icon_gotop
18+
autorisation
Войти | Регистрация
Время в Татышле
10:14
Четверг, 29 Июля
Рекламный баннер 990x90px top

Паськытэсь урамъёсын – чебересь юртъёс

2014-08-07

Нош туннэ милемыз сюресмы Ян­темир Минлиахметов доры вуттӥз. Гуртсы сярысь со, пе, тросгес вераны быгатоз. Уго Янтемир песятайлы 88 арес тырмемын ни. Озьыен, со гурт­сылэсь быдэс даурлы матэ историзэ тодэ.

- Гуртмылэн кӧняетӥаръёсы кыл­дэмез сярысь вераны уг тодӥськы. 1930-1931-тӥаръёсы колхозъёс кыл­дыны кутскизы. Соку ик гуртамы кык этажо школа усьтӥськиз. 1934-тӥарын мон отчы нырысетӥклассэ мынӥ. Нош кыкетӥклассэ ни ньыль классъем выль школае вамыштӥ. Али дыре отчы гурт хозяйстволэн правлениез интыяськемын. Классамы ми си­зьым дышетскисьёс вал. Угось азьло аръёсы пӧртэм висёнъёслэсь трос нылпиос кулӥзы. Ньыль классъёслы чаклам школаын кема аръёс ӵоже гуртысьтымы Гильмитдин Давлетшин дышетӥз. Сое армие басьтэмзы бере нылпиосты пиез Шарипзян Гильмит­динов дышетӥз. 1940-тӥарын эмъюрт пуктӥзы. Колхозын ньыль полеводче­ской бригада ужаз. Колхозэн Садри Шайхлисламов кивалтоно 1938-тӥарын калыклы тужгес удалтӥз. Уго соку одӥг трудоденьлы тямыс кило пызь таратӥзы. Мукетъёс соку куинь килограмм сяна ӧз басьтэ. Гурт калык бусыын тыршиз, пудо утиз. Ю тысьсэ изыны ву вукое ветлӥз. Отын кема аръёс ӵоже вукочиын граждан но Быдӟым ожъёсы пыриськем Глимзян Ахмадуллин ужаз. 1938-39-тӥаръёсы гуртамы 110-лы матэ юртъёс лыдъясь­кизы. Атыкай оже но гуртмы уно пиоссэ келяз. Тросэз ӵыжы-выжыосмы отысь ӧз берытске ни. Жаляса верано, ож тыл пыр потэмъёс огзы но улэпесь ӧвӧл ни.

Туннэ нуналэ Бадӟым Туганее­во - Тюльди гурт поселение пырись одӥгез удмурт гурт. Со Калтасы ёрос центрлэсь 8 иськемлы огпала интыяськемын. Отын 300-лэсь трос калыкез лыдъяське. Паськытэсь урамъёсын йыг-йыг чебересь юртъёс сыло. Соос шоры учкыса калыклэсь ӟеч улыны тыршемзэ валаськод. Малпанъёсмы зэмазы Тюльди гурт поселенилэн кивалтӥсеныз Вадим Пазугутовен пумиськеммы бере. «Ка­лыкмы милям эшъяськись, тыршись. Ваньзы ужаны тыршо. Юртъёсмы юнэсь. Урод улӥсь семьяосмы ӧвӧл, - вера Вадим Владимирович. - Быга­тэммыя гурт хозяйствоен ӵош котыр улосэз но утьыны тыршиськом. Алигес Бадӟым Туганеевоысь одӥгзэ колод­чаез выльдӥмы. Матысь дыре ошмесэз тупатыны малпаськом». Со сяна, В. Пазугутовез сюлэмшугъяськыто на егитъёслэн гуртэ ӧжыт кылемзы, Тюльдиысь школалэн ворсаськемез. Табере Бадӟым Туганеевоысь но Тюльдиысь нылпиос тодон-валан басьтон понна Калтасыысь школае ветло. Отчы соосты нуналлы быдэ школа автобус вуттэ но ӝытсэ доразы вае. Шумпоттэ соиз, гуртазы нылпи садзы, школазы ке но ӧвӧл, Бадӟым Туганеевоысь удмурт пиналъёс ёрос школае ӟуч кылэз умой тодыса мыно. Соослы юртто поръёсын ӟеч кусып воземзы но гужем каникулъёсы город нылпиослэн гуртъёсын шутэтскемзы.

Гуртысь фельдшерлэн Светла­на Сергеевна Шариповалэн ивор­тэмезъя, таяз арын одӥг нуны но вордӥськымтэ на. Берлось кык арлы куать нылпи дуннеез адӟем. Озьы ке но ваньмыз сокем урод ӧвӧл, таяз арын вить нылпиослэн анайзы Венера Галимьяновна Зайнетдинова «Анай­мурт дан» медален пусъемын луиз.

Егитъёс тросэз гуртэ уг кылё ке но, соос пӧлын вордскем музъемзы борды биниськемъёсыз но вань. Егитъёс Калтасыысь кирпич поттон заводын, Уйпалан, гурт хозяйствоын но мукет интыосын тыршо, улон инты­оссэс выльдо. Бадӟым Туганеевоын улӥсьёс тросэз анаймурт капиталэн но асьсэ кужыменызы выль коркаос ӝутӥзы но ӝуто. Соос пӧлын Рашит но Наталья Байрамгуловъёс, Эдгар но Алёна Насиповъёс, Алексей но Вера Байтемировъёс, Руслан но Оль­га Минтимировъёс. Азьпал улонзэс соос гуртын адӟо. Школазы ӧвӧл ке но, гуртын клубзы ужа на. Покчиёзо школа пытсаськем бере, клубез татчы выжтӥзы. Соин Лилиана Шарафутди­нова кивалтэ. «Лилиана Ивановна гурт клубамы пӧртэм ужрадъёс орт­чытъяны тырше. Пичиос но арлыдоос шумпотыса отчы люкаськиськомы», - вера 35 ар покчи классъёсты дыше­тэм Галина Бадырзянова. Со но юн куректэ гуртысь школалэн пытсась­кемез, егитъёслэн палэнын тыршем­зы пумысен. Пенсиысь дышетӥсьлэсь малпанъёссэ туннэ Бадӟым Тугане­евоын улӥсьёс пӧлысь тросэз люко, дыр. Уго гуртын школа, егитъёс ке ӧвӧл, со – пересьме.

Марина НИКОЛАЕВА.

Калтасы ёрос.

1519

Оставить сообщение:

НАШИ ПАРТНЕРЫ