Лагерьлэн тулкымъёсаз лэйкасько

«Шундыкар» лагерь пӧртэм малпанъёсты, мыл­кыдъёсты тулкымъяськытэ. Со дуннее пырид ке, потэ­мед но уз поты. Лагерьлэн шӧмыз кема аръёслы сюлэме пыӵалоз. Таяз гужеме мыным но «Шундыкарын» шутэтскыны шуд усиз. Со 10 нунал куспын милемлы трос пайдаёзэ, ӟечзэ, умойзэ сётӥз. Вожатойёс но ӧнерчиос пиналъёсын ӵош паймымон ужъёсты быдэсъяло. Кылсярысь, шундыкарчиос дӥськут-дизайн, суредаськисьёс, эстрада, проектирование, фольклор, литература, театр, журналистика, крезь лэсьтон, видеоискусство отрядъёсы пыриськылӥзы. Отын тодон-валанзэс бу­дэтэм пиналъёс пӧлын, Уд­мурт Элькунысь сяна, Марий Элысь,Татарстанысь вуэмъёс луизы. Нош Башкортостан отчы ньыль нылъёссэ келяз. Монэн ӵош «Шундыкарын» шу­тэтскизы Татышлы ёросысь Выль Татышлыысь Линда Гильманова, Калтасы ёросысь Бадӟым Качакысь Светлана Галиахметова, Янаул ёросысь Выль Варяшысь Диана Наси­буллина.

Ӝог лобӟизы шутэтскон нуналъёс. Нош ӝытъёсы тылскем котырын пукем, сюлмысь вераськем сярысь малпанъёс кема ӵоже мал­панъёсам улозы, пель сьӧрам вожатойёсмылэн жингрес куараоссы чузъяськозы. Мон али ке но «Шундыкарлэн» ненег тулкымаз лэйкасько. Туж мӧзмисько выль шедьтэм эшъёсылэсь, лагерьлэсь. Тау, «Шундыкар», тон вань шуыса. Котьку мед пиштоз шунды!

Валерия ГАЙНИЯРОВА.

Татышлы ёросысь Улысь Балтач школа.