Котькытчы учкы - кредит ӵектон огазеяськонъёс. Берло дыре кредитэз тырыны дась луись организациос но пумиськыло ни: басьтэм коньдонэдлэсь кӧня ке люкетсэ гинэ сётоно. Нош соос со коньдонэз вакчи дыр куспын олокӧня пол «будэто» но кредит тырон сярысь малпаськонэд но уг луы ни. Выжыкылын выллем! Милемлы «хэппи-эндэз» гинэ витён кыле. Нош со малы ке ялан уг вуы.
Тодмоелэн бускелез сыӵе амалэн кредит басьтэм. Выль иномаркаяз солы кык толэзь гинэ каньыл ворттылыны кылдэм. Собере банкъёсысь жингыртӥсьёслэсь маза луымтэ ни. Бер валатскем воргорон лохотрон шуон макее шедемез сярысь. Ужкагазэз (договорез) пыр-поч лыдӟымтэез сярысь но со табере жаля. Но гырпумез куртчыны уг луы.
Кыкетӥез учыр. Янаулысь Вероника бюджет организациын ужа. Кузпалыныз кык пинал будэто, юрт ӝуто. Али дыре съёмной квартираын уло. Машиназы автокредитэн басьтэмын.
Дуно машинаен ворттылӥсь эшсэ пумитаса, Вероника тунсыкъяськем: кызьы эшез дуно машина басьтыны быгатэм. Соос но корка ӝутон бордын тыршо ук. Уждунэз но олома быдӟа бадӟым ӧвӧл кадь. Эшез солы кредит басьтыны но сое тырыны юрттӥсь организацие вазиськыны ӵектэм. Вероника куинь нунал ӵоже вакчи дыр куспын «узырмон» сярысь малпаськыса улэм. Эшез сётэм телефонъя ӝог коньдоно, ваньбуро карись организацие но жингыртэм. Лякыт куараё нылаш солы валэктэм: «Компанимы тӥледлы кредит басьтыны но, сое тырыны но юрттоз. Соин понна басьтэм коньдондылэсь 20-25%-сэ компанилы сётоно луоды. Со коньдонды вакчи дыр куспын йылоз. Уго компания сое пайдаё уже кутыса ӟеч «бергатоз» но ӝог будэтоз. Йылэм коньдонды вакчи дыр куспын басьтэм кредиттэс ӵоктаны юрттоз. Кредит басьтон ужкагаз тӥляд нимады луоз, компания та ужын – посредник».
«Сокем каньыл но пайдаё коньдон поттон амал бере, малы меда банкъёс сыӵе системаен уг ужало», - малпаськонэ усем Вероника.
Солы валантэм луэм: пунэме мынам, нош тыре сое тодмотэм «агай». Ньылетӥ нуналаз Вероника ӝог узырмон сярысь малпанзэ вунэтэм. Дунтэм сыр нальыкын гинэ луэ шуыса кышномурт вакытаз валатскем, лэся.
Миляуша НИГАМАТУЛЛИНА.
Оставить сообщение: