере корка интыысьтыз вырӟиз но гур шо­рияк пилиськиз. Кызьы меда улэп кылимы? - вера Тайфа Хасватовна. Солэн коркаез тупатъяса улыны уг яра ни. Соин ик Семёновъёслы выль корка пуктозы. Туннэ нуналэ фундамент кисьтэмын ини. Кезьытъёс вуэмлэсь азьло выль юрт пуктэмын луоз.

«Тӧлпериез но,

президентэз но адӟи»

- Мон пичи дырысен зор­лэсь кышкасько. Гудыръяку но чилекъяку гулбече тэт­чисько. Тӧлпери ортчем бере но улэп кыли бере, кема уло на, дыр, - шуэ Нагима Сайфи­ева.

Инкуазь лекъяськыку, Нагима кенак пӧран палаз газ вылысьтыз быректэм чайзэ басьтэ вылэм. Ӵапак соку пи­лиськем шифер укнозэ пильы­са пырем но ӧсэз усьтӥськем. Нылкышно соку ик гулбечаз тэтчем. Нылызлэсь нылпиос­сэ но сьӧраз васькыны косэм. Тӧлпери ортчем бере, Нагима Сайфиева нылпиосыныз ӵош коркасьтыз шифер кесэгъё­сты поттам на. Собере солы секыт луэм. Арлыдо нылкыш­ноез ӝог юрттэт возьматӥсь машинаен эмъюртэ нуиллям. Н. Сайфиевалэн вирзӥбетэз ӝутӥськем. Больницае ныл­кышнолэсь тазалыксэ тоды­ны президентлэсь ужъёссэ быдэсъясь Рустэм Хамитов но пырам. Туннэ нуналэ На­гима кенак дораз ини. Нылпи­осыныз но ӵыжы-выжыосыныз юртсэ тупатъяло.

«Макес лыме вырӟытӥ»

79 аресъем Насим Ахме­тов огназ улэ. Нылпиосыз ӧвӧл. Кузпалыз туэ куарто­лэзе кулэм. Тӧлпери кузё­яськонлэсь ог арня азьлогес картофка пудзэ турнакуз пи­гессэ вырӟытэм. Нош тӧлпери вуыку туж кышкам. Корказ зӧк шобрет улэ ватӥськыкуз, макес лызэ вырӟытэм. Арлы­до воргорон улыны малпа на. Солэн коркаез улыны яра­мон, туннэ нуналэ тупатъя­мын но липемын ини.

«Выль коркан кык арня гинэ улӥмы»

Кузпалъёс Людмила но Павел Шараповъёс пенсие по­тыса Конигово гуртын улыны малпаллям. Уго Павел Шара­пов та гуртын вордӥськемын но будэмын. Соин ик Шара­повъёс Кониговое кык этажъ­ем корка ӝутӥллям.

- Мон мунчо эстӥсько вал. Педлон дыбыр-дабыр куара кылӥськиз, - шуэ Павел агай. Воргорон мунчо ӧссэ усьтэм но йыр йылысьтыз мунчо ли­петэзлэсь лобӟемзэ адњем. Шарапов мунчо ӧс висказ султыса тӧлперилэсь утись­кем. Нош кузпалыз гужем пӧран юртазы вылэм. Огзы но сӧсырмиллямтэ. Тӧлпери ортчем бере азбаразы потыса куашкам корказэс адӟиллям. Шараповъёслэн но корказы тупатыса улыны уг яра ни. Со­ослы но выль корка пуктыны юрттозы.

Йылпумъян интые

Та вакытэ Кониговоын тупатъяськон ужъёс мыно. Кинлы ке но ӵыжы-выжыоссы, эшъёссы но тодмооссы юртто. Озьы ик Балтач ёросысь, Бла­говещенскысь, Агидельысь тупатъяськись бригадаос тыршо. Коньдон висъяз Баш­кортостанысь Правитель­ство.

Артём НИКИТИН.

Янаул ёрос.

6511

Оставить сообщение: